Gol

E Gol (vum engl. goal) ass bei Equippesportaarten, déi mat engem Ball gespillt ginn, eng Zort Rumm, déi un zwou Säite vum Spillterrain, déi sech géintiwwer leien, festgemaach ass, mat engem Netz hannendrunn. Zil vun deene Sportaarten ass et, de Ball (beim Äishockey de Puck) an de géigneresche Gol ze schéissen an ze verhënneren, datt déi aner Equipe dat beim eegen Gol mécht.

Ee Member vun der Equipe ass de Golkipp (vum Englesche goal keeper - "Wiechter vum Gol"), fir dee besonnesch Regele gëllen, an deem seng Roll et ass, sech speziell dofir anzesetzen, ze verhënneren, datt de Ball an de Gol geet.

"Gol" nennt een duerch Analogie och dee Punkt, deen eng Equipe kritt, wann de Ball an de Gol geet, an och de Fait, de Ball an de Gol ze schéissen (vgl. "D'Equipe Y läit zwee Goler hannen" - "Den X. huet e Gol geschoss").