Драчево (населба)

Оваа статија се однесува на населбата. За селото Драчево, видете Драчево.

Драчево
Населба
План на населбата
Координати: 41°56′27″N 21°30′56″E
Држава	Македонија
Општина	Кисела Вода
Пуштено за живеење	27 декември 1963
Надм. вис.	&10000000000000240000000240 м

Драчево — населба во Општина Кисела Вода, во градот Скопје. Поради неговата местоположба и физичка одвоеност од самото Скопје, населбата претставува ексклава на главниот град. Името на населбата го носи според соседното и физички споено село Драчево кое пак поради неговиот рурален статус, не влегува во Скопје. Освен населбата Драчево, и населбата Радишани е физички одвоена од Скопје, но претставува негов составен дел.

Географија и местоположба

Драчево се наоѓа во јужниот дел на Скопската Котлина на 9 километри оддалеченост (воздушна линија) од средиштето на Скопје, во југоисточен правец. Населбата е рамничарска и покрај неа минува месен пат за повеќе скопски села. Со другите делови на Скопје, Драчево е поврзано преку повеќе автобуски линии. Непосредно на запад, Драчево е расположено на десниот брег на Маркова Река. На исток и југоисток, населбата Драчево граничи со селото Драчево и обете населени места се физички споени. На северозапад, Драчево граничи со атарот на Долно Лисиче, на север граници со атарот на Горно Лисиче, Пинтија е во правец на северозапад, Батинци на југозапад.

Историја

Бараките во населба Драчево, изградени од оператива од СР Србија.

Свечено предавање во употреба на новоизградената населба Драчево со 706 станови.

По разорниот Скопски земјотрес во 1963 година, со одлука на советот на тогашната Општина Драчево (со седиште во селото Драчево) бил усвоен урбанистички план во договор со Град Скопје, за изградба на приградска населба во непосредна близина на селото Драчево, во која требало да бидат вселени 3.000 семејства од Скопје кои ги загубиле своите домови во земјотресот. Населбата Драчево била плански изградена со 2.100 ниски приземни монтажни бараки кои ги граделе градежни фирми од целата тогашна Југославија. На 27 декември 1963 година, населбата со бараките биле пуштени во употреба. Службеното предавање било извршено од Љупчо Арсов, претседател на ИО на Главниот одбор на ССРНМ. За потребите на населбата биле отворени уште 2 основни училишта, а било отворено и средно училиште. По постепеното враќање на Скопјани во матично Скопје, набрзо почнало да се доселува население од сите краишта на Македонија.

Население

Според пописот од 2002 година, жители на Драчево по народност биле:

Народност	Број на жители
Македонци	9,269
Албанци	179
Турци	270
Роми	276
Власи	28
Срби	225
Бошњаци	140
Останати	218
Вкупно	10,605

Општествени установи

Во населбата Драчево, дејствуваат две основни училишта: ОУ „Рајко Жинзифов“ и ОУ „Кузман Шапкарев“, како и едно средно училиште - СУГС „Браќа Миладиновци“ (со насоки: гимназија, земјоделски и хортикултурни и ветеринарни смерови). Исто така во Драчево работи и детската градинка „1 Март“. Во населбата е сместена Полициската станица „Драчево“ и Поликлиниката „Драчево“.

Стопанство

Во 1970 година, бил изграден пазарот. Во мај 2023 година, започнало целосното подновување на истиот пазар.

Со развојот на мали претпријатија и создавањетона индустриска зона, многу стопанственици отвориле свои фирми во и околу територијата на населба Драчево. Најзначаен плаза центар е Olympus Plaza - Скопје со седиште токму во населба Драчево во кој се вработени околу 3000 работници. Потоа други значајни фирми се: „Макпетрол“ и неговата бензиска станица, „Storia Cafe“, MegaSport „La Gondola“, „КАМ Маркет“, „Пицерија Коко“, „Зегин Естреја Драчево“, „Си-Ника Трејд“, „СТП Драчево“ и некои други помали фирми.

Управување и администрација

Во рамките на Општина Кисела Вода, населбата Драчево е претставувана од Урбаната заедница „Бобан Трпков“. Урбаната заедница порано го носела името УЗ Населба Драчево.

Избирачко место

Гласање во населба Драчево за време на парламентарните избори 2024

Број на избирачко место	Установа кадешто се наоѓа	Женски гласачи	Машки гласачи	Регистрирани гласачи
2775	ООУ „Рајко Жинзифов“	434	465	899
2776	ООУ „Рајко Жинзифов“	328	310	638
2777	ООУ „Рајко Жинзифов“	65	61	126
2778	ООУ „Рајко Жинзифов“	250	260	510
2779	ООУ „Рајко Жинзифов“	309	337	646
2780	ООУ „Рајко Жинзифов“	365	421	786
2781	ООУ „Рајко Жинзифов“	493	481	974
2782	ООУ „Рајко Жинзифов“	452	481	933
2783	ОУ „Кузман Шапкарев“	399	424	823
2784	ОУ „Кузман Шапкарев“	441	468	909
2785	ОУ „Кузман Шапкарев“	305	300	605
2786	ОУ „Кузман Шапкарев“	183	189	372
2787	ОУ „Кузман Шапкарев“	219	230	449
2788	СУ „Браќа Миладиновци“	327	335	662
2790	СУ „Браќа Миладиновци“	275	271	546
2791	СУ „Браќа Миладиновци“	325	335	660
2792	СУ „Браќа Миладиновци“	471	446	917
Вкупно		5,641	5,814	11,455

• Значителен од гласачите на одредени избирачки места, се од селото Драчево.

Со споената статистика за селото и населбата Драчево, на парламентарните избори во 2024 година, гласале вкупно 10.148 жители, каде 65% од гласовите освоила Коалицијата „Твоја Македонија“ предводена од ВМРО-ДПМНЕ, 11% Коалицијата „За Европска Иднина“ предводена од СДСМ и 12% партијата Левица.

Култура и спорт

Од населбата Драчево е фудбалскиот клуб ССК Младинец. Неговиот домашен терен е сместен во северниот дел на населба Драчево.

Знаменитости

Во април 2024 година, на Плоштадот на бранителите во Паркот „Драчево“, бил осветен крст висок 63 м. Осветувањето било извршено од г.г. Стефан.

Сообраќај

Автобуски услуги

Кон Драчево сообраќаат девет автобуски линии од ЈСП Скопје. Сите линии само минуваат низ или покрај Драчево, како транзит до останатите околни населени места. Тие се:

• 31 - Долно Лисиче - Транспортен центар (оваа линија минува низ населбата Драчево)
• 41 - Фабрика Типо/ЖС „Драчево“, село Драчево - Транспортен центар, меѓу населбите Пролет и Мичурин (оваа линија минува низ населбата Драчево)
• 41а - Сретсело/Говедариште, село Драчево - Клинички центар, Водно (оваа линија минува низ населбата Драчево)
• 42 - Сретсело/Говедариште, село Драчево - Железара (оваа линија минува низ населбата Драчево)
• 51 - Студеничани - Транспортен центар (оваа линија минува покрај населбата Драчево)
• 51а - Морани - Транспортен центар (оваа линија минува покрај населбата Драчево)
• 67 - Зелениково - Транспортен центар (оваа линија минува покрај населбата Драчево)
• 74 - Долно Количани - Транспортен центар (оваа линија минува покрај населбата Драчево)
• 163 - Сретсело/Говедариште, село Драчево - Општина Илинден (оваа линија минува низ населбата Драчево)

Личности

• Миле Кузмановски, пејач
• Петар Наумоски (1968), кошаркар родум од Прилеп
• Бобан Трпков (1968 – 2001), македонски бранител, припадник на ЕБИ Лавови
• Игор Костески (1975 – 2001), македонски бранител, водник во БСН Волци, еден од загинатите во масакрот кај Вејце
• Теодор Стојановски (1977 – 2001), македонски бранител, граничар на АРМ
• Два Бона, музичка група

Галерија

• 
  Карта на населба Драчево
• 
  Плоштадот на бранителите на Македонија, сместен во паркот „Драчево“.