Diana Ross
Diana Ross | |
---|---|
Ross árið 1976 | |
Fædd | 26. mars 1944 |
Störf |
|
Ár virk | 1959–í dag[1] |
Maki |
|
Börn | 5 |
Tónlistarferill | |
Stefnur | |
Hljóðfæri | Rödd |
Útgefandi |
|
Vefsíða | dianaross |
Diana Ross (f. 26. mars 1944) er bandarísk söngkona, lagahöfundur og leikkona, fædd í Detroit, Michigan. Hún varð fyrst fræg sem forsöngvari raddsveitarinnar The Supremes sem voru vinsælasta hljómsveit Motown-útgáfunnar á 7. áratugnum og ein af vinsælustu stúlknahljómsveitum allra tíma. The Supremes eru enn sú kvennahljómsveit sem á flesta smelli á vinsældalistum,[2] með alls tólf lög í fyrsta sæti á bandaríska Billboard-listanum; þar á meðal lögin „Where Did Our Love Go“, „Baby Love“, „Come See About Me“ og „Love Child“.[3]
Ross yfirgaf The Supremes árið 1970 og hóf þá sólóferil í tónlist, kvikmyndum, sjónvarpi og á sviði. Fyrsta sólóplata hennar hét einfaldlega Diana Ross og innihélt smellina „Ain't No Mountain High Enough“ (sem fór í 1. sæti Billboard-listans) og „Reach Out and Touch (Somebody's Hand)“. Önnur sólóplatan, Everything is Everything innihélt smellinn „I'm Still Waiting“ sem komst í 1. sæti breska vinsældalistans. Hún fylgdi plötuútgáfum eftir með tónleikaferðalögum um allan heim þar sem hvert aðsóknarmetið á fætur öðru var slegið, og með því að koma fram í sjónvarpsþáttum. Á eftir komu metsöluplötur eins og Touch Me in the Morning (1973) með smellinn „Touch Me in the Morning“, Mahogany með titillagið úr samnefndri kvikmynd (1975) og Diana Ross (1976) með smellinn „Love Hangover“. Ross gaf út fjölda laga sem náðu í efstu sæti vinsældalista á 8., 9. og 10. áratugnum. Hún átti lög í fyrsta sæti bandaríska listans 1980 („Upside Down“) og 1981 („Endless Love“) og breska listans 1986 („Chain Reaction“). Lagið „When You Tell Me That You Love Me“ náði í annað sæti breska listans árið 1991.
Ross hefur líka fengist við leiklist. Hún hlaut óskarstilnefningu sem besta leikkona í aðalhlutverki fyrir hlutverk sitt sem Billie Holiday í kvikmyndinni Lady Sings the Blues árið 1972. Hún flutti líka tónlistina í kvikmyndinni, en sú plata varð metsöluplata í Bandaríkjunum. Hún lék hlutverk í kvikmyndunum Mahogany 1975 og The Wiz 1978. Seinna lék hún í sjónvarpsmyndunum Out of Darkness 1994, þar sem hún fékk tilnefningu til Golden Globe-verðlauna, og Double Platinum 1999.
Ross var útnefnd „kvenkyns skemmtikraftur aldarinnar“ af Billboard-tímaritinu árið 1976. Hún hefur gefið út 25 stúdíóplötur sem sólólistamaður, auk fjölda smáskífa og safnplatna sem hafa selst í yfir 75 milljónum eintaka.[4] Hún er eina tónlistarkonan sem hefur átt lög í 1. sæti Billboard-listans bæði sem sólólistakona, sem hluti af dúett, tríói og hljómsveit. Billboard hefur sett hana í 30. sæti yfir vinsælustu tónlistarmenn allra tíma.[5] Ross er í topp 5 yfir listamenn sem hafa átt lög á Billboard-listanum frá 1955 til 2018 ef saman eru tekin lög hennar með The Supremes og frá sólóferlinum.[6] Hún hefur átt lag í efstu sætum breska vinsældalistans á hverjum áratug síðustu fimm áratugi og átti lag í topp 75 í Bretlandi á hverju ári frá 1964 til 1996, sem er met. Árið 1988 var Ross skráð í Rock and Roll Hall of Fame sem söngkona í The Supremes. Samkvæmt Heimsmetabók Guinness á hún fleiri smelli á vinsældalistum en nokkur önnur tónlistarkona, með alls 70 lög samanlagt frá ferli hennar með The Supremes og sem sólólistakona. Hún hlaut heiðursverðlaun John F. Kennedy Center for the Performing Arts árið 2007, Grammy Lifetime Achievement Award árið 2012 og Frelsismerki Bandaríkjaforseta árið 2016.
Tilvísanir
[breyta | breyta frumkóða]- ↑ Allard, François; Lecocq, Richard (2018). „Diana Ross: Godmother and Muse“. Michael Jackson: All the Songs: The Story Behind Every Track. Octopus Books. ISBN 9781788401234. Afrit af uppruna á 1. ágúst 2020. Sótt 11. nóvember 2019.
- ↑ „Top 10 Girl Groups of All Time: page 1“. Billboard. 11. júlí, 2017. Afrit af uppruna á 10. september, 2016. Sótt 17. apríl, 2020.
- ↑ Lipshutz, Jason (28. apríl, 2014). „Top 40 Girl Group Songs Of All Time“. Billboard. Afrit af uppruna á 23. febrúar, 2015. Sótt 28. febrúar, 2015.
- ↑ „Diana Ross to play The Joint in April“. Tulsaworld.com. Afrit af uppruna á 10. ágúst, 2021. Sótt 10. ágúst, 2021.
- ↑ „Greatest of All Time Hot 100 Artists“. Billboard. Afrit af uppruna á 22. nóvember, 2015. Sótt 28. ágúst, 2020.
- ↑ Whitburn, Joel. Joel Whitburn's Top Pop Singles 1955-2018. Record Research. ISBN 0-89820-233-7.