Lentia
Formula:Commune Austriae (Germanice)
Lentium[1] sive Lentia[2][3] (Theodisce: Linz) est urbs in Austria ad Danubium flumen sita et caput provinciae Austriae Superioris. Post Vindobonam et Graeciam numero incolarum tertium locum inter urbes austriacas tenet. Anno 2009, Lentia una cum Vilna titulum capitis culturalis Europae tulit.
Historia
Iam quarto saeculo a.C.n., compluria oppida Celtica in ea regione, quam Lentia hodierna occupat, sive in collibus sive in utraque Danubii ripa exstiterunt, quorum unum in monte Freinberg vocato situm Celtarum lingua Lentos ('flexibilis, incurvatus') appellatum esse videtur, quod nomen in posteriora castra Romana translatum est.
Inter annos 166 et 180, dum bellum Marcomannicum geritur, Marco Aurelio imperatore castra posita sunt. Quorum fit mentio in Notitia Dignitatum (circiter 420) sub nomine Lentia. Oppidum quamvis compluries a Germanis deletum, tamen in Medium Aevum permanebat et ab saeculo octavo, cum Tassilone III duce in dicionem ducatus Bavariae venit, denuo florescebat.
Anno 799, nomen vernaculum Linze primum litteris apparet, anno 806 Lentia mercatus dicta est, sub annum 1240 urbi praetor et sigillum urbanum tributa sunt. Cum urbs illo tempore in confinibus ducatus Austriae sita esset, portorium exigebatur, quo incrementum civitatis magnopere augebatur, cuius rei testimonio est novum forum anno 1230 creatum.
Religiones
Ad 1600, maxima Lentiae pars incolarum confessioni Augustanae addicta, ecclesia autem Catholica paene exstincta erat. Post Reformationem Catholicam, initio saeculi decimi septimi habitam usque ad hodiernum diem, maior civium pars sunt Catholici Romani. Lentia etiam est sedes episcopalis Ecclesiae Catholicae Romanae, nomine Dioecesis Linciensis. Praesens Episcopus Ludovicus Schwarz[4] anno 2005 nominatus est. Lentia multas ecclesias magnificas habet. Ecclesia Cathedralis Nova[5] principio saeculi vicesimi aedificata maxima Austriae ecclesiarum est.
Aliae ecclesiae praeclares:
- Ecclesia parochialis (Theodisce: Stadtpfarrkirche)
- Ecclesia cathedralis antiqua (ecclesia Iesuitarum)
- Ecclesia Ordinis Sanctae Ursulae
- Ecclesia in monte Pöstlingberg (Basilica peregrinationis)
- Ecclesia Sancti Martini (quae est antiquissima ecclesia urbis tempore Caroli Magni fundata).
Schola episcopalis (antea "seminarium minus") nomine Collegium Petrinum anno 1897 condita est.
Alia aedificia visu digna
- Castellum: Prima mentio facta est anno 799; saeculo quinto decimo, sedes imperatoris Friderici III erat. Ex anno 1966, hospitio museo historico-ethnographico praebet.
- Lentos: Aedificium notandae architecturae modernae ad Danubium situm cum pinacotheca arti recenti destinata.
- Brucknerhaus: Domus musicae arti dedicata, quae nomen a compositore Antonio Bruckner trahit.
- Novum theatrum variis musicae spectaculis dedicatum et anno 2013 apertum
Artes et scientiae
Quattuor universitates Lentiae sitae sunt:
- Universitas Kepleriana (Theodisce: Johannes-Kepler-Universität) : septem facultatibus praedita, scil. Chimica, Biologica, Mathematica, Physica, Oeconomica, Sociologica, et Iurisprudentiae
- Universitas Theologica Catholica
- Universitas artis musicae nomine Anton-Bruckner-Universität
- Universitas Artium visualium
Incolae noti
Nati
- Helimutus Marx (1915 - 2002) sculptor
- Valie Export: Artifex mediorum, nata die 17 Maii 1940 Lentiae.
- Christina Stürmer (*1982), cantrix
Mortui
- Adalbertus Stifter: Scriptor, pictor, paedagogus; natus 23 Octobris 1805 Planae de Monte Vitconis (Bohemia), mortuus 28 Ianuarii 1868 Lentiae.
Alii cives
- Iohannes Keplerus: Astronomus, natus 27 Decembris 1571 in Weil der Stadt, mortuus 15 Novembris 1630 Ratisbonae, qui multos annos Lentiae vitam agebat.
- Antonius Bruckner: Compositor; natus in vico Ansfelden nuncupato (in Austria superiore sito) die 4 Septembris 1824, mortuus Vindobonae die 11 Octobris 1896.
Notae
- ↑ A. Chiusole, Il mondo antico, moderno, e novissimo, ovvero Breve trattato (Venetiarum: G. B. Recurti, 1749)
- ↑ "Lentia" in Iohannes Iacobus Hofmannus, Lexicon universale (1698) ~
- ↑ J. G. Th. Graesse, Orbis Latinus (Dresdae: Schönfeld, 1861; 1909. Brunsvici, 1972, 3 voll.) 1 2 3. Alia nomina sunt: Lincia, Linca, Lincium, Linza, Lintza, Gesadunum, Aredata, Aredatum.
- ↑ de:Ludwig Schwarz
- ↑ de:Neuer Dom (Linz)
Nexus externi
|
Vicimedia Communia plura habent quae ad Lentiam spectant. |
 |
 | |
|
Anisia · Brigantium · Campitemplum · Cetium · Clagenfurtum · Comagenis · Ferreum Castrum · Graecia · Lentia · Ovilava · Pons Aeni · Salisburgum · Veldidena · Vindobona | |