Soizbuag

Der Artikl is im Dialekt Ståd-Såizburgarisch gschriem worn.

Då siacht ma vom Kapuzinaberg af d'Åidståd, dés an da Såizåch is da Rudoifskäi.
Soizburg



Basisdàtn
Bundeslånd:	Såizburg
Politischa Bezirk:	Statutarståd
Grichtsbezirk:	Soizburg
Autokennzeichn:	S
Flächn:	65,678 km²
Leid:	147.571 (1. Jenna 2010)
Leid in da Agglomarazion:	210.000 (Stond: 2006)
Leid pro Quadràtkilometa:	2274
Hechn:	424 Meta üwa da Àdria
Sunstige Dàtn
Postleitzåi:	5020
Vorwåi:	0662
Gemeindekennziffa:	50 101
Geogràfische Låg:	Koordinaten: 47° 48' N, 13° 02' O 47° 48' N, 13° 02' O
Adress vom Magistràt:	Mirabellplatz 4 5020 Salzburg
Intanetseitn:	www.stadt-salzburg.at
E-Mail-Adress:	[email protected]
Politik
Burgamàsta:	Schaden Heinz (SPÖ)
Partein in da Regierung:	SPÖ (2 Leid), ÖVP (2), Bürgalistn (1)
Gemeinderåd (40 Leid, létzte Woi 2009):	15 SPÖ, 11 ÖVP, 7 BL, 5 FPÖ, 2 TAZL & BZÖ ^[1]

Soizburg (Hochdeitsch: Salzburg) is de Hauptstod vo dem östareichischn Bundeslånd, wos à Såizburg hàßt. Gemeinsom mid'n Bezirk Såizburg-Umgéwung is's da Flåchgau, da nördlichste vo de fünf Gaue vom Lond Soizburg. In da Stod Soizburg wohnan 147.571 Leid (Stond vom 1. Jenna 2010); damid is s'de viertgresste Stod vo Östareich (noch Wean, Gràz und Linz). In da gonzn Stodregion (Agglomarazion) sand's zirka 210.000 Leid.

Soizburg hod a Einzugsgebiet, wos üwa de Grenzn vom Bundeslond auße geht. Da Südostn vo Bayern, da Südwestn vo Owaöstareich und da Nordwestn vo da Owasteiamårk ghern do à dazua. Soizburg is a Uniståd (drei Unis) und des Zentrum (Owazentrum, sogn de Raumplàna) vo da Euregio Soizburg - Berchtsgåna Lånd - Draûstâ.

Vüi Leid sogn "Mozartståd" zu Soizburg, wei dort da Mozart Wolfgang Amadeus af d'Wöid kumma is und mehr ois wia d'Höiftn vo sein Lém do vabrocht hod. Soizburg is à d'öidaste Ståd im heiding Östareich; seid Ãfong vom 12. Johrhundat hods an Stodrichta gém. D'Soizburga Oidstod mid ihra berühmtn barockn Archidektur, de wos an italienische Stéd erinnad, is àne vo de am béstn erhoitanen Oidstéd im deitschproching Raum und seid 1997 Wöidkuiturerbe. Intanazionàl bekonnt is's à ois Schaublotz vo dem Musical und Füim Sound of Music, wéng de Såizburga Féstspüle und wéng da Log am Rond vo de Åipm.

Geografie

Da Gaisberg vom Leopoidskrona Weiha aus gseng

D'Erhardkirchn und da Stådteu Nonntåi vom Féstungsberg åwa fotografierd

Då siacht ma vom Miraböigårtn af d'Féstung auffi.

Soizburg liegt am Nordrond vo de Åipm, ungefähr 150 Kilometa östlich vo Minga und 300 Kilometa westlich vo Wean. D'Stod is im Såizburga Beckn, ungefähr 25 Kilometa nördlich vom Tennangebirg, auf olle zwà Seitn vo da Såizåch. De Soizoch und de Stodberng midn Woid drauf mochn vüi vo dem aus, wia Soizburg ausschaud; Soizburg is nämli ane vo de greâstn Großstéd in Europa. De Stodberng sand da Kapuzinaberg, da Mönksberg, da Féstungsberg und da Rainberg. Af'm Féstungsberg is de Féstung drauf, dés is de gresste mittlåitaliche Burg vo Europa, de wos nu ois a gonza dahoitn is. Außadem gibt's im Stodgebied nu in Morzga Hügü, in Höibrunna Berg und in Grofnhügü in Liefaring.

Im Südwestn vo da Stod, wo's noch Berchtsgån umme geht, is da Untasberg (1.853 Meta hoch), üwa den se de Soizburga à vüi Sogn vazöhn. Im Ostn an da Stodgrenz is da Gaisberg (1.288 Meta), und weida im Ostn sand's netta a bor Kilometa bis ins Såizkåmmaguad. Noch Nordn is es Soizburga Beckn offn, do sand donn de Soizochauen und de glàn Hügün vom Flochgau. Da nächste vo de Hügün bei da Stod is da Plainberg, do is de Woifohrtskirchn Maria Plain om drauf, und vo dort oman siacht ma guad af d'Stod owe. Direkt im Nordwestn vo da Stod is de Sålåch, de wos à de Grenz is zur Nochbastod Freilassing, und de ghert scho zu Bayan, genaua gsogt zum Londkreis Berchtsgona Lond.

Stådteile

D' Stod gliedat si unobhängig vo d' historischn Katastràlgemeindn, vo denan d' Grenzn in dé meistn Fälle néd mehr dakennbor san, in 24 Stådteile und drei ongrenznde Londschoftsräume.

Den historischn Kern vo da Stod Soizburg büidet d' Åidståd, dé si on d' oidn, bis ins Mittloita zruckreichndn Vurstéd Müin und Nonntåi oschliasst. Vor und noch 1900 is im Westn vo da Oidstod da Stodteil Riednburg entstondn. Auf'm Gebiet vo d' obgrissanen rechtsufring Bastionen und dé durting Kasernen, hod si as Andrävierdl büidt. Nördlich dovo, vor 'm nein Hauptbohnhof, is da Stodteil Elisabeth-Vurståd (Froschhoam) entstondn. Im Nordteil vo Müin is da Stodteil Léhn gwochsn.

D' Stodteile Aing, Parsch, Itzling und Gneis hom sé im Wésntlichn noch 1900 entwückét. A spädare Erweitarung vo da Stod stöid da Siedlungsstreifn vo da Moosstrossn in Léopoidskron-Moos dor. D' einsting söibständing Vororte Maxglân im Westn, Liefaring im Nordwestn, Gnigé im Ostn und Morzg san in da Zwischnkriagszeid zua Stod kumman. Noch 1950 san ois jingste Siedlungskerne vo da Stod dé Teile Josefiau, Herrnau und d' Åipnsiedlung entstondn. À d' Stodteile Långwied, Kàsan, Daxhåm und Schåimoos san in da Mittn vom 20. Johrhundat entstondn. Isoliert liegt im Nordn ois jingara Siedlungssplitta da Stodteil Itzling-Nord, der si nohtlos on an Siedlungsraum vo da Gemeinde Berghoam oschliasst. Südlich vo Gneis lieng d' émfois jungen klânen Siedlungen Eichethofsiedlung und d' Birknsiedlung. Beide san untam Nomen „Gneis-Süd“ zsommgfosst. Südlich vom Flughofn befindt si da Stodteil Maxglân-West, zua dém d' Kendlasiedlung und d' klânaren Haisagruppn Pointing und Loig ghern. D' Kendlasiedlung sétzt si in dé scho zur Gemeinde Wåis-Siaznhoam gherendn Haisan vo da Glânsiedlung fort. D' Haisagruppn Pointing und Loig schliassn si ons Woisa Hümméreich on. Aussahoib vo dé Siedlungsraime lieng im Stodgebiet vo Soizburg d' gschlossenen Londschoftsraime Höibrunn, Goasberg und da Haiberg.^[2]

Katastràlgemeindn

Soizburg is in 14 Katastràlgemeindn aufteilt:

Aing I
Berghoam II
Gnigé
Goasberg I
Haiberg I
Hoiwong II
Itzling
Leopoidskron
Liefaring II
Maxglàn
Morzg
Soizburg
Siaznhoam II
Wois II

Da Nom vo d' Stodteile ois funkzionelle Einheit entspricht in da Grenzziehung dé gleichnoming Katastràlgemeindn, vo dénen d' Grenzn grossteils im friahran 19. Johrhundat féstglégt worn san. D' Bezeichnung Aing I besogt, dass d' einstige Gemeinde Aing zum gresstn Teil in d' Stod Soizburg eingemeindet worn is. Da vableibende klânare Teil is in d' Johr 1935 und 1939 unta da Bezeichnung Aing II ois eigene Katastràlgemeinde da Nochbagemeinde Öisbethn zuateilt worn.^[2]

Nåchbagemeindn

Freilassing	Berghoam	Håiwång
Wåis-Siaznhoam		Koppé
Grödig	Ànif	Öisbethn

Eîgmeindungen im 20. Jåhrhundat

Am 7. Juni 1935 hod da Soizburga Låndtåg s'Gsétz üwa d'Erweitarung vom Gebied vo da Londeshauptstod bschlossn. In Kroft dre'n is dés scho am 1. Juli vom gleichn Johr. Damid san de Gmeindn Maxglàn und Gnigü-Itzling fost ois a Gonza und Deile vo Aing, Morzg, Sieznheim, Leopoidskron, Bergheim und Hoiwong zur Stod dazuakumma. D'Ãgstöidn und de Grundstückün vo de Gemeindn Maxglàn und Gnigü-Itzling hod d'Stod üwanumma, owa à eanare Schuidn, und dés wor fir de zwà ormen Orwatagemeindn à de âzige Möglichkeid, dass s'néd finanziell zsommbrochn san. Durch de Eîgmeindungen is domois d'Eîwohnazoi vo Soizburg vo 40.232 af 63.275 Leid gstieng und d'Flächn vo 8,79 af 24,9 Quadràtkilometa.

A zweite Phase vo Eîgmeindungen wor donn am 1. Jenna 1939. Do san Aing, Liefaring, Leopoidskron und Morzg ois a Gonza und Deile vo Anif (nämli Höibrunn), Bergheim, Hoiwong und Wois zum Stodgebied dazuakumma. In da Stod hom dadurch 77.170 Leid gwohnd. Im Johr 1950 hods an Dausch gém, do is des Gebied vom Schlochthof, wos vorher zu Bergheim gherd hod, zur Stod kumma und dafir da Plainberg, der wos owa vüi gressa is, zruck zu Bergheim. Seitdem hod si nix mehr g'ändat und s'Stodgebied is 65,67 Quadràtkilometa groß.

Olle zwà Eîgmeindungen hom oiso unta autoritäre Regime stodgfundn. Trotzdem worn s'guad begründet - noch 1945 hod kàna an Eîspruch dagéng eîglégt. Erscht im Johr 1990 hod si d'Gemeinde Anif beschwerd, dass da Schlosspark vo Höibrunn zur Stod kumma is. Owa nochdem der eh scho seid 1920 im Eingdum vo da Stod wor und sunst da Komplex vo Höibrunn gemeindemäßig deud worn war, is de Zruckfordarung ogléhnt worn.

Dé Gemeindn Wois-Sieznheim und Bergheim im "Spéckgirtl" vo Soizburg ghern zwar infraschtrukturmäßi scho long zum Stodgebied, und de Raumordna fordern à, daß s'eîgmeindt wern, dés hod owa nu kàna politisch durchsétzn kinna bis jétz. Dadurch gibt's im Bollungsraum oiwei gressane Probleme: Af da àn Seitn gibt's oiwei wenicha freie Baugrundstickün und af da ondan Seitn gengan imma mehr Gewerbebetriewe in d'Umlondgemeindn (oda nu weida wég), wei Grundstickü zan Ausbaun in da Stod z'deia worn san. Dadurch nimmt d'Stod wenicha Steian eî, und s'Ungleichgwicht zwischn de Finanzprobleme vo da Stod und de reichn Spéckgirtlgmeindn im Umlond wird oiwei ärga. Außa Wois und Bergheim betrifft dés à nu Ànif, Öisbethn, Håiwång, Eugndorf, Grödig und Deile vo Koppü.

Euregio Såizburg - Berchtsgåna Lånd - Draûstâ

Soizburg is direkt an da boarischn Grenz, und desweng hängt's zwecks Vakehr und Wirdschåft eng mid'n boarischn Grenzgebiet zsomm, bsondas mid de Londgreise Berchtsgona Lond und Draûstâ. Zum Beispüi gehd de schnöiste Stroßnvabindung vo da Stod Soizburg in Pinzgau üwa Båd Reichnhåi (dé Stréckn nennd ma à s'Glàne Deitsche Éck). Wirdschoftli hängan bsondas de Stéd Freilassing und Bod Reichnhoi mid Soizburg zsomm. Desweng gibt's seid 1995 de Euregio Soizburg - Berchtsgona Lond - Draûstâ. In dem Gebiet wohnan zsomm zirka 700.000 Leid.

Leid

Då siacht ma vo da Féstung af'n Dom und af d'Åidståd.

Leid im heitign Stodgebiet

Johr	Leid
1869	27.858
1880	33.241
1890	38.081
1900	48.945
1910	56.423
1923	60.026
1934	69.447

Johr	Leid
1939	77.170
1951	102.927
1961	108.114
1971	129.919
1981	139.426
1991	143.978
2001	142.662

Wéng de Eîgmeindungen in de Dreißgajohr is domois de Bevöikarung vo Soizburg vo 40.000 Leid auf 77.000 auffigonga. An ziemichn Boom hod's donn glei nochm Zweitn Wöidgriag gem, do homd de Amerikàna gonze Siedlungen fir de GIs aus'm Bon gstompft, zum Beispüi de General-Keyes-Siedlung. Außadem hod's an großn Ãsturm vo Flüchtlinge gém, vor oim vo Voiksdeitsche. Dé homd zerscht in Barackn gwohnd, sand owa in de neichn Siedlungen umzong, nochdem de Amerikàna wégga worn. Seid ungefähr 1950 is Soizburg a Großståd, wei's üwa 100.000 Leid hod. Firs Johr 2007 liegt de Zoi vo de Eîwohna bei 150.269 Leid (mid Hauptwohnsitz).

Da Fraunonteu in Soizburg liegt bei 53 Prozent, da Onteu vo de Auslända is bei 21 Prozent und damid da hechste vo olle östareichischn Londeshauptstéd. Vo da Oitasstruktur her san 13 Prozent vo de Soizburga unta 15 Johr oid, 63 Prozent san zwischen 15 und 60 Johr, und 24 Prozent san 60 Johr oid oda öida. Zu de 150.000 Leid mid Hauptwohnsitz kumman in Soizburg nu 17.000 Leid mid Némwohnsitz dazua.^[3]

Gschicht

Da Friedhof vom Klosta Sånkt Beda; des wår s'erschte Klosta üwahaupts nördli vo de Åipm.

Kårtn vo Östareich-Ungarn (1867 bis 1918). S'Herzogdum Såizburg is Numma 10.

Mehr dazua findst im Hauptartikü: Gschicht vo da Ståd Såizburg

Seid da friaran Jungstâzeid (umma 4500 vor Gristus) gibts in Soizburg scho Siedlungen. De Röma homd im Johr 15 vor Gristus des Gonze zu ana Stod gmocht. Iuvavum hom s'as gnennt. Nochdem de Doanagrenz vom Römischn Reich zsommbrochn wor, is d'Stod ziemli zgrundgonga. Noch da Vöikawåndarung hod Soizburg long zu de Bajuwarn und damit donn à zu Bayan gherd. Im Johr 699 is Soizburg Bischofssitz worn und wor am Ãfong firs gonze boarische Herzogdum zuaständig. Im Johr 755 hom d'Leid zum erschtn Moi in Nomen Såizburg vawendt. Seid'n Johr 798 is Soizburg a Erzbistum.

Im Hochmittlåita is Soizburg longsom unobhängi worn vo de Bayan. Im Johr 1328 is Soizburg a eigena Stååd im Heulign Römischn Reich worn. In de Johr 1348 und 1349 sand ungefähr a Drittl vo de Leid in Soizburg an da Pest gstorm. Im Baungriag hod's 1525 an großn Aufstond vo de Baun und de Bergleid gengan Erzbischof gém. Der Aufstond hod drei Monad dauad, und de Baun homd sogor d'Stod eîgnumma und d'Féstung belogad, owa es hod eana nix gnutzt.

S'17. Johrhundat wor prägt vo drei Erzbischef, unta denan Soizburg af da Hechn vo seina Mocht ãkumma is: im Wolf Dietrich vo Raitenau, im Markus Sittikus Gråf vo Hohnems und im Paris Gråf vo Lodron. Domois is de berühmte Barockarchitektur entstondn, und à d'Soizburga Uni is gründt worn. Im Johr 1731 san olle Protestantn aus da Stod vadriem worn. Im Johr 1756 is da Mozart Wolfgang Amadeus in Soizburg af d'Wöid kumma. Am Ãfong vom 19. Johrhundat hom s'as Heulige Römische Reich zuadrahd, und do sand de Erzbischef ois Herrscha vo Soizburg ogsétzt worn. Im Johr 1816 is Soizburg zu Östareich kumma. Am 29. Mai 1921 hom si d'Soizburga in ana Voiksobstimmung mid 99 Prozent fir'n Onschluss ans Deitsche Reich ausgsprochn^[4]. Dés is owa donn néd gmocht worn.

Im Johr 1938 san in Soizburg deitsche Druppn eîmarschierd. Glei am Ãfong vo da Nàzidiktatur in Östareich hom s'af'm Residenzblotz Biacha vabrennt und vüi Judn und politische Gegna vahoft. In Maxglàn hom s'a Konzentrazionslåga fir Zigeina eîgricht, de wos donn ois Zwångsårwata in Soizburga Industriebetriewe hackln miaßn hom^[5]. 1944 und 1945 hom d'Amerikàna 15 Moi Soizburg aus da Luft ãgriffn. Noch'm Zweitn Wöidgriag san a Riesnhaufn Leid ohne Hoamad ("Displaced Persons", DP), Judn und Voiksdeitsche noch Soizburg und in d'Umgéwung kumma. D'Amerikàna hom mid'n Marshallplàn vüi Hüifsgöida noch Soizburg brocht und à mid eanare privàtn Ausgom midghoifn, dass si d'Stod wirtschofdli schnöi erhoid hod.

Politik

S'Schloss Miraböi in da Neiståd is da Sitz vom Burgamàsta, vo da Stådtregierung, vom Gemeinderåd und vom Magistràt.

Burgamàsta vo da Stod Soizburg is seid'n Johr 1999 da Schaden Heinz vo da SPÖ. Seine Stöivadreta san da Preuner Harry vo da ÖVP und da Huber Josef vo da SPÖ. De ondan zwà Stodträte in da Stodtregierung san nu da Panosch Martin vo da SPÖ und da Padutsch Johann vo da Bürgalistn.

Bis in de zweite Höiftn vom 20. Johrhundat wor d'Stod eha konsavativ prägt. Erscht im Johr 1914 is da erschte Soziàldemokràt in Gemeinderod kumma, da Preußler Robert wor des. Nochm Zweitn Wöidgriag hom de Amerikàna in Hildmann Richard ois provisorischn Burgamàsta wieda eîgsétzt, der wos scho vo 1935 bis zum Ånschluss 1938, untam Schuschnigg-Regime, Burgamàsta gwén is. Owa seitdem dominierd in da Stod Soizburg meistns d'SPÖ. Seid 1999 gibt's à in Soizburg de Direktwoi vom Burgamàsta.

À de Grünbewegung is in Soizburg vagleichsweis imma sehr stork. Am End vo de Siebzigajohr hod si a Bürgalistn géng d'Vabauung vom Grünlond im Südn vo da Stod eîgsétzt, und de san donn min Voggenhuber Johannes an da Spitzn glei af Onhieb in d'Stodregierung einikumma. Dés wor de erschte politische grüne Gruppierung in Östareich. Bis heid nennan si de Grünen in da Stod Soizburg "Bürgalistn" und san in da Stodregierung.

Listn vo de Burgamàsta nåch'n Griag

Gemeinderodswoi vom 7. März 2004
ÖVP	17.250	27,4%
SPÖ	27.565	43,78%
FPÖ	6.448	10,24%
BL	9.508	15,1%
LIS	641	1,02%
D92	530	0,84%
KPÖ	1.019	1,62%

1945–1946: Hildmann Richard (ÖVP)
1946–1951: Neumayr Anton (SPÖ)
1952–1957: Pacher Stanislaus (SPÖ)
1957–1970: Bäck Alfred (SPÖ)
1970–1980: Salfenauer Heinrich (SPÖ)
1980–1990: Reschen Josef (SPÖ)
1990–1992: Lettner Harald (SPÖ)
1992–1999: Dechant Josef (ÖVP)
1999- : Schaden Heinz (SPÖ)

Wåppm

S'Wåppm vo da Stod Soizburg is im rodn Föid a gezinnte Stodmaua, wo in da Mittn a Stodtor mid offane Torflügü und an auffizongan Foigitta is, und drüwa a glàna Turm mid zwà Fensta. De Seitndeile vo da Maua hom a jéda a Schiaßschortn. Hinta da Maua sand drei Tirm mid mehrane Stég, de wos olle drei mid an goidanen Spitzdoch déckt san. Da mittlare Turm is ochteckig und a weng hecha ois wia de ondan, und ma siachd drei Wänd davo. A jéde vo de drei Wänd herd om mid an Güwü af, drunta is a Güwüfensta, drunta a âfochs Fensta und im untan Stog zwà Fensta. De zwà Tirm af da Seitn san rund; im owan Stog hom s'a jéda â Fensta, im untan zwà. D'Mauan san süwa oda weiß.

Ném an Woppm hod d'Stod Soizburg à nu a Fahne in de Stodform - dés sand Rod und Weiß.

Såchn, de wås ma si ãschaû soit

D'Såizburga Åidståd vom Mönksberg aus gseng

Mehr dazua findst im Hauptartikü: Sengswürdigkeitn vo da Ståd Såizburg

Soizburg is a sehr beliebts Züi fir Touristn vo da gonzn Wöid. An Spitzndoge hoidn si in da Stod weid mehr Touristn af ois wia Heimische. D'UNESCO, dés is d'Organisazion fir Büidung, Wissnschåft und Kuitur vo de Vaeintn Nazionan, hod am 5. Dezemba 1996 de gonze Soizburga Oidstod (inklusive Linza Gossn, Bergstroßn, Neistod, im Aißan Stâ, im innan Nonndoi, im innan Müin, im Mönksberg und im Kapuzinaberg) auf d'Listn vom Wöidkuiturerbe afgnumma. D'Oidstod is, vor oim wéng ihra Barockarchitektur mid de vüin Kirchn, ois a gonze âzigortig. De wichtigstn Architektn worn da Scamozzi Vincenzo und da Scolari Santino.

A bor vo de wichtigan Sengswürdigkeitn in da Oidstod:

S'Stift Sånkt Beda vo de Benediktina is as öidaste Klosta vom deitschsproching Raum, wos's oiwei nu gibt.
D'Féstung Hohnsåizburg is àne vo de gresstn Burgånlång in Europa insgesomt und de gresste, de nu voi dahoitn is.
A Highlight vo jéda Soizburg-Tour is à da Såizburga Dom Sånkt Rupert und Virgil. Da heidige Bau stommd aus de Johr zwischn 1611 und 1628 und wor de erschte Barockkirchn nördlich vo de Oipm.
Nu vüi mehr Touristn siagst owa in da Getreidegåssn. Dés wor scho long de wichtigste Stroßn vo de Soizburga Kaufleid; und außadem is in dera Stroßn's Geburtshaisl vom Mozart Wolfgang Amadeus.
S'Museum vo da Moderne af'm Mönksberg schaud aus ois wia a weiße Schuachschochtl aus Marmor, und damid is's a ortnlicha Géngsotz zur Oidstod drunta.

À außahoib vo da Oidstod gibt's a bor Attrakzionan:

Gonz im Südn am Stodtrond vo Soizburg is as Schloss Höibrunn mid de berühmtn Renaissance-Wossaspüle, an großn Park, an glàn Bergal mid'n Monadsschléssl und an Stâtheata om drauf und im Soizburga Zoo. Vo da Oidstod bis zum Schloss Höibrunn gehd durch a Londschoftsschutzgebied d'Höibrunna Allee, de öidaste imma nu dahoitane Allee af da Wöid.
Zum Rokoko-Schloss Leopoidskron direkt am Leopoidskrona Weiha kumman oiwei vüi Touristn hî, wei's àna vo de Hauptschauplätz in dem Füim Sound of Music wor, der wos Soizburg in da gonzn Wöid nu amoi mindestns so berühmt gmochd hod ois wia da Mozart.
In Hangar 7 am Flughåfn mid seina onspruchsvoin modernan Glosarchidektur hod si da Mateschitz Dietrich, da Chef vo Red Bull, ois sei persönliche Schotzkomma mid an Haufn oide und neiche Flugzeig hîstöin lossn.

Kuitureîrichtungen

Mehr dazua findst im Hauptartikü: Kuitureîrichtungen in da Ståd Såizburg

D'wichtigste Kunstvaonstoitung in Soizburga san de Féstspüle mid Konzerte, Opern und Theata, de wos jéds Johr im Juli und August vüi intanazionàle Gäst ãziang. Gründt worn san s'im Johr 1920 vom Reinhardt Max und vom Hugo vo Hofmannsthal. Dazua gibt's seid 1967 ois Ergänzung de Ostaféstspüle; dé hod da Herbert vo Karajan gründt. Do wird jéds Johr a neiche Oper vorgstöid, und a bor Konzerte gibts à. Spüin dan d'Berlina Philharmonika. Seid 1973 gibt's à nu Pfingstféstspüle. De gonzn Féstspüle findn zum Großdeu in drei Haisa in da Oidstod stott, de wos ma à in Féstspüibezirk nennd. Architekt wor da Holzmeister Clemens, der wos oide barocke Bautn midvawendt hod. Und zwar san des:

S'Große Féstspüihaus
D'Föisnreitschui
S'Haus fir'n Mozart (friara Glàns Féstspüihaus)

Säle fir Theata und Konzerte gibt's in da Stod ungefähr a Dutznd. In da Touristnsaison (oiso fost imma) gibt's jén Dog klassische Konzerte, wo meistns Werke vom Mozart Wolfgang Amadeus gspüid wern. Owa à Vaonstoitungsorte fir moderne Musi gibt's a bor.

Ins Museum kã ma à ausgiewig geh. Dabei gehd d'Palettn vo da Naturwissenschaft üwa d'Voikskuitur und d'oide Gschicht vo Soizburg bis hî zur modernen Kunst, zum Beispüi im Museum vo da Moderne am Mönksberg om.

Künstlarisch onspruchsvollare Füim und Retrospektivn komma si jén Dog im Füimkuiturzentrum DAS KINO ãschaun. Jén Herbst gibts außadem a intanazionals Bergfüim-Festival. Außadem gibts in da Stod Soizburg nu drei normàle Kinos, wo de Hollywood-Sochn rennan.

Glaum

Mehr dazua findst im Hauptartikü: Glaum in da Ståd Såizburg

Soizburg is prägt vo da katholischn Kirchn ois wia kâ ondane östareichische Londeshaupstod néd. Dés is déswéng a so, wei's in Soizburg bis am Ãfong vom 19. Johrhundat, oiso bis zum End vom Soizburga Fürsterzbistum, kâ Trennung gém hod zwischn da Kirchn und im Stååd, wei jo d'Erzbischef gleichzeiti geistlichs Owahaupt und Stoodsowahaupt gwén san. Erscht in da zweitn Höiftn vom 20. Johrhundat, vor oim durch Griag, durch Vadreiwung und Eîwondarung, is's donn dazua kumma, daß's heidzdog mehr vaschiedene Glaumsrichtunga gibt in Soizburg.

De Katholikn san mid 56 Prozent vo de Stodbewohna oiwei nu de gressane Glaumsgruppn in Soizburg. Zur evangelischn Kirchn ghern ungefähr siem Prozent vo de Stodinga. Fünf Prozent vo de Leid san orthodoxe Gristn. Siem Prozent sand Muslime, da Islàm is damid de gresste Glaumsgemeinschoft außahoib vom Gristndum. 17 Prozent vo de Soizburga hom gor kâ Religion, bei siem Prozent wàß ma néd, wos de fir Glaumsbekenntnis hom.

Freizeid

D'Månnschåft vo da Såizburga Austria beim Spüi géng d'1b vo Seekircha im Herbst 2006

De Spüla vom EC Red Bull Såizburg in Akzion

S'Stadion fir d'Fuaßbåi-Europamàstaschåft 2008

Da Leopoidskrona Weiha mi'n Schloss Leopoidskron und da Féstung im Hintagrund

D'originàln Såizburga Mozartkugün vo da Konditorei Fürst am Åi'n Mårkt

Sport

Da öidaste reine Sportklub im Soizburga Lond is da Såizburga AK 1914 in Nonntoi. Owa es gibt nu a bor Turnvareine, de wos nu öida san: in Såizburga Turnvarein (1861), in Maxglàna Turnvarein (1902) und in Amateur-Turn- und Sportvarein (ATSV) Såizburg (1912). In Årwata-Sportklub (ASK) Såizburg gibt's seid 1922 in Maxglàn. Ois Orwatavarein wor a zwischn 1938 und 1945 aufglöst.

In Fuaßbåivarein SV Austria Såizburg gibts seid 1933, er spüit tradizionell in Violett-Weiß und is da Varein mid de meistn Fans in da Stod, obwoi a grod erscht in d'zweitlétzte Liga afgstieng is. Dés kummt daher, wei da Varein midsomt Lizenz im Johr 2005 vo Red Bull kauft worn is und Form, Woppn und Nom vom Varein g'ändat worn san. Da FC Red Bull Såizburg sitzt heid im Vorort Wåis-Sieznheim und spüid in da Bundesliga; in SV Austria Soizburg hom de violettn Fans neich gründt und damid in da létztn Spüiglass neich ãgfonga.

A guada Eishockeyvarein is da EC Red Bull Såizburg (gründt 1977 ois Såizburga EC), der wos 2007 in östareichischen Meistatitl erreicht hod; de Dàmenmonnschoft, de Ravens Såizburg, san scho 2006 Meista worn. Beim American Football hom im Johr 1984 de Såizburg Lions in ollaerschtn östareichischen Meistatitl ghoid; heid hàßn s'Såizburg Bulls und spüin in da zweitn Liga.

Große Sportvaonstoitungen hod's bis jétz in da Féstspüistod weng gém. Im Johr 2005 wor as erschte Moi da Såizburg-Marathon, der wos à durch d'Oidstod durchgehd. 2006 wor de Stråßn-Ràdlwöidmàstaschåft in Soizburg und in da Umgéwung mid mehr ois wia 330.000 Zuaschaua. Bei da Fuaßbåi-Europamàstaschåft 2008 wern draußn im Kleßheima Stadion (gherd zu Wois-Sieznheim) drei Gruppmspüle seî.

Fir's Johr 2014 häd si Soizburg um d'Olympischn Wintaspüle beworm. Dé Entscheidung am 4. Juli 2007 beim IOC-Kongress in Guatemala City hom d'Soizburga owa géng Sochi in Russlånd und Pyeongchang in Südkorea (zweita Blotz) in da erschtn Runde valorn. Soizburg wor à scho Candidate City fir Olympia 2010 und hod do à in da erschtn Runde géng Vancouver in Kanada und géng Pyeongchang (scho amoi zweita Blotz) valorn.

Seidn Johr 1999 is Soizburg da Sitz vo da Intanazionàln Biathlon-Union.

Låndschåfts- und Naturschutz

In Soizburg gibts ois zsomm 41 Naturdenkmäla (meistns stottliche oide Einzlbàm), 39 Gschützte Londschoftsdeule, ocht Londschoftsschutzgebiete und â Naturschutzgebiet, nämli s'Hammaraua Moor. Dé ocht Londschoftsschutzgebiete sand:

da Plainberg (do gherd owa netta a gonz a glàna Deu zur Stod Soizburg),
da Kapuzinaberg,
da Mönksberg und da Rainberg,
Soizburg-Süd,
s'Leopoidskrona Moos,
da Leopoidskrona Weiha,
da Soizochsee und da Solochspitz und
d'Aigna Au.

A bor vo de wichtigsten Gschütztn Londschoftsdeule sand:

d'Höibrunna Allee,
d'Kopfwein am Oimkanàl (Bàm, de wos's sunst londesweid nirngs gibt),
d'Föisnsteppn am Rainberg (a Drocknbiotop am Südhong),
des Sama Mösl (a Moorrest, der wos si guad dahoidn hod),
da Anifa Oitaboch (a sehr naturnoha Bochlauf),
d'Itzlinga Au,
da Kühberg,
s'Naturwoidresavàt Rainberg und
s'Naturwoidresavàt Gaisberg (dés sand ois sehr naturhohe Wöida).

Såizburga Schmankal

Bosna
Mozartkugün
Såizburga Nockal

Nåchtlém

S'Nochtlém in Soizburg spüid si zum Großdeu in da Oidstod o, genaua gsogt vor oim am Rudoifskäi, rund uman Anton-Neumayr-Blotz und in de Bars hintam Platzl af da ondan Seitn vo da Soizoch. Gém duads dortn vor oim Irish Pubs und Cocktailbars. Beim Bohnhof gibts seid a bor Johr a Urban Entertainment Centre mit Kinos, Diskos und Bars, wos si city center nennd. So wos Ähnlichs gibts à im Airportcenter beim Flughofn draußn, owa dés gherd scho zu Wois-Sieznheim.

Voiksféstln

Jéds Johr amoi im Somma findt am Messegelände draußn a großes Voiksfést stott, d'Soizburga Duit. Außadem is im Somma af de großn Blätz rund um an Dom (Kapitlblotz, Domblotz und Residenzblotz) da Rupertikirtog und im Winta da Christkindlmorkt, zu dem wos oiwei recht vüi Touristn kumman, vor oim aus Itàlien.

Infraschtruktur

A Zug vo da S-Båhn in da Håitstöi Såizburg Sàm

Da siacht ma, vor da Silhouettn vo da Åidståd, d'gschwungane Form vom Makartstég.

Vakehr

Mehr dazua findst im Hauptartikü: Vakehr in da Ståd Såizburg

Soizburg is a wichtiga Vakehrsknotnpunkt in Östareich. Es hod in zweitwichtigstn Flughåfn vo da Republik und durch d'Stod gehd à d'Westbåhn, durch dés is da Soizburga Hauptbohnhof ana vo de wichtigstn in Östareich. Es gibt Direktvabindungen noch Nordwestn (Minga/Hamburg/Paris), Südwestn (Innschprugg/Zürich), Nordostn (Linz/Wean/Budapest), Südostn (Gràz) und Südn (Villåch/Laibåch/Zagreb/Venedig). An Autobohnknotn gibts à in Soizburg, und zwor gengan do dé östareichischn Autobohnen A1 (Westautobåhn, Richtung Wean) und A10 (Dauanautobåhn, Richtung Villoch) genauso weg ois wia de deitsche A8 (Såizburga Autobåhn, Richtung Minga).

Dé Hauptstréckn vo da Eisnbã, de wos vo Soizburg wéggagengan, und nu a bor Némstréckn wern à fir'n Regionàlvakehr hergnumma. S'wichtigste Nohvakehrsmittl im Såizburga Zentràlraum is heidzdogs d'S-Båhn. In da Stod söim hod seid'n Johr 1940 da Stodbus d'wichtigste Roin, und es gibt ans vo de gresstn O-Bus-Netze vo Europa. Wer unbedingt mi'n Auto in d'Stod einifohrn wüi oda muaß, wird dagéng Probleme griang, wei sehr oft Staus san in da Innenstod, und Parkplätze findt ma sowieso meistns kàne.

A bsundas wichtige Roin im Stodtvakehr spüid in Soizburg s'Fåhrra'l. Üwa 20 Prozent vo olle Wége léng d'Soizburga min Ra'l zruck, damid liengan s'an da Spitzn vo de östareichischen Londeshauptstéd. Z'Fuaß hod ma in Soizburg in da Innenstod à kà Problem, wei ois recht eng beinonda is; da Großdeu vo da Oidstod und a gleanana Deu vo da Neistod sand außadem eh Fuaßgängazone.

Energievasorgung

Fir'n Strom in da Stod Soizburg is d'Såizburg AG zuaständig, de wos im Johr 2000 durch a Fusion vom Londesenergievasorger SAFE und vo de Soizburga Stodtwerke entstondn is.

Wåssavasorgung

S'Drinkwåssa griagt d'Stod à vo da Soizburg AG, hauptsächli aus'm Grundwossa-Diafbrunnen Glanégg vo da Quöin in Fürstnbrunn und vo de Gersbergquöin. Jéds Johr san des ungefähr 12 Müllionan Lita, de wos ind Stod einipumpt wern. Af'm Mönksberg om und af'm Kapuzinaberg om is jeweus a Hochbehöita mid 25.000 Kubikmeta. Fir d'Entsorgung vom Obwossa gibts d'Großkläronlog in Siggawiesn nördlich vo da Stod. Dé is fir üwa 600.000 Leid ausglégt und vasorgt außa da Stod Soizburg à a bor Gemeindn im Umlond, zum Beispüi Ainring in Bayern drüm.

Grånknhaisa

D'Uniklinikn Soizburg:
- S'Londesgronknhaus Sonkt-Johanns-Spitoi
- D'Christian-Doppler-Klinik
S'Unfoigronknhaus
S'Gronknhaus vo de Bårmherzing Briada

Büidung und Forschung

Rückãsicht vo da Naturwissnschåftlichn Fakuität vo da Uni Såizburg im Stådtteu Nonntal

Mehr dazua findst im Hauptartikü: Büidungseîrichtungen in da Ståd Såizburg

In Soizburg gibts drei Unis, und des sand d'Uni Soizburg, s'Mozartéum und d'Medizinische Privàtuni. D'Uni Såizburg (Paris-Lodron-Universität Såizburg) is im Johr 1622 vom Erzbischof Paris Lodron gründt worn. Heid hods vier Fakuitätn (d'katholisch-theologische, d'rechtswissnschoftliche, d'geistes- und kuiturwissnschoftliche, d'naturwissnschoftliche) mid ungefähr 13.000 Studentn. D'Uni Mozartéum hom s'im Johr 1841 ois Musikschui eîgricht. Seid 1998 is s'a Uni. Mâ kã dortn vor oim Konzertfächa studiern, owa à pädagogische Fächa, Schauspüi, Bühnenbüid und Regie. DParacelsus Medizinische Privàtuni gibt's seid'n Johr 2003. Studiern komma dortn Humànmedizin, Pflégewissnschåftn und Molekulàre Medizin (postgraduate).

D'Fåchhochschui Såizburg gibt's seid'n Johr 1995, 2005 hom s'as owa vom Stodteu Itzling in d'Gemeinde Puch bei Hallein valégt. Dortn gibts Studienrichtungen aus de Bereiche Technik, Wirtschåft, Gstoitung, Gsundheid und Soziàles. D'Salzburg Management Business School gibt's seid 2001. Gém duads do nur Masterstudien fir Wirtschoftsstudentn. Außadem gibt's in Soizburg nu a longe Listn vo ondane Büidungseîrichtungen im terziärn Sektor und vo Forschungsstättn.

Hechane Schuin (Sekundarstufn II) gibts in Soizburg insgesomt 20, davo san 13 oigemein büidend (Gymnasien und Realgymnasien) und siem san berufsbüidend (Håndlsakademien, Hechane Lehrånståitn und so weida). Vo de 20 hechan Schuin san 14 stootlich und sechsi san katholische Privàtschuin (drei oigemein büidende und drei berufsbüidende).

De wichtigstn Bibliothékn in Soizburg san d'Stodbiacharei und d'Unibibliothék.

Wirtschåft

Da Europark im Stådteu Taxhåm is's gresste Eîkaufzentrum vom Bundeslånd und gherd da *SPAR Österreichische Warenhandels AG*.

D'Getreidegåssn in da Åidståd wår scho im Mittlåita s'Håndlszentrum vo da Ståd. Heid is's vor åim s'Zentrum vom Fremdnvakehr, der wås in Såizburg a extrem wichtiga Wirdschåftszweig is.

Soizburg is néd nur a wichtige Stod fir'n Fremdnvakehr, fir d'Kuitur, fir'n Sport und ois Unistod. Durchs Messezentrum wird's à ois Messestondort oiwei wichtiga.

D'Stod Soizburg und à da Flochgau, der wos rundumadum liegt, sand außadem a attraktiva Stondort fir vüi gressane und gleanane Firmen und so wos wia da wirtschoftliche Motor vom Bundeslond. S'Wirtschåftswåchsdum vom Soizburga Lond is des zweitgresste vo Östareich (noch Wean), und da muaß ma dazuasong, dass si d'Wirtschoftsgroft vom Lond fost nur in da Stod Soizburg und im Spéckgirtl rundumadum konzentrierd, de wos olle zwà a supane Infraschtruktur homd. De Betriebe in da Stod hom zum Beispüi im Johr 2005 allàne 60 Prozent vom gonzn Umsåtz im Lond Soizburg gmocht, dé im Flochgau nu dazua 30 Prozent.

De gresstn Firmen in Såizburg

Es gibt fünf Firmen, de wos eanan Sitz in da Stod Soizburg hom und im Johr 2005 üwa â Mülliarde Euro Umsotz gmochd homd:

Porsche Holding GmbH (7,900 Mülliardn)
SPAR Österreichische Warenhandels-AG (3,940 Mülliardn)
Porsche Austria GmbH & Co (1,492 Mülliardn)
Porsche Inter Auto GmbH & Co KG (1,170 Mülliardn)
Interspar GmbH (1,130 Mülliardn)

De gresstn Bankn in Såizburg

Raiffeisenverband Salzburg
Bausparkasse Wüstenrot AG
Salzburger Sparkasse Bank AG
Salzburger Landes-Hypothekenbank
Volksbank Salzburg

Årwatsplätz

D'Schtatistik Austria hod im Johr 2001 néd nur d'Voikszöhlung gmochd, sondan à eana Orwatsstéttnzöhlung, und do is außakumma, dasss in da Stod Soizburg 10.210 Orwatsstéttn gém hod mid ois zsomm 100.055 Beschäftigte. Dés san um a Viertl mehr Orwatgéwa ois zehn Johr vorher und um 12 Prozent mehr Beschäftigte.

Da gresste privàtwirtschoftliche Orwatgéwa vo de Firmen mid Sitz in da Stod (owa mid de Orwatnehma grechnt af's gonze Bundeslond) is d'SPAR Österreichische Warenhandels-AG mid 16.000 Midorwata. Af'm zweitn Blotz is d'Porsche Holding GmbH mid 14.670 Leid. D'Interspar GmbH hod 6.000 Ãgstöide. Af de nächstn Blätz kumman d'Porsche Inter Auto GmbH & Co KG mid 3.780, d'Salzburg AG mid 2.070, da Raiffeisenverband Salzburg mid 1.618 und d'Quehenberger Logistik AG & Co KG mid 1.615 Midorwata. (Stond vo 2005)

Médien

S'ORF-Londesstudio vo Soizburg is im Stodteu Nonntoi, dort wird Radio Salzburg produzierd und außadem nu de tägliche Fernseh-Informazionssendung Salzburg heute af ORF 2 und vaschiedene ondane Fernseh- und Radiosendungen fir de Programme vom ORF. Außadem kummt vo dort s'Intanet-Nochrichtnportàl salzburg.orf.at. A Privàtfernsehn gibt's à in Soizburg, nämli des regionàle Salzburg TV (seid 1995 im Kàwü, heid à üwad Hausantenn). Privàtradios gibt's d''Antenne Salzburg, d'Welle 1 und's Radio Arabella. Außadem gibts nu a freies, néd kommerzielles Radio, nämli d'Radiofabrik.

Bei de Dågeszeidungen liefan si oiwei d'Salzburger Nachrichten (SN) und de Soizburga Bundeslond-Ausgob vo da Gronenzeidung (Salzburg Krone) an Wéttlauf uman erschtn Blotz. Weid dahinta liegd nu de Salzburger Volkszeitung (SVZ), de wos friara a Parteizeidung vo da ÖVP wor. Bei de Wochnzeidungen gibt's drei, de wos olle gratis san, nämli s'Salzburger Fenster (fir's gonze Bundeslond) und, speziell fir d'Stod, de Stadt Nachrichten (gherd, so wia's Fenster à, de SN) und's Stadt Blatt (Lokalausgob vo de Bezirksbladln). Jén Monad kummt außadém (fir's gonze Bundeslond) des Nåchrichtnmagazin ECHO außa.

Partnastéd

D'Såizburga Partnaståd Meràn in Südtiroi

France Reims, seid 1964
the United States Atlanta, seid 1967
Italy Verona, seid 1973
Nicaragua León, seid 1984
Tanzania Singida, seid 1984
Italy Busseto, seid 1988
Lithuania Vilnius, seid 1989
Germany Drésdn, seid 1991
Japan Kawasaki, seid 1992
Italy Meràn, seid 2000
the People's Republic of China Shanghai, seid 2004
Switzerland Bern, seid 2006

Berühmte Leid vo Såizburg

Bacher Gerd, Journalist
Berger Nik, Beachvolleyboi-Spüla
Doppler Christian, Mathematika und Physika
Ferrero-Waldner Benita, Politikarin
Gauß Karl-Markus, Publizist
Glomser Gerrit, Ràdlfohra
Holzbauer Wilhelm, Architekt
Ibertsberger Andi, Fuaßboi-Nazionalspüla
Herbert vo Karajan, Dirigent
Krassnitzer Harald, Schauspüla
Kuljić Sanel, Fuaßboi-Nazionalspüla
Mainoni Eduard, Politika
Makart Hans, Mola und Dekorazionskünstla
Mohr Joseph, Pforra und Dichta
Mozart Wolfgang Amadeus, Komponist
Otto I., Kini vo Griechnlond
Ratzenberger Roland, Formü-1-Fohra
Thorak Josef, Nàzi-Büidhaua
Trakl Georg, Dichta und Autor
Voggenhuber Hannes, Politika

Ehrnbiaga

D'Ernennung zum Ehrnbürga is d'hechste Auszeichnung, de wos d'Stod Soizburg vagém kã. A Ehrnbürga griagt olle Rechte, de wos a normàla Bürga vo da Stod hod, owa néd de Pflichtn. Da erschte, der wos Ehrnbürga worn is, wor da Sattler Johann Michael, a Londschoftsmola, am 6. Mai 1829. Fost hundad Johr hod's dauad, bis zum Johr 1920, daß's zum erschtn Moi à a Ehrnbürgarin vo Soizburg gém hod, nämli d'Lehmann Lilli, a Kommasängarin. Bis jétz is d'Ehrnbürgaschoft 88 Moi vagém worn; d'Lehmann Lilli is nu imma d'ànzige Frau, de wos s'griagt hod.

Literadua

Dopsch Heinz: Kleine Geschichte Salzburgs – Stadt und Land, Pustet 2001.
Dopsch Heinz, Hoffmann Robert: Geschichte der Stadt Salzburg, Pustet Salzburg 1996.
Floimair Roland, Kaindl Kurt: Hundert Jahre Film, 1895-1995: Salzburger Film- und Fotopioniere, Amt der Salzburger Landesregierung, vertreten durch das Landespressebüro, Salzburg 1994.
Hoffmann Robert: Mythos Salzburg. Bilder einer Stadt. Verlag Pustet, Salzburg, Minga, 2002. ISBN 3-7025-0425-7
Koller Fritz, Rumschöttel Hermann: Bayern und Salzburg im 19. und 20. Jahrhundert, vom Salzachkreis zur EUregio, Samson 2006. ISBN 3-921635-98-5
Rosendorfer Herbert: Salzburg für Anfänger, nymphenburger 2003.
Strasser Christian: The Sound of Klein-Hollywood: Filmproduktion in Salzburg, Salzburg im Film: mit einem Filmlexikon. Österreichischer Kunst- und Kulturverlag Wien 1993. ISBN 3-85437-047-4