Emma Watson
Modelo:Actor Emma Charlotte Duerre Watson, nada o 15 de abril de 1990 en París, Francia. É unha actriz británica coñecida pola súa interpretación de Hermione Granger, unha das tres protagonistas da saga de filmes de Harry Potter, baseada nos libros de J. K. Rowling. Watson será escollida para o papel de Hermione á idade de nove anos, aínda que daquela só participara en obras teatrais da escola. O seu traballo reportaralle diversos galardóns e beneficios por máis de 10 millóns de libras.
Dende o ano 2001 ó 2011 apareceu nas oito entregas de Harry Potter. No 2007 anunciou a súa colaboración en dous proxectos á marxe da serie de Harry Potter: a adaptación televisiva da novela Ballet Shoes e o filme de animación The Tale of Despereaux.
Traxectoria
En 1999 comezaron os castings para Harry Potter e a pedra filosofal, a adaptación cinematográfica do supervendas homónimo da novelista inglesa J. K. Rowling. Os encargados do casting atoparon a Watson a través da súa profesora de teatro en Oxford e os produtores ficaron gratamente abraiados pola confianza en si mesma que tiña a rapaza. Tras oito audicións, o produtor David Heyman comunicoulles a Watson, Daniel Radcliffe e a Rupert Grint, que foran seleccionados para interpretar a Hermione Granger, Harry Potter e Ron Weasley, respectivamente. A autora da novela, Rowling, xa mostrara o seu apoio a Watson dende que viu a súa primeira proba.
O debut de Watson como Hermione Granger chegou en 2001, coa estrea de Harry Potter e a pedra filosofal, película que bateu récords de taquilla durante a súa primeira fin de semana, sendo a produción máis taquilleira dese ano. A crítica eloxiou, maioritariamente, o traballo da tríade protagonista, facendo fincapé na interpretación de Watson. O xornal inglés The Daily Telegraph describiu o seu traballo como «admirable», e IGN afirmou «fíxose dona da función». Watson foi nomeada a cinco premios polo seu traballo, acadando o Young Artist á Mellor interpretación xuvenil-Protagonista (Young Artist Award for Leading Young Actress).
Ó ano seguinte, Watson retomou o papel de Hermione en Harry Potter e a Cámara dos Segredos, a segunda entrega da serie. Aínda que o filme recibiu diversas críticas mixtas, en xeral, valorouse positivamente o traballo do reparto e Watson recibiu un premio Otto polo seu labor, outorgado pola revista alemá Die Welt.
En 2004 estreouse Harry Potter e o preso de Azkaban. Watson destacou a personaxe de Hermione nesta terceira entrega, que definiu como «carismático» e «un gran papel para interpretar». A pesar de que a crítica comezou a cuestionar o traballo do protagonista Daniel Radcliffe, Watson continuou recibindo críticas positivas; The New York Times eloxiou a súa interpretación, destacando que "afortunadamente o insípido traballo do señor Radcliffe queda compensado pola aguda impaciencia e rapidez da señorita Watson". Aínda que Harry Potter e o preso de Azkaban permanece, a xaneiro de 2008, como o filme menos taquilleiro da serie, representou o maior éxito de Watson, recibindo dous premios Otto e o premio á Actuación xuvenil do ano da revista Total Film (Child Performance of the Year).
Coa estrea en 2005 de Harry Potter e o Cáliz de fogo, tanto Watson como a serie superaron tódolos rexistros anteriores. A película batiu récords de taquilla na súa primeira fin de semana, tanto en Estados Unidos como no Reino Unido. Nomeada en tres premios polo Cáliz de fogo, Watson foi galardoada cun Otto de bronce. No 2006 interpretou a Hermione en The Queen´s Handbag, un mini episodio especial de Harry Potter para celebrar o oitenta aniversario da raíña Sabela II.
A quinta entrega, Harry Potter e a Orde do Fénix, estreada en 2007, foi todo un éxito financieiro: estableceu a cifra récord, a nivel mundial, de $333,7 millóns na súa primeira fin de semana. Watson gañou o primeiro National Movie Award á mellor interpretación feminina e o premio á mellor actriz nos Nickelodeon Kids' Choice Awards. En xullo de 2007, Watson e os seus compañeiros Daniel Radcliffe e Rupert Grint, deixaron as pegadas das súas mans, pés e variñas fronte ó Grauman's Chinese Theatre en Hollywood.
Filmografía
| Ano | Filme | Papel | Notas |
|---|---|---|---|
| 2001 | Harry Potter e a pedra filosofal | Hermione Granger | |
| 2002 | Harry Potter e a Cámara dos Segredos | ||
| 2004 | Harry Potter e o preso de Azkaban | ||
| 2005 | Harry Potter e o Cáliz de fogo | ||
| 2007 | Harry Potter e a Orde do Fénix | ||
| Ballet Shoes | Pauline Fossil | filme para televisión da BBC1. | |
| 2008 | The Tale of Despereaux | Princesa Pea | filme animado. |
| 2009 | Harry Potter e o misterio do príncipe | Hermione Granger | Estreada o 15 de xullo de 2009. |
| 2010 | Harry Potter e as reliquias da morte - Parte 1 | Estreada o 18 de novembro de 2010. | |
| 2011 | Harry Potter e as reliquias da morte - Parte 2 | Estrea prevista para xullo de 2011. | |
| 2011 | My week with Marilyn | Lucy | Papel secundario |
| 2012 | The Perks of being a Wallflower | Sam | Protagonista |