Bridgetown

Bridgetown é a capital do pequeno estado-illa de Barbados, sito nas Antillas. A cidade, en sentido estrito, ten uns 7.000 habitantes, mais a poboación da súa área metropolitana acadaba os 96.578 no ano 2006. Situada sobre o Mar Caribe, está na parte sur-occidental da illa, na baía de Carlslile.

Xeografía

A cidade de Bridgetown, e máis a área do Greater Bridgetown ("Grande Bridgetown") ocupa a maior parte da parroquia de Saint Michael, cunha superficie de arredor de 39 km². O centro da cidade era orixinariamente un pantano, que foi drenado e logo recheado para gañar espazo para o o temperán desenrolo da vila.

No corazón de Bridgetown sitúanse o río Constitution e o Careenage, o amplo estuario do mesmo río, que acolle o porto. Este curso de auga fornece acceso directo ao centro a iates medianos e pequenos botes de recreo. Aínda que pouco profundo, o Careenage divide Bridgetown en dúas partes. Durante a estación das choivas o río Constitution desbórdase na area de Careenage, actuando como zona de descarga das augas das tormentas do interior da illa.

Clima

O clima da capital, como o de Barbados, é de tipo tropical. A media das temperaturas mensuais non baixa do 20º C, aínda que as mínimas extremas poden achegarse até os 16º C. As medias altas dos meses de verán soen superar os 30º C. As precipitacións medias anuais atinxen 2.896 mm.

Historia

A cidade foi fundada polos británicos en 1628, recibindo o nome de St. Michel. Aínda que a illa estaba nesa altura deshabitada, atoparon restos dunha ponte construída por indios caribes no Careenage, talvez aravacos, vidos probabelmente desde a próxima illa de Santa Lucía. En 1654 os británicos construíron unha nova ponte sobre o Careenage, coñecéndose o lugar como The Town of Saint Michael, para algo máis tarde pasar a denominarse Bridgetown ("A cidade da Ponte"), que foi o nome que perdurou.

Bridgetown é a única cidade insular de América do Norte que foi visitada por George Washington. A casa na que morou daquela, coñecida hoxe como George Washington House, forma parte na actualidade da Garrison Historic Area.

Desde 1800 até 1885, Bridgetown foi a residencia habitual do Gobernador das Barbados e das denominadas Colonias Británicas das Windward Islands. Despois de 1885 aínda que seguíu a existir oficialmente o cargo de Gobernador, a residencia foi trasladada para Sainht George, na illa de Grenada.

Economía

Bridgetown é un importante centro financeiro no Caribe. Conta con algún banco propio saliente como é o Barbados Stock Exchange, pero coñecidos bancos estranxeiros teñen aquí oficinas. Conta tamén con a bolsa de negocios máis importante das Antillas.

Unha das fontes de ingresos maiores é o turismo. Exporta ron, azucre e melaza.

Puntos de interese

A National Heroes Square (Praza dos Heroes, antes Trafalgar Square), con a estatua de Nelson, erguida en 1813, e Fountain Garden.

O edificio do Parlamento de Barbados.
A catedral de Saint Michael e a súa praza.
A igrexa anglicana de St. Mary.
A catedral católica de St. Patrick.
A sinagoga xudía.
Queen's Park.
O Museo de Barbados.
O mercado de Cheapside e os seus xardíns.
A Área Histórica de Garrison.

Comunicacións

Bridgetown ten voos diarios desde o Aeroporto Internacional Grantley Adams Airport sito en Seawell, Christ Church, ao que se accede pola Estrada ABC.

A cidade comunica coas localidades máis importantes da illa por medio das estradas principais. Hai liñas regulares de autobuses, que saen de puntos distintos da cidade. Hai tamén autobuses públicos urbanos e servizo de taxis.

O movemento polo mar está regulado pola Barbados Port Authority.

Véxase tamén

Ligazóns externas