Capsicum annuum
- As parolas «pimentera» y «pimentero» reendrezan ta iste articlo. Ta atros usos de «pimentera» se veiga Pimentera (desambigación).
| Capsicum annuum | |
|---|---|
 | |
| Denominacions populars | |
Pimentera, pimentero, pimientera, pimientero, mata de pimientos, planta de pimientos
| |
| Estau de conservación | |
| Clasificación cientifica | |
| Eukaryota | |
| Plantae | |
| Magnoliophyta | |
| Magnoliopsida | |
| Asteridae | |
| Solanales | |
| Solanaceae | |
| Capsicum | |
| C. annuum | |
| Descripción | |
Capsicum annuum
L., 1753 | |
A pimentera[1] común u domestica (scientificament Capsicum annuum (L., 1753)) ye una planta perén, de port herbacio, en a familia d'as solanacias y o chenero Capsicum, cautivada amplament por o suyo fruito comestible; o pimiento.
Descripción
A pimentera domestica ye una planta perén natural, anque por selección artificial se'n ha produciu variedatz que tienen creiximiento anyal u bianyal.[2] Como muitas atras plantas domesticadas y con firme distribución en o mundo, existe un gran numer de variedatz de pimientos ta consumo; bellas variedatz s'han seleccionau ta que tenesen una mida mayor y poder-las consumir como verdura. Manimenos, tamién existe belatras que se cautiva por a suya sabor exotica u ta emplegar-las como especia; ixe ye o caso d'as variedatz conoixidas como corals u guendillas/guindillas.[1]
A pimentera ye una planta herbacia, d'arredol de meyo metro d'altaria (anque bellas variedatz gosan creixer dica pasar t'alto d'un metro, un metro y meyo, u dica dos).[2]
O trallo ye solo en a base, pero se ramifica bien luego y a poca altaria. Se mantiene un solo trallo dica la segunda u tercer ramificación,[2] y alavez comienza a dividir-se dicotomicament, a qual cosa fa desapareixer o trallo individualizau caracteristico de a base d'a mata, perdendo-se en brancas laterals por toda la corona.[2]
As follas son enteras, lancioladas (con «forma de punta de lanza») y pecioladas.[2] A color de l'anverso ye verde intensa (como en quasi tot, bellas variedataz s'han feito que varían en color, mas que mas pensadas ta planta ornamental), y ye glabro[2] (sin pels ni protuberancias). Por o reverso, a nervadura ye muit marcada, con o niérvol central muit resaltau y que se contina con o peciolo,[2] y os niérvols laterals que arriban quasi dica la ladera d'a fuella. As fuellas creixen alternas sobre as brancas y o trallo, y a mida ye proporcionada con a mida que tendrán dimpuesas es fruitos.[2]
As flors son blancas, simples y discretas, d'entre 1,5 y 2 cm de diametro. Son pedunculadas y brostan en a base d'as follas.
Os fruitos, que se conoix como pimientos (<latín PIGMENTUS), son o principal obchecto d'interés en a planta. Son bayas, bofas de pulpa en muitas variedatz (especialment en as que gosan fer-se mas granizos), o que les fa de creixer con formas a sobén asimetricas y con banyas. A color ye verde, amariella u roya, anque bellas variedatz se tornan vrioletas u encara blancos. A sobén se tornan de verdes a amariellos en primeras, y royos dimpués, conforme maduran. O peso d'os pimientos baila d'entre tansament bells gramos dica más de 500.[2]
Oríchens
A pimentera dimana de Sudamerica, de l'Altiplano andino d'entre Bolivia y Perú, a on que ya se teneba en cultura antes de que i arribasen os europeus.[2] En chunto con C. annuum, tamién se cautivaba lo menos quatro especies más de pimenteras que no s'ha feito difundir en a resta d'o mundo.[2]
Os espanyols y os portugueses difundión o cautivo d'o pimiento en Europa en o sieglo XVII, dimpués d'haber estau introduciu en a Peninsula Iberica en o sieglo anterior.[2] Actualment, o pimiento ye una d'as hortalicias más populars y de consumo regular en o mundo.
Cautivo
A pimentera ye una planta de cautivo en huerta, con condicions de regano, y poco tolerant a os extremos climaticos de l'hibierno en o interior peninsular, por o qual o suyo cautivo gosa concentrar-se en os meses estivals. Cal sembrar-la en un plantero, pus a planteta que plega d'escapar se gosa morir con facilidat si se le cambean as condicions. O treslau t'a tierra se fa quan pasa d'os 10 cm d'alto.[3]
Nomás sobrevive con temperaturas por alto d'os 10 ºC positivos, anque suporta baixadas puntuals dica no menos de 7 ºC (p. ex. puntualment, de nueitz), no aguanta que a temperatura remanga tan baixa mientres más de 10-12 horas. En Aragón, y muit especialment en a Montanya, a pimentera ye conoixida por estar una planta de solano, a la qual no le gusta sique as faixas encaradas a'l sol y os puestos d'o huerto a on que le caiga bien a luz solar.
Precisa unas buenas condicions d'augua y riego, pero combinadas con una tierra suelta, tremenada, por a on que l'augua percole ta fondo y no se l'embadine a on que tiene as venas. A tierra ha de tener valors de Ph d'entre 5,5 y 8,[2] anque es óptimos son d'entre 6,5 y 7.[2]
No le fan mica de goyo as corrients d'aire ni o viento persistent, por o que en seguntes qué puestos cal mirar que le'n cubille bell muro u paretón d'o propio huerto u se le morirán y cairán as fuellas, flors y dica os pimientos a metat madurar.[2]
Referencias
- ↑ 1,0 1,1 (an) VIDALLER TRICAS, Rafel (2004); Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza. ISBN 978-84-8986-235-7
- ↑ 2,00 2,01 2,02 2,03 2,04 2,05 2,06 2,07 2,08 2,09 2,10 2,11 2,12 2,13 2,14 2,15 (es) El cultivo del pimiento; consultada l'1 de chinero de 2013.
- ↑ (es) Cultivo del Pimiento; consultada l'1 de chinero de 2013.
Se veiga tamién
- Solanum tuberosum, a patatera.
- Solanum lycopersicum, a tomatera.
- Pimiento
- Pimiento jalapenyo
- Guendilla u guindilla
- Pimienta
Vinclos externos
Se veigan as imáchens de Commons sobre Capsicum annuum.
Wikispecies tiene un articlo sobre Capsicum annuum.
