Autonavigation
Autonavigation oarbaidet mäd dät GPS (Global Positioning System). Dät gungt mäd Funksignoale fon spezielle Satellite. Do seende immer gans seküür hiere Position un ju Tied fon ju Seendenge. Ju Navigationsreewe ämpfangt sun Signoal, sjucht ap ju Klokke wo loang dät Signoal unnerwains weesen is un kon dan mäd ju gans bekoande Funkgaauegaid bereekenje, wo wied die Satellit wäch is.
Wofuul Satellite?
Wan me nu in dät Auto mäd sun Reewe fiert, un me ämpfangt aan Satellit die der boppe Lier is un n uuren buppe Ait, dan weet me also, wo wied me fon Ait is un wo wied fon Lier un deermäd is ju Steede fon dät Auto ap dät flache Lound gans genau bestimd.
Wan me nu in do Bierge fiert, dan kumt uk noch ju Hööchte bietou un bruukt me also noch n trääden Satellit. Un deeruum dät ju Navigationsreewe gans genau ju Tied wiete mout, bruukt me deerfoar uk noch n fjooden Satellit. (Wil me dan intwiske ju oaine Loage weet, kon me hiere Oustand uunouhängich bestimme un deermäd ju Tied fon Ämpfang).
Ju Navigationsreewe
Ju is, ju dät muugelk moaket. Ju säkt automatisk ap älke Moment do stäärkste Satellite, bereekent ju Position un ju Fiergjuchte un wiest dät dan aal ap n litje Schirm in Foarm fon ne tjodimensionoale Koarte. Deerbie wiest ju dan uk noch ju Gauegaid, un wo loange dät noch is ätter dän foulgjende Ousleek.
Me kon deer sogoar ju Adrässe ounbrange, wier me wai wol un dan wäd me deer gans fluch foar de Doore oulääwerd! Sogoar kon me sik wiese läite wier Staue sunt un wier Gauegaidskontrollen (duur me nit!).
Koarten
Uum tou wiesen wier me sik mäd ju so bestimde Position befint, änthaalt ju Navigationsreewe elektroniske Koarten. Bie ne goude Marke kon me deer oafte näie foar deelleede, so dät aal do Annerengen in dät Weegesystem fluks mee apnuumen wäide.