Swarm - Lo sciame che uccide
C'l artìcul chè 'l è scrit in
Miranduléś |
Swarm - Lo sciame che uccide | ||
L'Olivia de Havilland in na figùra dal film | ||
Swarm - Al siàm ch'al cópa 1978 | ||
---|---|---|
Regìa: Irwin Allen | ||
Scritōr: Arthur Herzog III • Stirling Silliphant | ||
Atōr: Michael Caine • Richard Chamberlain Katharine Ross • Richard Widmark • Lee Grant Olivia de Havilland • Henry Fonda • José Ferrer Patty Duke • Alejandro Rey • Cameron Mitchell Ben Johnson • Slim Pickens • Christian Juttner | ||
Müsica: Jerry Goldsmith | ||
Léngua: Ingléś | ||
Dürä dal film: 149 minüt | ||
Nasiōṅ: Stat Unî |
Swarm - Lo sciame che uccide (Swarm - Al siàm ch'al cópa) 'l è 'n film catastròfic dal 1978 'd Irwin Allen, candidâ a 'l Prèmi Òscar dal 1979 p'r i custùm ad Paul Zastupnevich. 'L è stâ fat c'n un budget stimâ 'd vint-i-òṅ migliòṅ ad dòlar.
In di tìtui 'd cóa a gh'è 'n cartèl cun scrit insìma „La béga sasìna africàna ch'la cumparìs in cal film chè la n gh'à pròpria gnint a che spartìr cun la dōlsa béga lavuradōra americàna ch'a gh sém tut debitōr par l'impulinasiòṅ dal cultùri vitàli ch'i dànan da magnàr a 'l nòstar paéś“.
Sunt
In na baś militàra dal Tèxas, un grup ad suldâ cmandâ p'r al magiōr Baker (Bradford Dillman) e p'r al generàł Slater (Richard Widmark) i vìnan catâ mòrt sénsa spiegasiòṅ. La dutōra e capitàna Helena Anderson (Katharine Ross) la s rénd cònt ch'l'è cólpa d'l atàc 'd un siàm ad béghi rivàdi da 'l Braśìl, infurmasiòṅ cunfirmàda par 'l entumòlug ingléś naturaliśâ americàṅ Brad Crane (Michael Caine), capitâ lè par caś. Al luminàri, ch'al s 'n inténd dimóndi, al cònta ch'la béga africaniśàda l'è dimóndi più grôsa e rabìda 'd qvéla americàna e, quànd la punś, al sò vlèṅ 'l è bòṅ ad cupàr in quàt'r e quàt'r òt. Al siensiâ al taca a lauràr par pascàr un rimèdi insém a i dutōr Walter Krim (Henry Fonda), imunòlug, e Hubbard (Richard Chamberlain).
In cal mént'r al siàm al dà adòs a la famìja Durant, masànd pàdar (Robert Varney) e màdar (Doria Cook-Nelson) ch'i ér'n andâ in campàggna a far un pic-nic insém a sò fiōl Paul (Christian Juttner). Chi lò, prima 'd murìr par 'l efèt dal murśgàdi, insém a dū sò amìg al dà fōg a 'l gnal dal siàm, stramnànd tut gl'insèt in gir p'r al paéś. Al siàm al riva acsè in dal paiśèṅ ad Marysville in du al sìndig Clarence Tuttle (Fred MacMurray) 'l è drē a urganiśàr la fèsta di fiōr insém a la suvrintendènta sculàstica, la sgnōra Maureen Scheuster (Olivia de Havilland), che lò al vrév spuśàr, e a Felix Austin (Ben Johnson), anc lò inamurâ dla dóna.
Gl'insèt sasèṅ i culpìs'n a mòrt dimóndi abitànt, anc l’Helena la vîṅ murśgàda ma la scampa listés. La giurnalìsta Anne MacGregor (Lee Grant), rivàda lè par cònt dla televiśiòṅ, la próa a intervistàr Brad par savēr-an da piò. Adès ch'al béghi i èṅ drē a 'ndàr vèrs Houston a gh'è da farmàr-li a tut i cóst.