Usâmah bin Lâdin

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Plaetje:BinLaden.jpg

Usâmah bin Lâdin

'Usâmah bin Muhammad bin 'Awad bin Lâdin (Arabisch أسامة بن محمد بن عود بن لادن, in de Westerse wereld meistal gesjrieve Osama bin Laden; Ar-Riyâdh, 10 meert of 30 juli 1957) is 'ne väölgezochten terroris en 't houf vaan Al-Qaedah. Heer kump oet 'n puissant rieke familie oet Saoedi-Arabië; mèt zien femiliekapitaal hèlt heer veur e groet deil zien organisatie op de bein. Zien oorsprunkelink doel waor de Amerikaanse bases oet zie vaojerland eweg te kriege. Sins de groets opgezatten attentaat op 11 september 2001 gelt heer es de "meisgezochte maan op Eerd".

Biografie

Heer woort gebore es zaon vaan 'ne rieke bouwmagnaat, dee sterke ban mèt 't Saoedische keuningshoes had en gere nao ziechzelf verwees es "sjeik". Ziene vaojer waor tien kier getrojd (meh noets mèt mie es veer vrouwe tegliek, wie de sjarî'ah dat veursjrijf); Usâmah waor oongevier d'n twintegste zaon. In 1974 trojde heer veur d'n ierste kier. Sommege vaan zien kinder zouwe topfuncties höbbe in Al-Qaedah.

Wie in 1979 de USSR Afghanistan binneveel, begós heer zien loupbaan es militante moslim. Heer veurde 'n guerilla tege 't Roed Leger. Zien organisatie, Maktab-al-Chadamât, woort door de Vereinegde State gesteund. In 1988 splitsde heer ziech vaan dees organisatie aof en riechde Al-Qaedah op. Roond 1990 kierde heer ziech tege de Vereinegde State en de Saoedische regering, dee häöm dao-op verbande nao Soedaan. E kopstök oet de Arabische regering dao besjermde zien activiteite. In 1994 oonterfde zien femilie häöm en 't jaor daonao naom de Saoedische regering häöm zien staotsbörgersjap aof.

Tege 't eind vaan de jaore negenteg gong heer trök nao Afghanistan, boe de fundamentalistische Talibân de mach gegrepe had. Dao kós heer in alle rös trainingskampe opriechte. Wie heer in 2001 houfverdachte woort vaan drei suïcide-attentate tege de VS, eisde de Amerikaanse regering tot de Talibân häöm oetleverde. Op häör weiegring veel me 't land binne. Sinsdeen blaof heer spoorloos, al doke vaan tied tot tied videoban op, die door d'n Arabische nuitszender Al-Jazîrah woorte oetgezoonde. Heer claimde dao eupelik zien verantwäördelikheid voor de attentate.

Veurnaomste attentate

• 29 december 1992, Gold Mihor Hotel, Âden, 2 doeje (mislök)
• 26 fibberwarie 1993, World Trade Center, New York, gein doeje (mislök)
• 7 augustus 1998, Amerikaanse ambassades, Dar-es-Salaam en Nairobi, 225 doeje.
• 11 september 2001, World Trade Center, New York en Pentagon, Wahington D.C., 2752 doeje
• 11 meert 2004, Statie Atocha, Madrid, ca. 300 doeje.