Pakita Arregi
Pakita Arregi (Areso, Nafarroa Garaia) Soziologia eta Politika Zientzietan Doktorea da eta erretiroa hartu arte Euskal Herriko Unibertsitatean katedraduna izan zen, Euskal Hizkuntza eta Hezkuntzaren Soziologia irakasten zituen[1].
1964ean sortu zen Joannes Etcheberry Andereño Eskolan, ikastegiaren zuzendari izan zen. Bertako ikasleentzako euskarazko lehenengo gaitasun-proben antolaketa berak egin zuen, baita Ikastoletan lanean ari ziren eta Irakasleen Eskolan sartzeko titulua behar zuten andereño gaientzat Batxilergoko Ikastaroen antolaketa ere; EHUren Ohorezko irakaslea izan zen 2005ean eta EIRE, Euskal Irakasleen Elkartearen irakasle emeritu izendatu zuten 2007an.
2008an, berriz, klandestinitatean lan egin zuten andereñoei emandako Sabino Arana saria hartu zuen. Horrez gain, Gipuzkoako Foru Aldundiaren saria ere jaso zuen, 1960ko hamarkadako andereñoei zuzendua.
Irakaskuntzan ez ezik, ikerketan ere ibili da, eta lan ugari argitaratu ditu lanaren eta hezkuntzaren soziologia eta euskararen alfabetatze arloetan. Eta hori dena gutxi balitz, 2010ean Euskaltzaindiak ohorezko euskaltzain berri izendatu zuen.