Friidrett under Sommar-OL 2012
Friidrettsøvingane under Sommar-OL 2012 i London vart avvikla i tida 3. til 12. august 2012. Det vart tevla i 47 øvingar, 24 for menn og 23 for kvinner, nett som førre sommar-OL i Beijing. Alle dei 42 baneøvingane fann stad på olympiastadion (Olympic Stadium) i Aust-London, medan dei fem gatetevlingane; tre i kappgang og to i maraton, starta og enda i hovudgata The Mall i sentrum av London.
1160 menn og 1071 kvinner var påmelde til friidrettsøvingane, til saman 2 231 deltakarar frå 201 land. Sleggjekastaren Oleksandr Dryhol var eldste deltakar med sine 46 år, medan sprintaren Cristina Llovera frå Andorra på 15 år og 10 månader var den yngste.
I desse leikane vart det sett fire nye verdsrekordar i friidrett. David Rudisha frå Kenya forbetra sin eigen verdsrekord på 800 meter til 1.40,91. Så vart det sett nye verdsrekordar på 4 x 100 m stafett både for kvinner og menn; fyrst knuste USA ved Tianna Madison, Allyson Felix, Bianca Knight og Carmelita Jeter den 27 år gamle rekorden til Aust-Tyskland på 41,37 sekundar, ny rekordtid 40,82, og dagen etter forbetra Jamaica sin eigen årsgamle rekord då laget vart det fyrste under 37 sekundar i øvinga med sine 36,84 sekundar. Rekordsetjarane var Nesta Carter, Michael Frater, Yohan Blake og Usain Bolt. Same dag flytta kappgjengaren Jelena Losjmanova verdsrekorden på 20 km ned seks sekundar til 1.25.02.