Yamuna

d Yamuna vorem Taj Mahall z Agra

D Yamuna (Sanskrit: यमुना Yamunā f.; Hindi: Jamna) isch e Fluss z Indie, wo im Himalaya entspringt und bi Allahabad in Ganges ineflüsst. Mitere Längi vo 1375 km isch er de längst Nebefluss vom Ganges ond am Zemmefluss gar länger ond greser als de Ganges selbscht.

D Yamuna het eri Quele bi Yamunotri am Südfuess vom Himalaya und flüüsst geg Süüde a de Städt Delhi, Mathura und Agra verbii. Si macht denn e wiite Boge geg Oste und mündet bi Allahabad in Ganges. A de Yamuna liget au Vrindavan, de hailigst Ort vo de Krishnavereerig und s Taj Mahall.

D Yamuna isch zimmli verdreckt und gelt ab de Höchi vo Delhi as e tote Fluss und d Ufer gliichet streckewiis a Müllhaldene.

Mythologii

de Vasudeva trait de Krishna öber d Yamuna

D Yamuna ghört zu de sibe hailige Flüss z Indie. De Zämefluss mit de hailige Ganga (Ganges) werd Triveni (Sanskrit: त्रिवेणी Triveṇī) gnennt, well noch de Mythologii d Sarasvati, en andere hailige Fluss, au a dere Stell mündet, wenn au im Verborgene. D Yamuna werd mengisch mit de Yami gliichgsetzt, de Zwillingsschwöster vom Totegott Yama. Ere Vatter isch de Vivasvat und d Muetter isch d Samjna.