Nancy Walker
Nancy Walker (10 de mayu de 1922, Filadelfia – 25 de marzu de 1992, Studio City) foi una actriz y comediante teatral, cinematográfica y televisiva d'Estaos Xuníos. Tamién foi direutora cinematográfica y televisiva, destacando'l so trabayu en The Mary Tyler Moore Show, programa nel que fixo delles actuaciones como artista convidada. De toa una carrera de cinco décades, quiciabes ye más recordada pol so papel d'Ida Morgenstern en The Mary Tyler Moore Show y por un destacáu personaxe recurrente de la serie derivada Rhoda.
Nancy Walker | |
---|---|
| |
Vida | |
Nacimientu | Filadelfia, 10 de mayu de 1922[1] |
Nacionalidá |
|
Llingua materna | inglés |
Muerte | Studio City, 25 de marzu de 1992[1] (69 años) |
Causa de la muerte | cáncanu de pulmón |
Familia | |
Padre | Dewey Barto |
Estudios | |
Estudios |
Professional Children's School (en) |
Llingües falaes | inglés |
Oficiu | actriz, direutora de cine, actriz de teatru, actriz de televisión, actriz de cine |
Nominaciones | |
IMDb | nm0908055 |
Primeros años
editarEl so verdaderu nome yera Anna Myrtle Smoyer, y nació en Filadelfia, Pennsylvania, siendo la mayor de les dos fíes del artista de vodevil Dewey Barto. Tanto ella como'l so padre yeren de baxa estatura (1.50 m).[3] La so madre finó cuando la so hermana Betty Lou yera inda una neña. Nancy y Betty Lou, que tamién tendría una carrera musical, foron criaes pol so padre, Dewey Barto (1896–1973), unu de los componentes del dúu cómicu y acrobáticu Barto and Mann.
Carrera interpretativa
editarWalker debutó como actriz teatral nel circuitu de Broadway en 1941 cola obra Best Foot Forward que, na so adautación cinematográfica, supunxo la primer actuación de Walker na gran pantalla. La película, protagonizada por Lucille Ball, rodóse en 1943. La so siguiente actuación tuvo llugar nel musical de MGM Broadway Rhythm, nel qu'interpretaba'l númberu musical "Milkman, Keep Those Bottles Quiet".
La so pequeña estatura dio-y dificultaes p'atopar papeles apropiaos. Sicasí, la so capacidá cómica fixo que siguiera actuando nes décades de 1940 y 1950, faciendo, ente otros, los papeles de Hildy Eszterhazy ("I Can Cook, Too!") en Un día en Nueva York y Katey O'Shea en Copper and Brass, obra representada en Broadway. Foi nomada a un Premiu Tony en 1956 pol so trabayu na revista musical Phoenix '56, y de nuevu en 1960 pol so trabayu n'otru musical, l'esitosu Do Re Mi, nel que trabayaba Phil Silvers. Les sos actuaciones en musicales motivaron la grabación de discos, ún de los cualos, I Hate Men (1959), con Sid Bass y la so orquesta, con temes como "I'm Going to Wash That Man Right Outa My Hair" y "You Irritate Me So", foi calificáu como unu de los peores discos de versiones de tolos tiempos.[4][5] Mientres la década de 1950 la so presencia sobre los escenarios de Broadway algamó tamién comedies non musicales como Fallen Angels (1956), de Noël Coward.
A tou ello siguieron docenes d'actuaciones televisives en papeles recurrentes o como actriz convidada. A lo llargo d'una carrera que s'enllargó cinco décades, Walker actuó en comedies, drames y programes televisivos de variedaes como The Garry Moore Show y The Carol Burnett Show. Na temporada televisiva 1960-61 actuó en dos episodios del programa de la NBC The Tab Hunter Show. En 1970 consiguió'l papel recurrente d'Emily na serie Los mios adorables sobrinos, protagonizada por Brian Keith. En rematando esta producción, Walker interpretó per vegada primera a Ida Morgenstern, la madre del personaxe de Valerie Harper, Rhoda Morgenstern, na primer temporada de The Mary Tyler Moore Show. El capítulu nel que se presentaba al personaxe, "Support Your Local Mother", tuvo tanto ésitu que ganó un Emmy al meyor guión - Serie de comedia que s'otorgó a James L. Brooks y Allan Burns. A partir d'entós Walker foi artista convidada con calter añal nos siguientes trés años. En 1974, cuando s'estrenó la serie derivada Rhoda, Walker sumóse al repartu como intérprete regular. Ente 1971 y 1976 tamién foi regular na esitosa serie detectivesca de Rock Hudson McMillan and Wife, interpretando a l'ama de llaves de los McMillans, Mildred. Esos dos papeles valiéron-y a Walker la nominación pa siete Premios Emmy.
En 1976 la ABC ufiertó a Walker un contratu pa protagonizar una serie propia, The Nancy Walker Show, producida pola compañía de Norman Lear. Nesi show Walker yera Nancy Kittredge, una axente artística. El contratu especificaba que si'l show atayábase enantes de los sos primeres trelce selmanes, ella tendría otra sitcom na ABC. Enantes de rodar el primer episodiu de la serie, Walker fixo la so única actuación de la temporada 1976-77 en Rhoda. Nesta entrega, "The Separation", trabayaba al pie de Valerie Harper, David Groh, y Harold Gould. Pola so actuación, Walker foi nomada a un Premiu Emmy. The Nancy Walker Show estrenóse na ABC a finales de setiembre de 1976. Nun recibió bones crítiques, y los índices d'audiencia nun foron bonos, polo qu'atayóse n'avientu de 1976.
Casi darréu, Garry Marshall dio otra serie a Walker, Blansky's Beauties. El personaxe principal presentóse una selmana enantes del estrenu del show nun episodiu de la sitcom Díes felices. La serie empezó a emitise en febreru de 1977. Nun tuvo bona audiencia, polo qu'atayóse en mayu de 1977, dando a Walker la duldosa distinción de protagonizar dos series fallíes nun mesmu añu. Volvió a Rhoda nel entamu de la temporada 1977–1978 (dando al show un bien precisáu emburrie nes audiencies, que cayeren nel añu anterior), permaneciendo na serie mientres el restu de les sos emisiones. Nesa dómina Walker empezó a dirixir dellos episodios de The Mary Tyler Moore Show, Rhoda y Alice.
Unu de los últimos papeles cinematográficos importantes de Walker foi na comedia de 1976 Murder by Death. Siguió activa nel mundu del espectáculu hasta la so muerte, y encarnó a Rosie, una camarera de Nueva Jersey, nuna serie d'anuncios comerciales pa la marca Bounty ente 1970 y 1990. Ente les sos últimes actuaciones televisives figura'l so papel recurrente de "Tía Angela", la hermana viuda de Sophia Petrillo (Estelle Getty), en The Golden Girls, papel pol cual foi nomada a un Emmy.
Carrera como direutora
editarEn 1980 Walker debutó na direición cinematográfica col filme musical de The Village People y Bruce Jenner Can't Stop the Music. Foi un fracasu de taquilla, anque más p'alantre consideróse como un títulu de cultu.
Vida personal
editarCasada dos vegaes, Nancy Walker y el so segundu home, el profesor de teatru David Craig, tuvieron una fía, Miranda. [1] David Craig finó en 1998, a los 75 años d'edá, por causa de un cáncer de pulmón. Miranda Craig foi redactora publicitaria, y finó nel añu 2000.
Nancy Walker finó por causa de un cáncer de pulmón en Studio City, California, en 1992. Tenía 69 años d'edá. Nel momentu de la so muerte yera coprotagonista de la sitcom True Colors. Los sos restos fueron amburaos, y les sos cenices espardíes nes Islles Vírxenes Americanes.
Referencies
editar- ↑ 1,0 1,1 Biblioteca Nacional de Francia. «autoridaes BNF» (francés). Consultáu'l 10 ochobre 2015.
- ↑ URL de la referencia: http://razzies.com/asp/content/XcNewsPlus.asp?cmd=view&articleid=20. Direición web d'archivu: https://web.archive.org/web/20131104113243/http://razzies.com/asp/content/XcNewsPlus.asp?cmd=view&articleid=20. Data de consulta: 16 payares 2019.
- ↑ Born as Anna Myrtle Smoyer, not Swoyer, as per the following references: American Century.org, [https://books.google.com/books?id=XbBz3C4Gr0EC&pg=PT811&lpg=PT811&dq=Anna+Myrtle+Smoyer&source=bl&ots=9kQrkzVlVB&sig=_aPGxXzyb4V0LEYkI1ojoq7THXU&hl=en&ei=BQgHS7-IKoPQlAer15iFBA&sa=X&oi=book_result&ct=result&resnum=2&ved=0CAsQ6AEwAQ Excerpt from The Oxford Companion to the American Musical: theatre, filme, and television (June 2008), Oxford University Press, USA (ISBN-0195335333)]
- ↑ Nick DiFonzo, The WORST album covers in the world... EVER! London, UK: New Holland Publishers, 2004 (p. 85). The album cover and a discussion of the album may be found here.
- ↑ The Guardian newspaper (Arts section)
Thomas S. Hischak. The Oxford Companion to the American Musical: theatre, filme, and television (June 2008), Oxford University Press, USA (ISBN 0-19-533533-3)
Enllaces esternos
editar- Nancy Walker na Internet Movie Database (n'inglés)
- Nancy Walker n'AllMovie (n'inglés)
- Nancy Walker na base de datos TCM Movie (n'inglés).
- Nancy Walker na Internet Broadway Database (n'inglés)
- «Nancy Walker». en Find a Grave. (n'inglés)