Canne de combat
Vistimienta completa de canne de combat | |
Tamién | La Canne, Canne d'arme |
---|---|
Enfoque | Llucha con armes |
País d'orixe |
|
Fundador | Distintos |
Prauticantes famosos | Pierre Vigny |
Paternidá | Esgrima |
Deporte olímpicu | Non |
Canne de combat (“cayada de combate”) ye un arte marcial francés qu'emplega como arma una cayada o canne diseñada a costa fecha. La Canne de combat foi estandarizada nos años 1970 pa la competición deportiva por Maurice Sarry. La canne ye perllixera, fecha de madera de paganu y daqué grabada. Como proteición llévase un traxe acolcháu y una mázcara d'esgrima.
Historia
[editar | editar la fonte]La “Canne de combat” o “Canne d'arme” ye un productu de la historia y cultura de Francia. Surdió a primeros del sieglu XIX como una disciplina de defensa personal que prauticaron sobre too caballeros de l'alta burguesía en ciudaes grandes y peligroses como París. Hailos que falen d'un arte marcial francés masque na so codificación como deporte nun se permita oficialmente esta denomación. La hestoria de la disciplina ta venceyada al desendolcu de les téuniques del boxéu Savate que de primeres usaba sobre too pataes y más tarde, baxo la influyencia de los británicos, incorporó tamién puñetazos. Los burgueses entrenaos nes téuniques del Savate dominaben la cayada como una manera de lluchar dende daqué distancia, asina como’l “kick boxing” pa la distancia curtia. Los homes de ciudá llevaben cayada neto que los llabradores llevaben palu. En realidá cayada y palu taben ciñidamente asociaos en munchos países y cultures.
Les téuniques del “Savate” y la “Canne d'arme” espoxigaron en popularidá hasta’l puntu de que les usaron les fuercies militares y policiales hasta la Primer Guerra Mundial. Los millones de vides franceses perdíes na guerra llevaron a la disciplina cuasi a la desapaición. Sicasí les téuniques siguieron enseñándose nunos pocos clubes de “boxéu savate” que reabrieron nel periodu d'enteguerres y llograron sobrevivir hasta la Segunda Guerra Mundial. Sábese d'un grupu que funcionó demientres la ocupación nazi y qu'usaba téuniques de cayada pa llevar a cabu asesinatos. Les téuniques de llucha con cayada de finales de los años 1950 y nos años 1960 taben influyíes por unos pocos individuos habilidaos que les revivieron.
Deporte de defensa personal
[editar | editar la fonte]A finales de los años 1970, les téuniques de la “Canne d'arme” foron codificaes por Maurice Sarry col envís de recuperales como deporte. Esto traxo la disciplina que ta güei asociada cola “Federación Francesa de Boxéu Savate”. Xuntamente col enfoque deportivu siguen esistiendo les téuniques de defensa personal, por casu la llamada téunica “Maestru Lafond”.
Anguaño (ochobre del 2008) el deporte “Canne de combat” prautíquenlu mil “cannistes”. El “palu francés” prautíquenlu unos cientos de “bâtonniers” o “bâtonnistes”.
Usu
[editar | editar la fonte]L’usu de la cayada como arma, según s’enseñaba nes escueles d'armes, foi codificáu polos maestros del Savate en visu a que la cayada s’aprendiera como arma de defensa personal. La tradición francesa inclúi téuniques de la llucha medieval con palos, sacantes les téuniques consideraes como demasiao peligroses pa usales nel deporte. El palu medieval tamién ye un arma demasiao pesada como pa usala en competición.
Conque’l so usu perdióse y anguaño la mesma Canne de combat ta desapaeciendo. Sicasí hai una tradición marcial tresmitida pol maestru suizu Pierre Vigny nel sieglu XIX que s’emplegó pa la codificación téunica usando la cayada india a primeros del sieglu XX, formando una tradición dixebrada de la más común cayada deportiva que se ve anguaño en Francia. La cayada, usada primero de sofitu y dempués como complementu del caballeru, tamién yera un arma útil. Una cayada normal pa caminar entra davezu nes llendes de la defensa personal llegal, pero la cayada llastrada (que lleva un pesu de plomu nel cabu) pue considerase arma en dellos marcos llegales.
Regles
[editar | editar la fonte]Nel sistema francés modernu de Canne de combat deportiva, los combates tienen llugar nun ring. La cayada llévase nuna mano, pero’l competidor pue cambiala de mano a lo llargo del combate. Los cayadazos hai que los dar horizontalmente o p'abaxo, y tórguense los que vayan espetar o travesar. Les zones oxetivu son les caniyes, el troncu y la cabeza.
Namái cuenten los golpes que se dan cola cayada, y los golpes baxos tienen qu'acompañase d'un movimientu d'arremetedura. El combate gánase a los puntos darréu que la llixereza de la cayada y la vistimienta proteutora faen imposible’l “K.O”. Danse puntos al estilu, acordies colo acionao de les posiciones corporales na llucha. Penalízase’l contautu con árees torgaes como los brazos. D’esta miente ye posible ganar un alcuentru ensin solmena-y un cayadazu al contrariu, si ésti atropa penalizaciones.
Armes
[editar | editar la fonte]- La cayada ye un palu de paganu que vien en dos versiones. La primera (marcada con una llinia verde) ye más pesada y úsase pa entrenar les téuniques básiques. La usada nes competiciones y nel entrenamientu avanzáu ye más llixera (marcada con una llinia negra). La cayada más llixera ye más rápida y segura d'usar (nun se ye a mancar gravemente al oponente porque’l palu ruempe primero). El llargor de la cayada ye de 95 cm; el pesu ye de 120 gr aproximao pa la verde y de 100 gr aproximao pa la negra.
- El palu ye un arma pa remanar a dos manes, de 140 cm y 400 gr aproximao.
Partes de la disciplina
[editar | editar la fonte]La canne de combat consta d'estes partes:
- Canne: llucha con una cayada.
- Double canne: llucha con dos cayaes.
- Baton: palu.
- Canne défense: defensa personal cola cayada.
- Canne chausson: pataes de Savate combinaes con téuniques de la canne.
Canne
[editar | editar la fonte]La canne ye la parte mayor de la canne de combat. Cuando faen canne, los cannistes lleven una cayada na mano, vistimienta proteutora y mázcara d'esgrima, y tenten de llograr los máximos golpes posibles nel asaltu.
Árees que puntúen:
- Cabeza: les partes cimera, llaterales y frontal
- Troncu: solamente pa los homes
- Caniyes
Na canne hai qu'usar ataques y defenses válidos, combinaos con saltos y reblagos. Nun esiste l'ataque simultaneu, esto ye, si ún de los competidores entama un ataque l'otru tien que lu parar o esquitar, y solamente se permite contratacar dempués de defender. Pue esquitase con un pasu, un saltu o agachándose. La cayada pue llevase na mano derecha o na manzorga, y permítese (y afálase) cambiar de mano nel asaltu.
Double Canne
[editar | editar la fonte]Na double canne los competidores lleven una cayada en cada mano. Tenten de cutir con una y otra mano usando téuniques asemeyaes a les de la canne, al tiempu que bloquien y contrataquen. Les dos cayaes permiten un ataque y defensa muncho más rápidos.
Bâton
[editar | editar la fonte]Bâton refierse a téuniques con palu llargu y básase nos movimientos de la espada llarga medieval y la muleta más llarga de caminar pel campu, ampliaos colos movimientos básicos de la canne.
Canne défense
[editar | editar la fonte]Ye la defensa personal cola canne. La base son los movimientos de la canne, pero tien tamién truñazos, cuchellaes, paraes y contrataques, llaves a pescuezu y brazos, y lliberación d'agarres. Na canne défense los oxetivos nun son sólo los que puntúen, sinón cualesquier parte feble del cuerpu: el coldu, la rodiya, la cara, etc. Ta en constante desarrollu. Nun hai competición de défense, sólo téuniques en pareya.
Canne chausson
[editar | editar la fonte]La canne chausson combina les pataes del Savate con ataques de la cayada de canne.
Téuniques
[editar | editar la fonte]Ataques
[editar | editar la fonte]La canne de combat básase en seis téuniques, combinaciones, y otros elementos (saltos, reblagos, cambeos de mano).
- Brisé
- Croisé téte
- Latéral croisé ( tête, flanc, bas: cabeza, troncu, pierna/baxo)
- Latéral extérieur ( tête, flanc, bas: cabeza, troncu, pierna/baxo)
- Enlevé
- Croisé bas
Defenses
[editar | editar la fonte]La defensa pue ser de parada o d'esquite. L’esquite pue facese con un pasu, un saltu o agachándose. Pero nun esiste l'ataque simultaneu, sinón que solamente se pue contratacar dempués de defender. La lóxica de la canne nun aceuta la teoría de “llevar un golpe pequeñu al envís d'enfrentase a un golpe más grande”. Si’l competidor A entama l'ataque y, en cuenta de defendese, el competidor B tamién entama un ataque, síguese la siguiente regla:
- Si naide atota, naide lleva’l puntu.
- Si B atota, naide lleva’l puntu.
- Si dambos atoten, A lleva’l puntu (porque atacara primero).
Postures
[editar | editar la fonte]- Avant
- Arriére
- Exterieur
- Postura d'equilibriu
- Grenouille
Ataques válidos
[editar | editar la fonte]Namái se cuenten los ataques válidos. Un ataque ye válidu si se fai coles téuniques descrites más p'arriba, y si:
- El golpe fíxose col arma.
- El golpe foi claru.
- El golpe atotó nun área oxetivu válida.
- El golpe fíxose col cuartu cimeru de la cayada.
- La cayada taba en llinia cola mano.
- Nun hubo movimientu de “sable”.
Rondes y grupos d'edá
[editar | editar la fonte]- Neños de 10 a 14 años: 2 ó 3*1,5 minutos
- Rapazos de 14 a 17 años: 2 ó 3*1,5 minutos
- Mozos de 17 a 20 años: 2 ó 3*2 minutos
- Adultos de 21 a 40 años: 2 ó 3*2 minutos
- Veteranos de 41 años o más: 2 ó 3*2 minutos
Graos
[editar | editar la fonte]Empuñadura azul
[editar | editar la fonte]- El principiu
- Requisitos téunicos: equilibriu, calidá, les 6 téuniques, les 8 paraes, esquites.
- Teoría: conocimientu del arma y historia de la canne.
Empuñadura verde
[editar | editar la fonte]- Les dos manes trabayen al empar
- Tema: yo toco y nun soi tocáu
- Requisitos téunicos: fender, arreblagar y encuadrar
- Teoría: criterios de validez d'un golpe (movimientu, árees válides)
Empuñadura encarnada
[editar | editar la fonte]- La cooperación pa la oposición
- Tema: nun me toquen y yo toco
- Principiu: organización defensiva y conceutu de respuesta
- Requisitos téunicos: cambiar, sobrepasar, oponer, xestionar l'esfuerciu
- Teoría: regulación de canne de combat y bâton, comportamientu, equipamientu, obligaciones de los competidores, principios d'arbitraxe, sanciones y penalizaciones
- Permite ser aniciador
Empuñadura blanca
[editar | editar la fonte]- Produzse la confirmación
- Tema: toco primero de que me toquen
- Principiu: anticipación
- Requisitos téunicos: diagrama de comportamientu, secuencia tresnada pa una demostración, interiorización de la práutica (güeyos zarraos)
- Teoría: el cartafueyu de xuez/árbitru, les categoríes d'edá y los distintos tipos de competición
Empuñadura mariella
[editar | editar la fonte]- Empuñadura del llogru
- Tema: molesto pa tocar
- Principiu: enguadu
- Requisitu téunicu: trabayar a una cayada, cayada doble y palu
- Teoría: tener el diploma de xuez/árbitru rexonal, participar nos distintos alcuentros oficiales y semioficiales
- Permite ser instructor
Referencies
[editar | editar la fonte]Enllaces esternos
[editar | editar la fonte]- Sitiu web oficial de la Federación Internacional de Savate
- Cambridge Academy of Martial Arts
- Savate World Archiváu 2017-10-07 en Wayback Machine
- Federación de Savate de los Estaos Xuníos
- Sitiu húngaru d'un Club de Canne de Combat
- Un club húngaru de La Canne Archiváu 2010-04-14 en Wayback Machine
- Canne de Combat n’Islla Reunión, Mauriciu y Madagascar
- Rede de clubes de Burdeos Archiváu 2011-08-13 en Wayback Machine