Полк імя Кастуся Каліноўскага
| Батальён імя Кастуся Каліноўскага | |
| Файл:Батальён імя Кастуся Каліноўскага. Лагатып.png | |
| Гады існаваньня | сакавік 2022 году — наш час |
|---|---|
| Краіна | Украіна |
| Краіны | Украіны |
| Падпарадкаваньне | Узброеныя сілы Ўкраіны |
| Дысьлякацыя | Кіеў |
| Войны | Расейскае ўварваньне ва Ўкраіну |
Батальён імя Кастуся Каліноўскага — беларускі добраахвотніцкі батальён, сфармаваны ў сакавіку 2022 году з мэтай абароны Ўкраіны, а менавіта места Кіева ад расейскага ўварваньня. Утварыўся з удзельнікаў тактычнай групы «Беларусь», сяброў Белага Легіёну і Маладога Фронту[1], а таксама іншых беларусаў, якія раней не ўваходзілі ў падобныя фармаваньні.
Сваю назву атрымаў у гонар Кастуся Каліноўскага — аднаго з кіраўнікоў нацыянальна-вызвольнага паўстаньня 1863—1864 гадоў, нацыянальнага героя Беларусі. Часткай батальёна ёсьць адмысловая група беларускіх добраахвотнікаў «Чорны кот»[2][a].
Гісторыя
Беларускія добраахвотнікі ўдзельнічаюць у расейска-ўкраінскай вайне зь вясны 2014 году. Група беларусаў брала удзел у баях за Пяскі, каля Данецкага аэрапорту ў ліпені 2014 году. Таго ж году ўтварыўся аддзел «Пагоня», а ў чэрвені 2015 году — тактычная група «Беларусь», якая брала ўдзел у баях за Аўдзееўку, Пяскі, Валнаваху, Мар’інку.
Па адкрытым нападзе Расеі на Ўкраіну 2 сакавіка 2022 году ва Ўкраінскім войску ўтварылася першая рота, якая складаецца зь іншаземцаў, а менавіта зь беларусаў. Паводле зьвестак Радыё Свабода, на 4 сакавіка ў яе ўвайшлі каля 40 чалавек[3]. 4 сакавіка 2022 году ў абарончых баях ва Ўкраіне загінуў беларускі добраахвотнік Ільля «Ліцьвін»[4]. Паводле зьвестак на 5 сакавіка, Украіну абараняла 200 беларускіх добраахвотнікаў, яшчэ 300 беларусаў, гатовых далучыцца да Замежнага легіёну, знаходзілася ў Польшчы[5].
9 сакавіка беларускія добраахвотнікі заявілі пра аб’яднаньне ў батальён імя Кастуся Каліноўскага[6].
18 сакавіка ў Кіеве зьявіліся білборды «Разам — назаўжды» з выявай добраахвотніка Батальёна імя Кастуся Каліноўскага, каб прадэмастраваць, што беларусы з Батальёна разам з украінскім народам паўсталі на абарону Украіны супраць агрэсара[7].
Прысяга Батальёна імя Кастуся Каліноўскага
25 сакавіка 2022 году ў Дзень Волі (Дзень Незалежнасьці Беларусі) беларускія добраахвотнікі батальёну імя Кастуся Каліноўскага прынялі прысягу — увайшлі ў склад Узброеных сілаў Украіны. Тэкст самой прысягі быў на беларускай мове, з шматлікімі спасылкамі на гісторыю Беларусі і заканчваўся словамі «Жыве Беларусь!»[8].
Беларусь, маці мая Радзіма. Клянуся вызваляць і бараніць цябе там дзе знаходжуся зараз і куды прывядзе мяне лёс твайго вызвалення. Біцца да перамогі за тваю свабоду. Як біліся нашыя продкі з адрынскім прыгнётам маскавітаў пад Оршай, Смаленскам, Палонкай. Бяслітасна гнаць бязродных апрычнікаў з зямель тваіх. Як гналі ваяры Вялікага Княства Літоўскага і беларускай шляхты, касінеры Касцюшкі і паўстанцы Каліноўскага, жаўнеры Народнай Рэспублікі і партызаны Супраціву. Бараніць кроў тваё нацыі, моц тваёй зямлі і Боскі дух твайго існавання. У шэрагах вольных братоў і ў палоне. На Айчыне і ў выгнанні. І ў баі і ў падполлі. Няхай рукі мае сціскаюць зброю, пакуль шыбеніцы не скончаць сціскаць шыі сыноў Тваіх. Няхай лязгат майго затвору не сціхае, пакуль чутны лязгат кратаў за спінамі герояў тваіх. Няхай хопіць мне жыцця, каб адпомсціць за ўсіх закатаваных, згвалтаваных і забітых дзяцей Тваіх. Да астатняга пляску рэк Тваіх у маіх вачах. Пакуль будзе чутны тупат "Пагоні" у сэрцы маім. Жыць з табою, памерці за цябе, і адрадзіць веліч тваю. Жыве Беларусь! Жыве вечна!
Удзельнікі
- Павал Кулажанка — блогер Exomon, удзельнік руху «Супраціў»
- Дзяніс Урбановіч — беларускі грамадзкі дзяяч, старшыня Маладога Фронту
- Павал Шурмей — беларускі вясьляр
Загінулыя ваяры батальёну
13 сакавіка 2022 года пад Кіевам загінуў камандзір групы батальёну Аляксей Скобля (31 год) зь мянушкай «Тур».[9]
26 сакавіка ад баявога раненьня каля горада Ірпень загінуў баец батальёну Зьміцер Апанасовіч зь мянушкай «Тэрор». У гэты дзень батальён зьнішчыў тры БМП расейскіх захопнікаў, аднак Апанасовіч атрымаў моцнае раненьне, выратаваць яго жыцьцё не ўдалося.[10] Апанасовічу было 32 гады, ён родам са Смаргоні. Праходзіў вайсковую службу ў 38-й дэсантнай брыгадзе ў Бярэсьці. Апошнія гады Апанасовіч жыў у Варшаве, працаваў дальнабойшчыкам, адтуль прыехаў як добраахвотнік на абарону Украіны.[11]
Заўвагі
- ^ «Чорны кот» — беларуская партызанская арганізацыя, якая ў 1944—1957 гадох вяла ўзброенае змаганьне з расейска-савецкімі акупантамі за аднаўленьне незалежнасьці Беларусі
Крыніцы
- ^ «Верым, што пераможам Расею, а пасьля вызвалім Беларусь». У беларускую роту тэрабароны Ўкраіны запісаліся сямёра маладафронтаўцаў, Радыё Свабода, 7 сакавіка 2022 г.
- ^ Адмысловая група беларускіх дабраахвотнікаў «Чорны кот», YouTube
- ^ «Не рабіцеся злачынцамі!» — беларускі дабраахвотнік «Курган» зьвяртаецца да беларускіх вайскоўцаў, 4 сакавіка 2022 г.
- ^ У баях ва Ўкраіне загінуў беларускі добраахвотнік, Радыё Свабода, 4 сакавіка 2022 г.
- ^ Пракоп’еў: 200 беларусаў ужо ваюе на баку Украіны, яшчэ 300 гатовыя, Наша Ніва, 5 сакавіка 2022 г.
- ^ Орлова В. Білоруси створили батальйон для оборони Києва (відео), УНІАН, 9 сакавіка 2022 г.
- ^ У Кіеве з’явіліся беларускія банеры ФОТА, Наша Ніва, 18 сакавіка 2022 г.
- ^ Батальён беларускіх добраахвотнікаў імя Каліноўскага ўвайшоў у склад Узброеных сіл Украіны, Радыё Свабода, 26 сакавіка 2022 г.
- ^ Ва Ўкраіне загінуў баец з батальёну Кастуся Каліноўскага, Радыё Свабода, 13 сакавіка 2022 г.
- ^ Загінуў баец батальёна Кастуся Каліноўскага, Радыё Свабода, 26 сакавіка 2022 г.
- ^ Служыў у 38-й дэсантнай брыгадзе, снайпэр, ваяр. Хто такі беларус Зьміцер «Тэрор» Апанасовіч, які загінуў ва Ўкраіне, Радыё Свабода, 1 красавіка 2022
Вонкавыя спасылкі
- Батальён імя Кастуся Каліноўскага, Telegram
- «Ёсьць шанец адсекчы расейскай імпэрыі галаву»: беларус тлумачыць, чаму ваюе на баку Кіева, Радыё Свабода, 19 сакавіка 2022 г.
- Дзьмітры Гурневіч, «Гэта будзе армія, якая пазьней вызваліць Беларусь». Былы беларускі АМАПавец стаў добраахвотнікам ва Ўкраіне, Радыё Свабода, 22 сакавіка 2022 г.
- Valerie Hopkins, Belarusian Exiles in Ukraine Join the Fight Against a Common Foe: Russia, The New York Times, 24 сакавіка 2022 г.