Controriforma
ZE-P
|
Sta paggina chie a l'è scrita in zeneize, co' ina grafia tipo quella do Prian do 1745 |
Controriforma - vasta açion desguggeita da-a Gexa into XVI sec. e in parte do XVII pe restaorâ 'na ciu intensa, viva, scinçea e disciplinâ vitta religioza, realizando quella «riforma into cappo e inte membre», za discussa inti concilli do XV sec. e reiza ancon ciu urgente da-o dilagâ da Riforma protestante into XVI sec.
Religion
modìficaA Controriforma a travagiò into campo do dogma e inte quello da discipliña eclexastega, tra-a cêxîa e o laicato, con di mezi religioxi, polittichi, giudiçiai, insce-o teren coltuâ e in sce quello di arme; a l'agì con particolâ intenscitæ tra o quinto e o nono dexennio do 16° sec., ma a so œuvia a se protrasse pe scin che, co-a paxe de Vestfallia (1648), aparsan zœumoæ decise e sciorte religiose d’Œüropa e traçæ i confin teritoiæ fra e confescioin.
In sciô teren dogmattico, l’œuvia da Controriforma a se concentra particolarmente inte l'attivitæ do Concillio de Trento (1545-63) votta a fissâ o dogma catollico inti ponti inti quæ o protestanteximo o l'aiva renegao di prinçippi tradiçionæ, ò interpretao in moddo nœuvo a Sacra Scritua e i Paddri da Gexa. In particolâ o Concillio de Trento o fissò o dogma do peccao originâ e quello da giustificaçion pe-a fe' e pe i œuvie, condanando o prinçippio luteran da giustificaçion pe-a sola fe', independentemente da-i œuvie, e afermando o valô do libbero arbittrio perscistente ascì doppo o peccao originâ. Ascì into campo da riforma disciplinâ o concillio o desgugette œuvia êsençiâ, dando de norme pe-a çernia e l’açion di cardenæ e di veschi e condanando o nepotismo. Fœua da-o concillio, i pappi dettan infinie dispoxiçioin votte a evitâ o continoâse de çerti moæ, pe-o ciu da longhiscimo tempo deploræ, ma a-i quæ no s'ea mai ariescii a poñe repao.
A-i pappi s'asciancò di eclexasteghi eminenti comme san Carlo Borromeo, san Lusciandro Saolo, i biæ Paolo Burali d'Arezzo e Zane Giovenâ Anciña, o cardenâ Gabriello Paliotto e atri. Gren arteixi de l'intrega œuvia reformatrixe fun i nœuvi ordi religioxi, prinçipalmente a Compagnia do Gexo, e da pœu teatin, somaschi, barnabiti, uspiâê de San Zane de Dê, ministri di infermi, ceghi regolæ da Moæ de Dê, ceghi regolæ minoî, scolopi. A questa scioitua de nœuvi ordi religioxi s'acompagnò a riforma di antighi: sorzette coscì i capuçin, i carmeliten descaçi, i romiten descaçi de s. Aostin. Into complesso co-a Controriforma, i driti da gerarchia dettan lœugo a 'n'organizaçion sempre ciu forte e disciplinâ; o primato papâ o l'afermò con sempre mao fermeçça i so atributi.
Caratteristega da religioxitæ da Controriforma a fu, into campo morâ, 'na mao benignitæ, un senso ciu vivo e 'na valutaçion ciu esteiza de tutte e condiçioin psicologgiche di atti umoen. O sprito de mortificaçion da carne o l'arestò parte êsençiâ da pietæ catollica, ma scentò, ò s'amermò, çerte forme d'aspia e pubbrica penitença. Aomentò ascì grandemente a cua pe o megioamento do costumme di eclexasteghi, l’attivitæ sociâ e beneffica do clero: l’importança do saçerdoççio, ch'o l'ea stæto elemento vitâ scin da-o començo da Gexa catollica, a ne resultò ancon acresciua, sciben che quarche laico o l'asurse a figua de primma classe inta vitta da Gexa, coscì comme molti eclexasteghi i quæ ebban inte questa 'n'importança sença arcun raporto co-a so poxiçion gerarchica.
A Controriforma a lottò contra l'erexia, no soltanto a traverso in'œuvia polemmica in difeiza di prinçippi catollichi, ma sofocando con mezi represcivi ogni fogoâ d'erexia inti paixi catollichi. Quest’œuvia a fu in particolâ moddo afiâ a l'Inquixiçion. Conessa a l'œuviao de questa a fu l’attivitæ de prevençion, ch'a s'esplicò sorvetutto into campo libraio co-a censua preventiva (sottopoxiçion a l'imprimatur) e represciva (instituçion de l'Indiçe di libbri proibii).
A tutte i attivitæ inte quæ se concretizò a Controriforma va azonto quella polittica e militâ, che a Gexa a no poette realizâ da lê, ma ch'a no cessò fin da-o començo de racomandâ a-i stati, incoragindo e impreize votte a vençe in sce-i campi de bataggia i erettichi e a sgominâne e coaliçioin. A stoia da Controriforma a comprende pertanto quella de guære de religion. A Germannia a fu o so campo prinçipâ, da-a formaçion da Liga de Smarcada a-a paxe de Vestfallia. Infin, l'è da mençunâ l’œuvia de miscioin, specce gexuitiche, che porton o catoliçeximo no solo fra i indiggeni de l'Amerrica Meridionâ, ma in Etioppia, in India, in Ciña, in Giapon. Inta mæxima direçion de reconquista e espanscion da Gexa catollica s'acentuò i sforsci verso l’union de gexe e o ‘recuppero’ di crestien ortodosci, con conseguente impegno, religiozo e militâ, pe l’alontanamento di Turchi da l'Œüropa centrâ e da-i Balchen.
Arte
modìficaInte l'ambito de l'arte o concillio de Trento o se prononçiò de mainea ciutosto generrica: rinlaçandose a-e decixoin do segondo Concillio de Nicea, o ribadì a liçeitæ e validitæ de inmaggine sacre e o ne affiò a-i eclexasteghi a discipriña e o controllo. A politica figurativa da Controriforma a se vózètte, perçò, sorvetutto a scombatte e liçençie e i abuxi into campo iconograffico, inscistendo in sce l'ezatta aderença a-i fæti da stoia crestiaña e a-e veitæ teologgiche, despugiæ da ogni elemento de tradiçion apoccrifa ò popolâ, e a spinzette a evidençiâne i valoî edificanti. Questo rœüdo attezamento o comportava ascì l'eliminaçion di elementi profen e 'n particolâ controllo insci-â decença de inmaggine: exemplæ, a sto propoxito, pœu ese o processo intentao into 1573 da-o tribunâ de l'Inquixiçion a-o Poulo Veronese che inta "Çeña in caza Levi" (Veneçia, Galerie de l'Academmia) o l'aiva introduto chen, nen, buffoin no mençunæ da-o testo bibblico e sconvegninti a un epizoddio sacro, e, ciu ancon, i aspii atacchi a-i quæ fu sottoposto o "Giudiççio universâ" do Michelangiolo Buonaroti inta Capella Sistinn-a pe l’indecença di nui, pe l'introduçion de figue comme quella do Caronte, pe a raffiguaçion di angei senç'ae ecc.
Ma da-a rente a questa reddena poxiçion, ch'a l'atrœuva esprescion inte un di doi dialloghi pubricæ into 1564 da G. A. Gilio (Degli errori e degli abusi de’ pittori circa l'historie) e, de mainea ciu prefonda e scistemattica, inte l'œuvia do G. Paleotti (Discorso intorno alle immagini sacre e profane, 1582), e a l'anallogo attezamento inti confronti da muxica (o contraponto, i improvixi ò o diminuendo, che rendeivan incomprenscibbile e paole, fun eliminæ, comme fu epurao ascì i motivi popolæ in sce-i quæ de spesso se cantava e parolle da messa), into panorama artistego e religiozo da Controriforma trovò lœugo di movimenti e de personalitæ de carattere completamente despægio: graçie a l'œuvia di gesuiti e sorvetutto a di tipi d'organizzaçion quæ quella di oratoî, se cortivò into campo di arte figuative, da muxica e do tiatro, di esprescioin che, fando leva insci-ô sentimento, risurton ciu efficaçi e aberanti strumenti de propaganda. Inte l'ambito da politica da Controriforma va ancon aregordao l’unnico scrito che con scrupoloza meticoloxitæ o l'affronte o problema de l'architettua sacra: e Instructiones fabricae et supellectilis ecclesiasticae che o San Carlo Boromê o pubbricò into 1577.
Colegaménti esterni
modìfica- Wikimedia Commons a contêgne di files in sce Controriforma
Contròllo de outoritæ | LCCN (EN) sh85033436 · GND (DE) 4019710-4 · NDL (EN, JA) 00562955 |
---|