甘蔗

糖梗

甘蔗，一许宕地个吴语也讴作糖梗、沙糖，是禾本科个单子叶植物，是甘蔗属（学名：Saccharum）个总称。甘蔗是温带搭热带农作物，是制造蔗糖个原料。

糖梗是世界天下产量顶大农作物之一，年产毛估估便有18.8亿吨，巴西个产量占爻全世界40％。

历史

史前糖梗个传播路线图，虚线箭头表示南岛人个迁播。

糖梗个史前历史搭南岛人密切交关。佢个两只驯化中心是新几内亚巴布亚人个宕地，搭台湾、中国南方个南岛人个宕地。秀贵甘蔗（S. officinarum）搭竹蔗 （S. sinense）的传播畀认为主要因之南岛人个迁播。 前者从距玱6000年开始，便畀巴布亚人在新几内亚搭各许华莱士线东面个岛上头选择性培育，赫向西面传到东南亚沿海，在解𡍲搭当地个甜根子草（Saccharum spontaneum）串种起。后者是在中国南方搭台湾驯化，在原始南岛语（ Proto-Austronesian）中畀重构作*təbuS或*CebuS。佢是南岛人最头起个主要农作物。距玱3500年头先，南岛人航海家从东南亚群岛畀糖梗传到波利尼西亚搭密克罗尼西亚，也由南岛商人传到东亚大陆搭南亚次大陆，在解地串种，赫貤传到爻欧亚大陆西面搭地中海。

本地糖梗

华南可能是糖梗个驯化地之一。10世纪开始，江南便普遍种糖梗。

吴越主要产糖梗个宕地有以果蔗为主个馀杭、温岭、陶山、兰溪、东阳、衢州，搭以糖蔗为主个义乌。馀杭个本地糖梗，也讴作“上湖青”，搭温州陶山个青皮、台州温岭从广东引进个黄皮，拢作三种吴越顶有名青黄皮果蔗。

用场

糖梗乳

吃剩爻个糖梗渣

糖梗秆好用来直接吃，或者打乳吃。也好用来做糖，过程中个副产品糖蜜还好作做酒搭各许食品化工用场。糖梗还好用来烟熏食品，打比方做糖梗鸭。

义乌红糖便是用本地产个青皮糖梗做起，老法是用木车牛力绞乳，铁镬熬出红糖。