Luís Aguirre del Río
Luís Aguirre del Río, nado en Lestrobe (Dodro) o 3 de febreiro de 1842 e finado en Santiago de Compostela o 1 de febreiro de 1866, foi un poeta en castelán e compositor galego[1].
Biografía | |
---|---|
Nacemento | 3 de febreiro de 1842 Lestrobe, España |
Morte | 1 de febreiro de 1866 Santiago de Compostela, España |
Datos persoais | |
País de nacionalidade | España |
Actividade | |
Ocupación | escritor |
Lingua | Lingua galega e lingua castelá |
Traxectoria
editarA súa etapa escolar desenvolveuse en Rianxo, residencia dos seus avós paternos, ata o ano 1853, momento no que se traslada a Santiago para inicia-los estudos secundarios. No ano 1860 graduouse como bacharel en artes e matriculouse en Filosofía e en Dereito[1]. Enfermou durante a súa estadía en Madrid e morreu en Santiago no 1866.
Escribiu o Diccionario del dialecto gallego, o primeiro dicionario bilingüe galego-castelán[3]. Suponse que o escribiu mentres estudaba en Compostela e sábese que está datado en 1858. En 1862 foi a Madrid, onde contou coa protección de Nicomedes Pastor Díaz e entregou o orixinal do seu dicionario no xornal El Alba Católica, que nunca chegou a publicalo, aínda que no ano seguinte se anunciase nun xornal galego a intención do prelo do xornal de publicalo por entregas. O dicionario, que inclúe unhas 8 000 palabras, non foi publicado até o ano 2007, cando foi editado polo Consejo Superior de Investigaciones Científicas e o Instituto de Estudos Galegos Padre Sarmiento, baixo a preparación da filóloga e profesora Carme Hermida.
Como poeta publicou a peza Himno escolar (1859) e mais o poema "Ámame" no Álbum de la Caridad (1862)[4].
Notas
editar- ↑ 1,0 1,1 Carme Hermida Gulías (2008): Un novo dicionario. A contribución de Aguirre del Río á lexicografía galega do século XIX Arquivado 25 de novembro de 2015 en Wayback Machine., en pdf. Instituto da Lingua Galega, Universidade de Santiago de Compostela.
- ↑ Album de la Caridad. Juegos Florales de La Coruña en 1861, seguido de un mosaico poético de nuestros vates gallegos contempornáneos Galiciana. Biblioteca de Galicia.
- ↑ "A historia reescrita" Arquivado 25 de novembro de 2015 en Wayback Machine., artigo de M. Dopico en Galicia Hoxe, 2 de abril de 2008.
- ↑ Couceiro Freijomil, A. (1951). "AGUIRRE DEL RÍO, Luis". Diccionario bio-bibliográfico de escritores (en castelán) I. Santiago de Compostela: Bibliófilos Gallegos. p. 18.
Véxase tamén
editarBibliografía
editar- Hermida Gulías, C. (ed.) (2007): O Diccionario del dialecto gallego de Luís Aguirre del Río. Madrid: CSIC e IEGPS. ISBN 978-84-00-08609-1
- Abuín de Tembra, A. e Cortizo Sóñora, J. (eds.) (2007): Luís Aguirre. Poesía completa. Santa Comba: TresCtres. ISBN 978-84-935562-6-6