Gattaca

Gattaca
Ficha técnica
Título orixinal	Gattaca
Director	Andrew Niccol
Intérpretes	Ethan Hawke (Vincent Freeman) Uma Thurman (Irene Cassini) Jude Law (Jérôme Eugène Morrow) Elias Koteas (Antonio Freeman, o pai de Vincent) Jayne Brook (Marie Freeman, a nai de Vincent) Gore Vidal (director Josef) Xander Berkeley (o doutor Lamar) Ernest Borgnine (Caesar, o vello) Loren Dean (inspector de policía Anton Freeman, irmán de Vincent) Maya Rudolph (enfermeira) Una Damon (enfermeira xefe) Elizabeth Dennehy (profesor de escola) Blair Underwood (xeneticista) Mason Gamble (Vincent neno) Vincent Nielson (Anton neno) Chad Christ (Vincent adolescente) William Lee Scott (Anton adolescente)
Música	Michael Nyman
Distribuidora	Columbia Pictures
Estrea	1997
Duración	101 min
Orixe	Estados Unidos
Xénero	Drama Ciencia ficción
Na rede
https://www.sonypictures.com/movies/gattaca

Gattaca é un filme de ciencia ficción realizado en 1997. Escrito e dirixido por Andrew Niccol, conta no seu reparto con Ethan Hawke, Uma Thurman e Jude Law nos papeis protagonistas e Gore Vidal e Alan Arkin como actores secundarios.

Uma Thurman, actriz protagonista do filme.

Ethan Hawke, actor protagonista do filme.

O filme presenta unha visión futurista dunha sociedade altamente tecnoloxizada rexida a través da selección xenética. Nun futuro próximo non precisado, os enxeñeiros xenéticos deseñan meniños-probeta para as clases altas optimizando a través da fecundación in vitro os mellores caracteres xenéticos dos seus pais. Unha base de datos xenética identifica e clasifica automaticamente os "válidos" (os creados por medios artificiais libres de enfermidades e defectos) fronte ós "in-válidos" (os concibidos bioloxicamente). Aínda que a discriminación xenética está legalmente prohibida, na práctica as corporacións recorren a análises de ADN para seleccionar o seu persoal de modo que os "válidos" aparecen cualificados para os mellores postos en tanto que os individuos concibidos polos métodos tradicionais son relegados a unha nova subclase encargada dos traballos subalternos.

Trama

Cando a perfección física se converteu na norma grazas ós avances da biotecnoloxía, os espécimes "in-válidos" téñeno máis cru para conseguiren facer valer a súa vontade. O soño de Vincent Freeman (Ethan Hawke), un "in-válido" cun defecto cardíaco, é chegar a voar ó espazo exterior. Vincent só conseguirá ser tomado en serio no programa espacial denominado "Gattaca" cando asuma a identidade de Jerome (Jude Law), un "válido" que lle proporciona sangue, implantes de tecido e mostras de urina a cambio de amizade (está incapacitado por ter un accidente de coche). O subterfuxio funciona ata que ten lugar un asasinato no seu lugar de traballo e as autoridades comezan as investigacións.

Temas

A película trata sobre os desenvolvementos biotecnolóxicos que facilitan a euxénese e a reproxenética, e as súas posibles consecuencias na sociedade que as permite. Explorando o tema do destino e as maneiras en que goberna as nosas vidas, o filme presenta os personaxes en continua loita coa sociedade e consigo mesmos para atopar un lugar no mundo. Os temas aparentes no filme inclúen os seguintes: a identidade persoal, a amizade, o amor, a esperanza, a rivalidade entre irmáns, a vontade de ser (incluso tratando de ser algo que non se é para cumprir os soños), o determinismo xenético (o que un está destinado a ser segundo os seus xenes) e as limitacións e posibilidades humanas.

Estilo

Clasificado como cine de ciencia ficción, a película enmárcase na liña biopunk da fantaciencia. Conscientemente arredada da sensiblería de filmes de serie B de ínfima calidade que dominaron a fantasía científica dos noventa, Gattaca volve ás raíces das alienantes distopías de Un feliz mundo novo e Fahrenheit 451.

De estética fría e elegante, o estilo do vestiario, dos peiteados, dos edificios e dos automóbiles conduce ó mundo moderno dos primeiros anos sesenta. A tecnoloxía, pola contra, parece atoparse nun estado moi avanzado: o contraste entre estes dous elementos achegan o filme ós trazos característicos da vea steampunk.

Curiosidades

• O nome Gattaca deriva dunha secuencia das iniciais das bases de que se compón o ADN, os catro nucleótidos: a guanina, a adenina, a timina e a citosina, isto é (G), (T), (C) (A).
• Para crear o efecto da perfección física debida á selección xenética, o director serviuse no filme dun amplo elenco de modelos masculinos e femininos.
• O nome Irene Cassini está inspirado no de Giovanni Domenico Cassini, astrónomo que descubriu as lúas de Saturno e o espazo entre el e os seus aneis.
• O nome "Eugene", significa en grego "ben nacido" e aparece nas palabras euxénese e euxenesia.
• Os anuncios no interior de Gattaca están feitos en esperanto.
• O edificio "futurista" en que se desenvolve gran parte das escenas é o Marine County Civic Center construído en 1957 por Frank Lloyd Wright, en San Rafael, San Francisco.
• A escaleira en espiral da casa de Jerome ten a forma de hélice do ADN.

Véxase tamén

Ligazóns externas

• Ficha do IMDb (Internet Movie Database) (en inglés)
• Sitio Oficial (en inglés)
• Recensión de Roger Ebert] (en inglés)