Stétoskop
Stétoskop nyaéta alat pamariksa kaséhatan anu fungsina keur ngadéngé sora internal awak boh sora jantung, bayah/pernafasan, sora arteri jeung sora dina sistem pencernaan manusa jeung sato.[1][2][3] Stétoskop disusun tina résonator anu wangunna piringan leutik jeung tabung anu ngahubungkeunana sangkan ngagampangkeun nu ngadéngékeunana.[1][2] Salian ti éta aya belah anu nyabang anu tungtungna dipasangkeun kana ceuli jeung patali ngaliwatan pipa karét jeung aya deui belah anu dipaké keur mariksa pasién.[3] Belah nu anu terahir ieu ogé patali jeung belah lainna ngaliwatan pipa karét jeung dina tungtungna aya mémbran penghantar sora.[3] Sanajan wangunna sederhana, stétoskop mangrupa penemuan penting di dunya médis.[1] Dokter jeung ahli profésional kaséhatan gumantung kana ieu alat keur nangtukeun diagnosa médis pasien, keur ngalakukeun pamariksaan fisik, jeung pamariksaan tanda vital anu sipatna auskultasi.[1] Ku aya stétoskop, kiwari dokter bisa ngadéngé jeung ngamonitor rupa-rupa sora internal awak pasien boh anu normal boh anu abnormal.[1]
Sajarah[édit | édit sumber]
Saméméh ayana stétoskop, para dokter langsung némpélkeun ceulina kana belah awak pasién keur mariksa kaayaan umum, diagnosis, jeung rupa-rupa kamungkinan panyakit pasién.[1] Jaman harita dokter kudu paantel langsung jeung awak pasién anu katarajang rupa-rupa panyakit.[1] Hal ieu tangtuna waé ngandung loba résiko jeung bebab moral, komo deui résiko nularna panyakit inféksi baktéri jeung virus.[1] Salian ti éta, tina sisi étika ogé némpélkeun ceuli kana dada pasién komo awéwé mah ngabalukarkeun rasa nu henteu genah.[1]
Dina taun 1816, stétoskop kapanggih ku René-Théophile-Hyacinthe Laennec, dokter di rumah sakit Malades Necker-Enfants di Paris Prancis.[1][3] Basa mimiti dijieun, wangun stétoskop mangrupa tabung kai kosong, can canggih jiga jaman ayeuna.[1] René ngahaja nyiptakeun éta alat sangkan henteu kudu némpélkeun ceulina dina dada para awéwé Prancis.[1] Ieu alat tuluy dimekarkeun ku George Philip Cammann dina taun 1840 nepi ka rupana sigan stétoskop jaman ayeuna.[3]
Fungsi[édit | édit sumber]
Keur manusa, fungsi stétoskop di antaranaː
- keur ngadéngé jeung ngadiagnosis rupa-rupa sora jeung kelainan fungsi sarta denyut jantung, murmur jantung, jeung rupa-rupa jenis panyakit jantung sarta kelainan lainna.[1]
- Keur ngadéngé sora bayah jeung sora pernafasan anu normal jeung abnormal.[1]
- Keur ngadéngé sora arteri jeung pamariksaan tekenan getih hij jalma.[1]
- Keur ngadéngé sora jeung kelainan-kelainan péristaltik usus jeung saluran pencernaan.[1]
- Keur ibu hamil aya stétoskop husus anu dipaké keur ngadéngé sora jantung, janin, jeung mangpaat pisan keur mikanyaho kondisi kaséhatan kahamilan.[1]
Sedengkeun keur sato jeung mamalia stétoskop umumna miboga fungsi nu sarua.[1] Dokter sato ogé ngagunakeun ieu alat keur ngamonitoring jeung ngadiagnosa rupa-rupa kasakit sato.[1]
Jenis[édit | édit sumber]
- Stétoskop binaural – mangrupa stétoskop anu dirancang sangkan bisa didéngé ngagunakeun dua ceuli sedengkeun stétoskop tunggal mah ngan ukur keur hiji ceuli.[2]
- Stetoskop diferensial – ku ayana ieu stétoskop, pamakéna bisa ngabandingkeun sora di dua lokasi anu béda.[2]
- Stetoskop akustik – anu umumna digunakeun jeung cara gawéna ku cara nyalurkeun sora ti belah dada ngaliwatan tabung kosong anu eusina hawa kana ceuli nu ngadéngé.[2]
- Stetoskop elektronik – ngungkulan tingkatan sora anu rendah ku cara nguatan sora awak.[2] Ieu stétoskop bisa nguatan sora anu dihasilkeun ku organ awak anu dipariksa.[2]
Cara Ngagunakeun[édit | édit sumber]
Sangkan bisa ngadéngé sora internal awak, waktu ngalakukeun pamariksaan para dokter bakal neundeun résonator/piringan leutik tungtung stétoskop dina belah awak anu hayang dipariksa jeung ngahubungkeunana kana ceuli.[1] Misalna, urang hayang ngadéngé sora jantung, maka stétoskop kudu diteundeun dina lebah dada belah kénca luyu jeung posisi jantung.[1]
Lamun pamariksaan sora jeung kelainan bayah, maka stétoskop kudu diteundeun dina luhur dada saluyu jeung posisi organ paru kénca jeung katuhu.[1] Kitu ogé lamun rék mariksa beuteung, makan stétoskop kudu diteundeun dina luhur beuteung.[1] Tapi lamun urang rék mariksa ténsi/tekenan getih, stétoskop kudu digunakeun babarengan jeung alat kaséhatan lianna nyaéta sfigmomanométer atawa ténsiméter.[1]
Referensi[édit | édit sumber]
- ↑ a b c d e f g h i j k l m n o p q r s t u v w x "Pengertian dan Fungsi Stetoskop Dan Sejarah Penemuan Stetoskop | ID Medis - Website Kesehatan". www.idmedis.com. Diakses tanggal 2017-12-05. Archived 2017-12-03 di Wayback Machine
- ↑ a b c d e f g "Fungsi Stetoskop". Fungsiklopedia. Diakses tanggal 5 Desember 2017. Archived 2017-11-23 di Wayback Machine
- ↑ a b c d e "Pengertian Stetoskop". Arti Definisi Pengertian. Diakses tanggal 5 Desember 2017.