بيكينى
| ||||
---|---|---|---|---|
هدوم | ||||
رمز يونيكود | 👙 | |||
تعديل |
البيكينى (فرنساوى: Bikini): مايوه للستات بيتلبس فى العاده على الپلاچات و بيتكون من حتتين، حته بتغطى الصدر (زى السوتيان) و حته بتغطى الحوض (زى الكلوت).
بيختلف شكل البيكينى و حجمه بيتنوع ففيه زى بيكينى بيتسمى "ثونج" (thong) او "چى-سترينج" (g-string) منتشر فى امريكا اللاتينيه. المايوه المعروف باسم مونوكينى (monokini) من البيكينى بس بيتكون من حته واحده بتغطى الحوض بس من مش سوتيان.
ظهر البيكينى لأول مره سنة 1947 على پلاچات فرنسا و اللى اخترعه فى العصر الحديث كان مهندس فرنساوى اسمه لويس رير (Louis Réard)، و سماه بيكينى على اسم جزيرة بيكينى فى المحيط الهادى كانت امريكا عملت فيها تجربة قنبله ذريه فى يوليه 1946. لويس رير كان مهندس اوتوموبيلات لكن كان بيدير بوتيك للهدوم الداخليه ملك والدته فى باريس، صاحبه مصمم الازياء چاك هيم (Jacques Heim) فصله و اعلن عنه ك "اصغر مايوه"، و ظهر البيكينى لأول فى عرض ازياء فى باريس و لبسته "ميشيلينا بيرناردينى" (Micheline Bernardini) اللى كانت رقاصة ستربتيز استعانو بيها لان المانيكانات ما رضيوش يظهرو بيه.
البيكينى رغم انكده ما بيعتبرش اختراع جديد لانه كان معروف فى الازمنه القديمه و عند و اليونانيين. بعد ظهور البيكينى فى فرنسا انتشر فى نواحى العالم و ظهر كمان على پلاچات اسكندريه فى مصر و بقى اشهر مايوه بتلبسه الستات.
لان البيكينى بيتكون من حتتين خفاف فبيعتبر مريح فى اللبس على الپلاچ و فى العوم و بالذات لما الدنيا بتكون حر. و للبيكينى اشكال متنوعه منها الميكروكينى (microkini) و ده الكلوت بتاعه صغير، و المونوكينى (monokini) و ده بيتكون من كلوت بس من مش سوتيان، و التانكينى (tankini) و ده بيتكون من حتتين لكن الحته الفوقانيه بتغطى البطن، و الچى-سترينج (g-string) و ده بيكينى عادى بس الكلوت من ورا صغير.
فى الرياضه استخدم شكل من اشكال البيكينى كزى رياضى، و من سنة 1994 بقى الزى الرسمى لڤولى بول البلاچ للستات فى الاوليمبياد و بقت بتلبسه الستات فى مسابقات العاب القوى كمان.
الچى-سترينج
الچى-سترينج (g-string) او التانجا (tanga) من مشتقات البيكينى لكن ص مش من ورا. السترينج انتشر من سبعينات القرن العشرين و ظهر لاول مره فى امريكا اللاتينيه و بالذات فى برازيل. السترينج مش اختراع حديث لان القبايل البدائيه فى انحاء كتيره من العالم بيستخدموه من عصور طويله. فى امريكا اللاتينه اتسمى الموديل ده "تانجا" و بيتسمى كده فى مناطق كتيره من العالم لكن ساعات بيتشار باسم تانجا لنوع ص مش قوى من الچى-سترينج. التانجا ظهر على پلاچات الكوباكابانا فى البرازيل سنة 1974 و لاقى نجاح لكن انتشاره فضل محدود باستمدح فى امريكا اللاتينيه.
الميكروكينى
الميكروكينى (microkini) من البيكينى و شكله ماعادا ان الكلوت بتاعه صغير. مع انه دخل عالم الازياء و الموضه لكن بيتلبس فى المجتمعات البدائيه فى كذا مكان فى العالم. اسم ميكروكينى ظهر عن طريق مجموعه من مستخدمى الانترنت فى سنة 1995. النوعيه دى من البيكينى اصلها فى پلاچ ڤينيس (Venice Beach) فى ولاية كاليفورنيا فى امريكا من سنة 1970 بعد ما صدر هناك قرار بمنع العرى على الپلاچ فظهر الميكروكينى اللى بيغطى بالظبط مناطق الجسم اللى بيمنع القانون عدم تغطيتها.
فى حوالى سنة 1975 محل مايوهات فى المنطقه لقط الفكره و صمم موديلات للميكروكينى نالت نجاح فى امريكا و انتشرت فى بلاد تانيه. الميكروكينى مايوه بين البيكينى و العرى الكامل لكن مش منتشر قوى على الپلاچات التقليديه، و فى اوروبا بيظهر على پلاچات محدوده فى اسبانيا فى جران كناريا و فورمينتيرا.
المونوكينى
المونوكينى (monokini) هو كمان من مشتقات البيكينى بس من مش سوتيان و بيتسمى كمان يونيكينى (unikini).
المونوكينى مش ابتكار جديد لكن موجود من زمان فى الثقافات الافريقيه و الپولينيزيه و غيرها لكن اول واحد صمم المونوكينى كمايوه للپلاچ كان رودى جيرنريتش (Rudi Gernreich) فى امريكا. مونوكينى جيرنريتش كان على شكل مايوه ستاتى عادى لكن مشقوق عند الصدر و بحمالات. لكن اشكال المونوكينى التقليديه المنتشره هى البيكينى من مش سوتيان و بيتسمى توپليس (topless).
التانكينى
التانكينى (tankini) عباره عن بيكينى لكن السوتيان على شكل فنله بتغطى البطن. وبكده فهو مايوه بين المايوه العادى و البيكينى. اول مره التانكينى ظهر كان فى سنة 1990.