Մագդա Մկրտչյան
| Մագդա Մկրտչյան | |
|---|---|
 | |
| Հիմնական տվյալներ | |
| Ի ծնե անուն | Մագդա Մերուժանի Մկրտչյան |
| Ծնվել է | հունիսի 4, 1976 (48 տարեկան) Երևան, Հայկական ԽՍՀ, ԽՍՀՄ |
| Ժանրեր | օպերա Քնարական-դրամատիկ սոպրանո |
| Մասնագիտություն | Երգչուհի |
| Երգչաձայն | սոպրանո |
| Գործիքներ | վոկալ |
| Կրթություն | Երևանի Կոմիտասի անվան պետական կոնսերվատորիա |
| Պարգևներ |  |
 Magda Mkrtchyan Վիքիպահեստում | |
Մագդա Մերուժանի Մկրտչյան (հունիսի 4, 1976, Երևան, Հայկական ԽՍՀ, ԽՍՀՄ), հայ օպերային երգչուհի, Հայաստանի վաստակավոր արտիստ (2014)։
Կենսագրություն
1983-1990 թվականներին սովորել է Երևանի Ա. Գաբրիելյանի անվան թիվ 12 երաժշտական դպրոցի ջութակի դասարանում, 1993-1998 թվականներին՝ Երևանի Կոմիտասի անվան պետական կոնսերվատորիայի մեներգեցողության բաժնում՝ ավարտելով նաև ասպիրանտուրան (պրոֆեսոր Գոհար Գալաչյանի դասարանում)։ 1999 թվականից Երևանի Սպենդիարյանի անվան օպերայի և բալետի ազգային ակադեմիական թատրոնի մենակատար է։ 2000 թվականին հանդես է եկել Ջուզեպպե Վերդիի «Տրուբադուր» օպերայում Լեոնորայի դերերգով (առաջնելույթ, դիրիժոր՝ Օհան Դուրյան)։ 2000-2001 թվականներին վերապատրաստվել է Լ. Պավարոտիի և Մ. Մերիգգոյի դասարաններում (Իտալիա), մասնակցել է Գ. Վիշնևսկայայի (Մոսկվա), Ն. Ֆիգուերի (Բեռլին) վոկալ վարպետացման դասընթացներին։ Մենահամերգներով հանդես է եկել Հայաստանի և արտասահմանյան մի շարք հանրաճանաչ բեմերում, որոնցից են՝ Dorothy Chandler Pavilion (2001, ԱՄՆ), Konzerthause (2004, Բեռլին), Nicolaisaal (2004, Պոտսդամ), Handel Hоuse (2004, Հալլե), Siemens-Villa (2004), Դոժերի Պալատ (2005, Իտալիա), Ջուստինյան Պալատ (2005, Իտալիա), Դ. Շոստակովիչի անվան պետական ֆիլհարմոնիկ մեծ համերգասրահ (2009, Սանկտ-Պետերբուրգ)։ 2005 թվականին կատարել է Յոհաննես Բրամսի «Ռեքվիեմը» (դիրիժոր՝ Ա.Վասսերման, Գերմանիա)։ 2006 թվականից դասավանդում է Երևանի Կոմիտասի անվան պետական կոնսերվատորիայում։ 2006 թվականին Վատիկանում Բենեդիկտ Պապ 16-րդի ներկայությամբ ներկայացրել է միջնադարյան շարականները, որը Տելեպաչե հեռուստատեսությունը հեռարձակել է աշխարհի 27 երկրներում։
2008 թվականին հիմնել է «3-Սոպրանո» նախագիծը։ Նույն թվականին մենահամերգային ծրագրերով հանդես է եկել հայ-իտալական, հայ-ռուսական մշակութային միջոցառումների շրջանակներում։
Հանդես է եկել Արամ Խաչատրյանի «Ձոն ցնծության» Վերդիի «Նաբուկո», Բելլինիի «Նորմա», Ֆրանց Շուբերտի «Միրիամի հաղթական երգը», Վոլֆգանգ Ամադեուս Մոցարտի «Դոն Ժուան» և այլ օպերաներում։ 2009 թ. Հնդկաստանում հանդես է եկել հայ մշակույթի օրերին նվիրված միջոցառումների շրջանակներում, Սանկտ-Պետերբուրգում երգել է Ելենա Օբրասցովայի 70-ամյակին նվիրված Գալա համերգին (դիրիժոր՝ Ջուզեպպե Սաբբատինի)[1]։ 2011-2012 թվականներին հանդես է եկել Վերդիի «Աիդա» օպերայում Աիդայի դերերգով (դիրիժոր՝ Հ. Արզումանյան, 2011), (դիրիժոր՝ Կարեն Դուրգարյան, 2012)[2]։ 2011 թվականին մասնակցել է Ալեքսանդր Սպենդիարյանի 140-ամյակին նվիրված Գալա համերգին։
Թողարկել է 4 ձայնասկավառակ հոգևոր և դասական ստեղծագործությունների ժանրերում։
Մրցանակներ
- «Լիզա» բարեգործական մրցույթի 1-ին մրցանակ (1995)
- Ա. Կարապետյանի անվան 1-ին հանրապետական մրցույթի 1-ին մրցանակ (1996)
- «Բելկանտո» հանրապետական մրցույթի Արաքս Դավթյանի անվան և «Հույսի» մրցանակների դափնեկիր (1996)
- Hildegard Pabelic-ի անվան միջազգային մրցույթի Գրան Պրի (2000)
- Ջուզեպպե Վերդիի «Ռեքվիեմ»-ի լավագույն կատարման համար ոսկե մեդալ (2001)
- Հայաստանի վաստակավոր արտիստ (2014)[3]