Krieket Wes-Indië

Krieket Wes-Indië
Krieket Wes-Indië
Engelse naam	Cricket West Indies
Afkorting	CWI
Lande	Amerikaanse Maagde-eilande  Anguilla  Antigua en Barbuda  Barbados  Britse Maagde-eilande  Dominica  Grenada  Guyana  Jamaika  Montserrat  Sint Maarten  St. Kitts en Nevis  St. Lucia  St. Vincent en die Grenadine  Trinidad en Tobago
Sportsoort	Krieket
Stigting	1920
Lid van	Internasionale Krieketraad
Aangesluit op	31 Mei 1926
Vastelandse beheerliggaam	IKR Amerikas
President	Ricky Skerritt
Hoof- uitvoerende beampte	Johnny Grave
Setel	St. John’s, Antigua en Barbuda
Amptelike taal	Engels
Amptelike webwerf	windiescricket.com

Krieket Wes-Indië (Engels: Cricket West Indies, afgekort “CWI”), voorheen bekend as die Wes-Indiese Krieketbeheerraad (West Indies Cricket Board of Control, WICBC) en later die Wes-Indiese Krieketraad (West Indies Cricket Board, WICB), is die bestuursliggaam wat krieket beheer in Wes-Indië, d.w.s. die onafhanklike lande Antigua en Barbuda, Barbados, Dominica, Grenada, Guyana, Jamaika, St. Kitts en Nevis, St. Lucia, St. Vincent en die Grenadine en Trinidad en Tobago, asook die oorsese gebiede Amerikaanse Maagde-eilande Anguilla, Britse Maagde-eilande, Montserrat en Sint Maarten. Die raad is by die Internasionale Krieketraad (IKR) geaffilieer en organiseer verskeie nasionale spanne, insluitend Wes-Indië se nasionale seniorkrieketspan vir mans (die Windies of Men in Maroon), vroue en jeug. Hulle is ook verantwoordelik vir die bestuur en organisasie van toets-, EDI- en T20I-reekse teen ander spanne, en vir die reëling van internasionale wedstryde tuis. Daarbenewens is Krieket Wes-Indië verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Wes-Indiese span. Krieket Wes-Indië het reeds belangrike toernooie soos die Krieketwêreldbeker 2007 aangebied.

’n Kaart van Krieket Wes-Indië se lidlande: Volle lede vertoon vet, onderlede in gewone skrif en geaffilieerde lede is kursief

Krieket Wes-Indië is in 1920 as die Wes-Indiese Krieketbeheerraad gestig en is in 1996 in die Wes-Indiese Krieketraad hernoem; sedert 2015 dra dié beheerliggaam die amptelike naam Krieket Wes-Indië. Sedert 31 Mei 1926 is Wes-Indië ’n volle lid van die Internasionale Krieketraad (IKR) en mag dus toetskrieket speel, wat na die belangrikste en vernaamste internasionale krieketwedstryde verwys.

Kinders en jongmense word reeds op skool aan krieket bekend gestel en na gelang van hul belangstelling en talent begin hul met hul afrigting. Nes ander krieketnasies beskik Wes-Indië oor ’n o/19-nasionale span wat aan die o/19-krieketwêreldbeker deelneem. Wes-Indië A is die tweede nasionale span van Wes-Indië en van hul wedstryde geniet eersterangse of A-lys-status.

Vlag

Aangesien die Wes-Indiese krieketspan ’n verskeidenheid onafhanklike lande en afhanklike gebiede verteenwoordig, gebruik hulle nie ’n nasionale vlag nie. Die Wes-Indiese Krieketraad gebruik derhalwe ’n embleem met ’n palmboom en krieketpaaltjies op ’n klein sonnige eiland. Dié embleem, op ’n maroen agtergrond, vorm die Wes-Indiese vlag. Die agtergrond het soms ’n wit baan bo ’n groen baan wat deur ’n maroen baan verdeel word, wat horisontaal deur die middel van die agtergrond loop. Voor 1999 het die WIKR ’n soortgelyke embleem met ’n koolpalm op ’n eiland gebruik, maar daar was nie paaltjies nie en pleks van die son is die sterrebeeld Jagter uitgebeeld. Dit is in 1923 ontwerp deur Sir Algernon Aspinall, die destydse sekretaris van die Wes-Indiese Komitee.

• Ontwikkeling van Krieket Wes-Indië se vlae
• 
  Vlag van die Wes-Indiese Krieketraad en -span tussen 1999 en 2017
• 
  Die Windies-vlag wat tot in 1999 gebruik is

Eksterne skakels

• (en) Krieket Wes-Indië se tuisblad