ქემალფაშა (ართვინი)
| ქალაქი | |
|---|---|
|
ქემალფაშა Kemalpaşa | |
 | |
| ქვეყანა |
 თურქეთი |
| პროვინცია | ართვინი |
| რაიონი | ქემალფაშის რაიონი (ართვინი) |
| კოორდინატები | 41°29′00″ ჩ. გ. 41°31′00″ ა. გ. / 41.48333° ჩ. გ. 41.51667° ა. გ. |
| ადრეული სახელები | მაკრიიალი |
| ამჟამინდელი სტატუსი | 1987 |
| ცენტრის სიმაღლე | 10 მ მ |
| მოსახლეობა | 4 894 კაცი (2011) |
| სასაათო სარტყელი | UTC+3 |
| სატელეფონო კოდი | 466 |
| საფოსტო ინდექსი | 08610 |
| საავტომობილო კოდი | 08 |
| ოფიციალური საიტი | kemalpasa.bel.tr |
  | |
ქემალფაშა (თურქ. Kemalpaşa; ძვ. სახელწოდება — მაკრიალი,[1] ადგილობრივი ლაზები ნოღედსაც უწოდებენ) — ქალაქი თურქეთში, ართვინის პროვინციის ქემალფაშის რაიონში რაიონში. მდებარეობს შავი ზღვის სანაპიროზე, სარფის სასაზღვრო-გამშვები პუნქტიდან 5 კილომეტრში. მოსახლეობა 4 894 ადამიანი (2011 წ.)[2]. 2017 წელს გახდა ართვინის პროვინციის რაიონი.[3]
ისტორია[რედაქტირება | წყაროს რედაქტირება]
სასაზღვრო ზონაში მდებარე მაკრიალი სხვადასხვა ეპოქაში მოიაზრებოდა ჭანეთსა და კლარჯეთში, ზღვისპირისა და გონიას მიკროპროვინციებში.
არის მოსაზრება, რომ მაკრიალი არის პტოლემაიოსთან (II ს.) დამოწმებული პუნქტი ქსილინე. ტოპონიმი, რომელიც შესაძლოა მაკრონების ტომის სახელწოდებასთან იყოს დაკავშირებული. წერილობით წყაროებში პირველად გვხვდება მიქელ პანარეტოსთან (XIV ს.) მაკროსეგიალოსი/მაკრეგიალუსი („გრძელი სანაპირო“) ფორმით, რაც ადგილ. სახელის ბერძნულად გადააზრების გზით უნდა იყოს მიღებული. ავტორის მიხედვით, ამ ადგილს ორი დინასტიური ქორწინების ფაქტი უკავშირდება: 1367 ივნისში ლაზიკეში, მაკრიალში, „ხმელეთითა და ზღვით“ ჩავიდა ტრაპიზონის იმპერატორის, ალექსი III-ის ამალა, რ-მაც საქართველოს მეფე ბაგრატ V-ს იმპერატორის ქალიშვილი ანა მიათხოვა (კონტექსტიდან ჩანს, თითქოს ჯვრისწერა/ქორწილი აქვე შედგა); 1377 მაკრიალში გაატარა ზაფხული იმავე ალექსი III-მ. გონიიდან დავით IX-ის ასულის (ბაგრატის დის), გულქან-ხათუნის ჩასვლის შემდეგ ამალა ტრაპიზონისკენ დაიძრა, სადაც მას ევდოკია უწოდეს და უფლისწულ მანუელზე (შემდგომში – იმპერატორი მანუელ III) დააქორწინეს. აღნიშნული ცნობებიდან ირკვევა, რომ მაკრიალი არა მხოლოდ სასაზღვრო ზონაა ტრაპიზონის იმპერიასა და საქართველოს სამეფოს შორის (ამ უკანასკნელის შემადგენლობაში), არამედ პრაქტიკული საგზაო კვანძია რეგიონის სახმელეთო და საზღვაო მიმოსვლაში.
ერთიანი საქართველოს სამეფოს დაშლის შემდეგ მაკრიალი შედიოდა იმერეთის სამეფოში, სამცხე-საათაბაგოსა და გურიის სამთავროებში; ხოლო 1551 წელს ოსმალეთის მიერ მისი დაპყრობის შემდეგ – ტრაპიზონის ვილაიეთის არქაბეს ყაზას გონიას ნაჰიეში; 1879 წლიდან – რუსეთის იმპერიის (ბათუმის ოკრუგის გონიას უბანი), პირველი მსოფლიო ომის პერიოდში, 1915 წელს, დაიპყრო რუსეთის იმპერიამ. 1918-1921 წლებში იყო საქართველოს დემოკრატიული რესპუბლიკის შემადგენლობაში, 1921-იდან კი თურქეთის შემადგენლობაშია. ქალაქის სტატუსი მიიღო 1987 წელს[4].
ღირსშესანიშნაობები[რედაქტირება | წყაროს რედაქტირება]
მთავარი სტატია: მაკრიალის ეკლესია.
მაკრიალის სიძველეებიდან აღსანიშნავია ზღვის სანაპიროზე მდებარე კომპლექსი, რომელიც შედგება დარბაზული ტიპის ეკლესიისაგან და მასზე დასავლეთიდან მიყრდნობილი 3-სართულიან ოთხკუთხა კოშკისგან (სიმაღლე – 12 მ). სართულები კამარებითაა გადახურული. ნაგებია ძირითადად რიყის ქვით. კუთხეებში გამოყენებულია აგური, აგრეთვე კერამიკული ფრაგმენტები – ამფორები, დოქები, წყალგაყვანილობის მილები და სხვა, რომლებიც უფრო ადრეული (სავარაუდოდ, გვიანრომაული) პერიოდისაა. კოშკის ქვედა დონეზე შეინიშნება ქვიშაქვის კვადრები, ასევე მეორადი გამოყენების შედეგად მოხვედრილი. სავარაუდოდ, კოშკი თავდაცვითი ნაგებობის გარდა ერთგვარი ორიენტირიც („შუქურა“) უნდა ყოფილიყო.
გალერეა[რედაქტირება | წყაროს რედაქტირება]
-
ძველი ხიდი ქემალფაშაში
ჯაბა ლაბაძის ფოტო -
ქემალფაშის მეჩეთი
ჯაბა ლაბაძის ფოტო -
სასტუმრო სარფი ქემალფაშაში
ჯაბა ლაბაძის ფოტო -
ქემალფაშის ერთ-ერთი დასახლების ხედი
ჯაბა ლაბაძის ფოტო
ლიტერატურა[რედაქტირება | წყაროს რედაქტირება]
- მიქელ პანარეტოსი, ამბავი ტრაპიზონის მეფეების დიდი კომნენოსებისა..., გეორგიკა, ბიზანტიელი მწერლების ცნობები საქართველოს შესახებ, ს. ყაუხჩიშვილმა გამოც., ტ. 7, თბ., 1967.
- ისტორიული ჭანეთის აღმოსავლეთ ნაწილში დაცული კულტურული მემკვიდრეობის ძეგლები, რედ. შ. მამულაძე, ე. კახიძე, ბათ., 2014;
- ტაო-კლარჯეთი, ისტორიისა და კულტურის ძეგლები, კატალოგი, რედ. ბ. კუდავა, თბ., 2018.
რესურსები ინტერნეტში[რედაქტირება | წყაროს რედაქტირება]
სქოლიო[რედაქტირება | წყაროს რედაქტირება]
- ↑ ლ. თოიძე, ინტერვენციას, ოკუპაციაც, ძალდატანებითი გასაბჭოებაც, ფაქტობრივი ანექსიაც, თბ., 1991, გვ., 197
- ↑ Turkstat. Turkish Statistical Institute. დაარქივებულია ორიგინალიდან — 2013-09-27. ციტირების თარიღი: 2011.
- ↑ "Yeni KHK ile iki belde ilçe yapıldı!"
- ↑ Mayor’s page
| ||||||||