習近平訪港
閱讀設定
習近平訪港係指中國共產黨現任中央委員會總書記習近平到訪並視察香港特別行政區。[1]
2008年
[編輯]習近平第一次以黨同國家領導人嘅身份訪問香港係2008年應香港特別行政區政府邀請,喺7月6至8號到港,瞭解2008年奧運同殘奧馬術比賽嘅籌備情況,又藉此行了解香港嘅近況,同埋探訪香港市民。[2]
2017年
[編輯]2017年係香港主權移交中華人民共和國二十週年,習近平依慣例再次訪問香港。呢次係佢喺2012年中共十八大當選總書記做咗最高領導人之後首次到訪香港[3],亦都係繼全國人大常委會委員長張德江喺2016年訪問香港之後,連續兩年有中共中央政治局常委級別嘅最高層領導人到訪香港[4]。
習近平會喺6月29號中午抵達香港,至7月1號完成香港特區政府就職典禮同監誓儀式之後離開,訪問前後為期3日。習近平喺香港期間將出席主權移交20周年慶典活動,主持香港特別行政區第五屆政府就職典禮同監誓,又會檢閱中國人民解放軍駐香港部隊,同埋出席多場官式活動。[5]
2022年
[編輯]内文:2022年習近平訪問香港
2022年係香港主權移交中華人民共和國廿五週年,習近平依慣例再次訪問香港,同時出席香港新一任行政長官李家強上任就職儀式。受疫情影響,習近平只係分別喺6月30號下晝同7月1號朝早兩度逗留香港,中途返深圳過夜,同時改搭高鐵喺西九龍站出入境。呢次訪問引起唔少媒體關注,但因應交通管制、大幅度封區影響市民返工放工、記者採訪新聞自由被阻以及有民主派團體事前被警察國安處「招待」,引起咗一啲爭議同批評。
參考
[編輯]- ↑ 〈傳習總訪港 特區警察6月最大反暴演習試射橡膠子彈〉. 香港852郵報. 2017-03-08. 原著喺2019-05-06歸檔. 喺2017-06-01搵到.
- ↑ 〈習近平訪港視察奧馬〉. 香港文匯報. 2008-07-09.
- ↑ 〈傳習總7.1赴港前要製造「祥和」 暫停打壓人權律師〉. 香港蘋果日報. 2017-01-14. 原著喺2017-08-19歸檔. 喺2017-06-01搵到.
- ↑ 〈張德江抵港訪問三日〉. 香港政府新聞網. 2016-05-17. 原著喺2017-08-19歸檔. 喺2017-06-01搵到.
- ↑ 〈傳習近平計畫 七一香港辦閱兵〉. 蘋果日報. 2017-03-07.