San Marins (miests)
San Marina miests (italėškā: Città di San Marino) - San Marina Respoblėkas suostėnė. Išsidiestes Apeninū posiasalie, netuolėj Adrėjes jūras. 4493 prietėlē (2003). Išsidiestės unt Titana kalvuos. Miesta ižimībes: vėriausībes rūmā ((Palazzo dei Capitani), Ruotošė (Palazzo Pubblico), trīs sargības buokštā (Guaita, Cesta, Montale). Do kartus per metus - kuovė ė spaliė - miestė vīkst karėnē paradā šalėis vaduovū (regėntū) išrėnkėma pruogo.
Guaita tvėrtuoves papėdie īr Borgo Maggiore mėstielis, katrū su suostėnė jung 1,5 km ėlge funikulierios. Miestė īr kapucinū bažninčė, Šv. Prancėškas Asižietē katedra (San Marina vīskopėjės bažninčė), kuongresā rūmā ė idomībiū moziejos.
San Marinė gerā išvīstīts torizmos, kuožnas metas čė apsilonka vėrš 3 mln žmuoniū. Čė gauso kreutuvieliū, katruos pardavinie ėvairiausius sovenīrūs.
Gėlžkėlis bova pastatīts da prieš Untūj pasaulini kar, B. Musolėne laikās (ruožos Rimini-San Marins). Išlėkė i senė gelžkele sotieliū pastatā. Artėmiauses susisėkėmou īr autuobusā, tep pat lig Rimini.