KV4
KV4 | ||
Grafkelder van Ramses XI | ||
Die plan van KV4. | ||
Ligging | Vallei van die Konings | |
Land | ||
Ontdek | Oop in antieke tye | |
Uitgrawings deur | John Romer (1978-'80) | |
← Vorige KV3 Volgende →
KV5 |
KV4 is 'n grafkelder in die Vallei van die Konings by Thebe, naby die moderne stad Luxor in Egipte. Dit is aanvanklik vir Ramses XI gebou, maar bouwerk is moontlik laat vaar en dit is nie vir hom gebruik nie. Dit is ook moontlik dat Pinedjem I beplan het om die grafkelder oor te neem, maar dat hy ook van die plan afgesien het. KV4 is die laaste grafkelder wat in die vallei gebou is en dit word algemeen beskou as 'n werkwinkel wat gebruik is tydens die aftakeling van die koninklike nekropolis in die vroeë Derde Oorgangstydperk.
Verkenning en uitgrawings
[wysig | wysig bron]KV4 is sedert antieke tye oop en graffiti uit verskillende tydperke getuig van sy gewildheid as 'n vroeë toeristeattraksie.[1] Dit het egter min aandag van geleerdes gekry totdat John Romer dit in 1978-'80 skoongemaak het.
Uitleg en inhoud
[wysig | wysig bron]KV4 is langs KV46 geleë. Dit loop tot meer as 100 meter in die heuwels in en bestaan uit drie stadigaan dalende gange wat na die putkamer lei (hoewel daar geen skag is nie) en twee onvoltooide kamers met pilare.[1] Die laaste kamer, die grafkamer, het 'n diep skag in die middel van sy vloer.[1]
Versierings was teenwoordig aan die raam en kosyne van die buitenste deur en in die eerste gang. 'n Deel van die versierings is in antieke tye beskadig en is later herstel deur Pinedjem I, wat die koning se naam met syne vervang het.[1]
Romer se uitgrawings van KV4 het vyf groepe voorwerpe onthul:
- Items met hulle oorsprong in KV62 (die grafkelder van Toetankamen). Dit dateer van die tyd toe Howard Carter uitgrawings in KV62 gedoen het.[2]
- Bewyse van Koptiese bedrywighede.[3]
- Oorblyfsels van 'n begrafnis uit die 22ste Dinastie, onder meer bene en 'n deel van 'n kis.[3]
- Gedeeltelike oorblyfsels van verskeie koninklike begrafnisse uit die Nuwe Ryk, soos fragmente van houtpanele en minstens een kis van 'n vroulike heerser uit die 18de Dinastie (moontlik Hatsjepsoet), 'n houer met die Horusnaam van Toetmoses I en Ramses II en begrafnisbeeldjies van Ramses IV.[4]
- Fondamentdeposito's van Ramses XI: Dit word verbind met die skag in die grafkamer.[3]
Verwysings
[wysig | wysig bron]- ↑ 1,0 1,1 1,2 1,3 "KV 4 (Rameses XI) - Theban Mapping Project". www.thebanmappingproject.com. Geargiveer vanaf die oorspronklike op 10 April 2009. Besoek op 26 Februarie 2018.
- ↑ Reeves, C.N., Valley of the Kings: Decline of a Royal Necropolis (Kegan Paul, 1990) pp. 81, 126
- ↑ 3,0 3,1 3,2 Reeves, C.N., Valley of the Kings: Decline of a Royal Necropolis (Kegan Paul, 1990) p. 121
- ↑ Reeves, C.N., Valley of the Kings: Decline of a Royal Necropolis (Kegan Paul, 1990) pp. 121–122
Skakels
[wysig | wysig bron]Wikimedia Commons het meer media in die kategorie KV4.
Hierdie artikel is in sy geheel of gedeeltelik uit die Engelse Wikipedia vertaal.