Repùbleghe marinare
La definision de Repùbleghe marinare la se dopara in relasion a serte sità costiere (de la penìzoła italiana ma anca no), che tra el X e el XII secolo le ga godesto de un periodo de prosperità econòmega par via de la so atività comercial, inte un quadro de larga autonomia pułìtega. In genere, la definision la se riferise in particolar a quatro sità italiane: Amalfi, Genoa, Pisa e Venexia.
Oltre a ste quatro chi, che le xe le pi famose, ghe xera anca altre sità che le godea a la stessa maniera de l'indipendensa (con un goerno autonomo soto forma de republica oligarchica, un so scheo, un so esercito, etc.), le gavea partesipà a le Crociate, le gavea na flotta de navi e la gavea fònteghi (o sia boteghe-magaxini dove vendar le merci) inte i vari porti del Mediteraneo, e par tuti sti motivi le pode esar ritegnue anca lore repùbleghe marinare. Intrà ste chi, ghe xe Gaeta, Ancona, Ragusa e Noli.
Orizini
canbiaLa ripresa econòmega che se ga vu in Europa intorno a l'anno mille, conpagnà con l'insicuresa de le vie de comunicasion interne par via de tera, la ga fato sì che le rotte comerciali prinsipai le se svilupése longo le coste del Mar Mediteraneo. In sto contesto, l'indipendensa senpre pi granda assunta da alcune sità de mar la le ga portà a verghe un ruolo de primo piano inte el senàrio europeo.
Ste sità qua, che le jera esposte a le incursion dei pirati, soratuto i Saraceni, le sà atresà in maniera autonoma par la so difesa, costruendo dele grande flotte da guera, e le xe sta bone inte i secoli X e XI de passar a l'ofensiva, sfrutando le rivalità tra la potensa maritina bixantina e quela islamica, con le quali le sà messo in lotta par el controllo del comercio con l'Asia e l'Africa e de le rotte mediteranee.
Sviłupo
canbiaPar quel che riguarda le istitusioni, le sità le ga formà dei goerni autonomi republicani, espresion de la classe mercantile che l'era la ciave de la so potensa. La storia de le Republiche marinare la se fa su sia col scuminsio de l'espansion europea verso Oriente, sia co le origini del moderno capitalismo, inteso come sistema mercantil e finansiario. I marcanti de le repùbleghe marinare italiane i doparava schei conià in oro, in disuso da secoli, e i ga messo a punto nove operasion de canbio e de contabilità. I ga inoltre incorajà i progressi tecnologici ne la navigasion, che la jera el suporto fondamental par la crésita de la richesa mercantil.
Le Crociate le ga oferto l'ocasion par le so mire espansionistiche. Venesia, Amalfi, Ancona e Ragusa le jera xà inpegnà inte i tràfici col Levante, ma con le Crociate el fenomeno l'è aumentà: mijari de italiani de le Republiche i ze 'ndà in Oriente, metendo su basi, scali e stabilimenti comerciali. Sti sentri mercantili italiani i gavea anca na granda influensa pułìtega a livel locale: difati i marcanti i metea su, do che i gavea i so afari, dele asociasion de caratere corporativo, che sercava de farse dar dai goerni stranieri dei privilegi giurisdisionai, fiscali e doganali, dentro de un preciso quadro pułìtego: xe nato cussita varie signorie personali.
La storia de le varie Republiche marinare la xe tanto varia, e se pol capirlo se se pensa a quanto le xe ndà vanti: Venexia, Genoa, Noli e Ragusa le ga vu na vita longa asè, che superando el periodo medieval, la riva fin a le soglie de l'età contenporanea, quando tuto el sistema dei Stati italiani e europei l'è sta butà par aria da le guere de Napoleon. Altre repùbleghe le ga vu anca quele na vita bastansa longa, restando lìbare fin al Rinasimento: le xe Pisa, che la xe passà soto el dominio de Firense inte el 1406, e Ancona, che la xe passà soto el Stato de la Cesa inte el 1532. Amalfi e Gaeta invese la ga perdesto la so indipendensa presto asè: la prima inte el 1131 e la seconda inte el 1140; entranbe conquistà dai Normanni.
Amalfi
canbiaAmalfi, fòrsi la prima de le Republiche marinare che xe rivà a verghe n'inportansa de primo piano, la gavea svilupà scanbi intensi con Bixansio e co l'Egito. I marcanti amalfitani i ga tolto ai Arabi el monopolio dei comerci mediteranei e i ga fondà inte el X secolo basi mercantili ne l'Italia meridional e in Medio Oriente. Ad Amalfi i ga inventà anca la bussola, strumento fondamental par la navigasion e che el se dopara oncora desso.
Tra le testimonianse piasè inportanti de la grandesa de Amalfi, ghe xe le Taole Amalfitane, un codice che el rancurava le norme del dirito maritimo, restà valido par tuto el medioevo.
Amalfi inte el 1137 la xe stà sachegià dai Pisani, in un momento inte el cuało l'era indebolìa da catastrofi naturali (gravi inondasioni) e da l'annesion al regno normanno. Dopo la conquista da parte dei Normanni, xe scuminsià na rapida decadensa e la xe stà sostituìa inte el so ruolo de potensa mercantile da Napoli.
Genoa
canbiaGenoa la jera risorta ai scuminsi del X secolo, quando - dopo la distrusion de la sità par mano dei Saraceni - i so abitanti i ga ripreso la via del mar. L'inportansa de la so flotta la gato fato guadagnar el riconosimento, da parte del sacro romano inperador, de le rivendicasion autonomiste in materia legislativo-consuetudinaria ed econòmega.
L'aleansa con Pisa la ga parmesso la liberasion del toco osidental del Mediteraneo dai pirati saraceni, con la riconquista de Corsica, Sardegna, Isole Baleari e Provensa.
Na nàsita del goerno genovese la xe avegnù con la costitusion de la "Compagna Communis", riunion de tuti i consorsi comerciali de la sità (ciamà apunto Compagne), a cui ga aderìo anca i nobili feudatari de le val limitrofe e de le riviere.
Le fortune del comune le xe aumentà un bel po' grasie a la partesipasion a la prima crociata: le comunità genovesi che s'avea piasà in tante località de la Tera Santa la ga aquisìo grandi privilegi. L'apice de la fortuna genovese el se ga vu inte el XIII secolo con la stipula del Tratato de Ninfeo (1261) con l'inperador bixantin Michele VIII Paleologo, con cui ai Venexiani ghe vegnea inpedìo l'accesso ai stretti che porta al Mar Negro. Póco dopo vien sconfita na olta par tute Pisa ne la batalia de la Meloria, inte el 1284.
Inte el 1298, i Genovesi i ga inoltre batùo la flotta venexiana rente l'ìzoła dàlmata de Cursola: durante el scontro vien ciapà prigioniero el venexian Marco Polo, che durante la so prigionia a palaso San Giorgio a Genova el ghe detta a Rustichello da Pisa, so conpar de cella, el resoconto dei so viai. El dominio dei mari el xe restà ne le mane de Genoa par sirca setant'ani, fin al seconda e ultimo grande scontro con Venexia, la Guera de Ciosa inte el 1372, finìa co la vitoria dei venexiani, che cussita i ga riconquistà definitivamente el dominio sui commerci par l'oriente.
Dopo la trista parentesi quatroxentesca, segnà da pestilense e dominasion straniere, la sità la ga vissùo el so momento de massimo splendor a partir da la liberasion par man de Andrea Doria inte el 1528 e par tuto el secolo seguente, finché la vecia aristocrasia la ga mantegnesto na sostansiale vitalità in ànbito sora-de-tuto econòmego. La Republica, su la quale gavea butà l'ocio le pi grande potense visine come la Francia e el ducato de Savoia, la xe sta sotomessa da l'arivo de Napoleon inte el 1805 e unìa inte el 1815 al Regno de Sardegna, che el ghe n'a desfà definitivamente l'economia e el ga provocà l'emigrasion de le mejo maestranse e de gran parte de la popolasion rurale verso le Meriche.
Piza
canbiaInte el 1016 Pisa e Genoa, aleà tra de lore, la ga sconfito i Saraceni ciapando la Còrsega e la Sardegna, oltre a tor el controlo del Mar Tiren. On secolo dopo le ga delibarà le Baleari; sta spedision la xe sta selebrà inte el "Gesta Triumphalia par pisanos" e inte un poema epico, el "Liber Maiorichinus", conposti inte i ani 1113-1115.
Pisa, che a chel'epoca la se afaciava sul mar, a la foce de l'Arno, la xe rivà a l'apice del so splendor tra el XII e il XIII secolo, co le so navi le controlava el Mediteraneo osidental.
La rivalità tra Pisa e Genoa l'è aumentà inte el XIII secolo fin a sfogar ne la batalia naval de la Meloria (1284), che la ga segnà el scuminsio del declino de la potensa pisana, che la ga dovesto rinunciar a la Corsica e darghe a Genoa un toco de la Sardegna (1299).
Venesia
canbiaPar savèrghene de pì, vardarse ła voxe Republica de Venesia. |
La potensa de Venexia, dita anca la Serenissima, la xe nata dal svilupo dei raporti comerciali con l'Inpero Bixantin, de cui formalmente la fasea inisialmente parte, anca se in realtà la jera sostansialmente indipendente. Venexia la xe restà anca in seguito aleà de Bisansio ne la lotta contro Arabi e Normanni.
Intorno all'anno Mile la ga scuminsià la so espansion ne l'Adriatico, batendo i pirati che i ocupava le coste de l'Istria e de la Dalmasia e metendo la region e le so sità prinsipai soto el so dominio.
La xe rivà al massimo de la so potensa ai primi del Dosento, dominando i trafici comerciali inte el Mediteraneo e con l'Oriente.
Durante la quarta crociata (1202-1204) la so flotta la xe sta determinante ne la conquista de le ìzołe e de le località maritime comercialmente piasè inportanti de l'inpero bixantin. La conquista dei porti de Corfù (1207) e de Candia (1209) la ga garantìo un comercio che se stendea a Levante, e el rivava fin a la Siria e a l'Egito. A la fin del XIV secolo, Venexia la xera devegnùa uno dei Stati piasè siori d'Europa.
El so dominio inte el Mediteraneo oriental inte i secoli sucessivi el xe sta menasà e conpromesso da l'espansion de l'Inpero Otoman in quele stesse aree, nonostante la granda vitoria naval ne la bataja de Lèpanto del 1571 contro la flotta turca, conbatùa insieme a la Lega Santa.
Le altre repùbleghe
canbiaAncona la xe deentà libaro comune a la fin de l'XI secolo, e la ga dovù scontrarse pi olte co i inperadori de Germania, che i volea sotométarla. Inte el 1174 l'inperador Federico Barbarossa, aleà coi venexiani, el ga asedià la sità, che parò la ga resistìo gajardamente. Xe tacà cussita un gran periodo de flòridi comerci co l'Oriente, durà fin al sinquesento, durante el quale la sità la ga mantegnesto senpre la forma republicana, trane un periodo de ocupasion da parte dei Malatesta de Rimini dal 1348 al 1383. L'indipendensa anconitana la xe finìa inte el 1532 con la conquista da parte de papa Clemente VII.
La Republica de Noli (che la se fasea ciamar Quinta Republica Marinara) la xe nata inte el 1192, e fin da subito la xe stà aleà coi Genovezi, seguendo senpre le sorti de Genova fin al 1797.
A Gaeta invese xe nato xà inte el 917 un Dogado autonomo, nominalmente sotoposto al Sacro Romano Inpero e goernà da la fameja dei Gaetani o Caetani. El periodo de splendor de la sità el xe durà par do secoli, fin a la conquista normanna inte el 1140.
Ragusa, fondà dai bixantini inte el VII secolo, la xe stà soto i venexiani inte el periodo dal 1205 al 1358, quando la sà goadagnà l'indipendensa profitando de na guera tra Venexia e l'Ongaria. Nei secoli XV e XVI la xe rivà al so apogeo, garegiando coi venexiani par el controlo dei trafici ne l'Adriatico, dopodiché xe scuminsià la decadensa, e Ragusa le xe restà indipendente ma come tributario de l'Inpero Otoman, fin a l'ocupasion fransexe inte el 1806.
Raporti tra le Repùbleghe marinare
canbiaLe relasion tra le Repubbliche marinare le tolea origine da la so natura de Stati orientà al comercio. Ste relasion le riguardava de olta in volta acordi de natura econòmega e pułìtega, par verghe reciprocamente goadagno da na rotta comerciale o par metarse dacordo par no ostacolarse una co l'altra.
Spesso, parò, la concorensa par el controlo de le rotte comerciali con l’Oriente e inte el Mediteraneo la scadenava dele rivalità che no se podea risolvar sul piano diplomàtego e difarenti xe sta i scontri armati tra le Republiche marinare.
Piza e Venesia
canbiaVerso la fin del XI secolo xe tacà la prima crociata in Terasanta par inisiativa del pontefice Urbano II, sostegnesta da le predicasion de Pietro l'Eremita. Venexia la xe intervegnùa ne le vicende de la crociata quasi simultaneamente a Pisa e le do Republiche le xe entrà subito in concorensa tra de lore. Ne le aque de Rodi se ga quindi scontrà l’armata naval venexiana del vescovo Eugenio Contarini con quela pisana de l’arcivescovo Daiberto.
Pisa e Venexia le ga entranbe jutà l'esercito comandà da Gofredo de Buglione a vénzar l’asedio de Gerusaleme. La spedision pisana, dopo sto fato, la xe restà in Terasanta: l’arcivescovo Daiberto el xe devegnesto el primo patriarca de Gerusaleme e el ga incoronà Goffredo primo re cristian de Gerusaleme. Al contrario de quanto ga fato Pisa, la partesipasion de Venexia a la prima crociata la xe finìa in pressia, probabilmente parché a lori ghe interesava pi che altro controbilanciar l’influensa pisana e genovese ne le terre del Levante.
Ma i raporti tra Pisa e Venexia no i xe senpre sta caraterixà da l’antagonismo. Difati le do republiche, inte el corso dei secoli, le ga stipulà difarenti acordi coi quali vegnea stabilìe le zone de influensa e de asion de Pisa e de Venexia, in modo tale da no intralciarse una co l'altra. El 13 otobre 1180 el doxe de Venexia e el rapresentante dei consoli pisani i ga firmà un acordo par la non ingerensa reciproca i tei afari adriàteghi e tirenici e inte el 1206 Pisa e Venexia le ga concludesto un tratato in do che se ribadea le rispetive xone de influenza.
Inte el 1494-1509, durante i avenimenti relativi a l’asedio de Pisa da parte de Firenze, la Serenissima, seguendo la so pułìtega che volea asicurar la “libertà d’Italia” con l’eliminasion de ogni intervento straniero ne le tere italiane,[1] l'era corsa in socorso dei Pisani che i zercava de salvare la so repùblega da l’agresion de Firenze, che no l'era sta osteggià da Carlo VIII, sovrano de Francia, presente in Italia col so esercito.
Venesia e Genoa
canbiaI raporti tra Genova e Venezia i xe sta squasi senpre de forte ostilità e concorenza, sia econòmega sia militare. Ai primi del XIII secolo le ostilità le se limitava a singoli atti de pirateria e a conbatimenti isolà. Verso el 1218 le Republiche de Venexia e de Genoa le se metea dacordo par far finir le atività de pirateria con la garanzia de tutelarse una con l'altra, mentre ai Genovesi ghe vegnea garantìa la libartà de trafico ne le tere de l’inpero oriental, un marcà novo dove se ciapava ben.
La guera de San Saba
canbiaLa crisi tra le do Republiche la xe s-ciopà co na violenza inpresionante con le vicende avegnùe a San Zuàni d’Acri par el possesso del monastièr de San Saba che i Genovesi i ga ocupaà inte el 1255, inviando subito dopo le ostilità col sachegio del quartier venexian e la distrusion de navi fèrme inte el porto. La Serenissima prima la se ga messo dacordo con Pisa stipulando n’aleanza a difesa dei comuni intaressi ne la region, dopo la xe passà al contrataco butando zo el monastièr fortifegà de San Saba. I Genovesi e el regente del Principato cristiano de Siria, el baron Filipo de Montfort, i xe dovui scapar via da de lì.
N'ano pi tardi le tri potenze maritime le sa scontrà de novo ne le aque davanti San Zuàni d’Acri. Squasi tute le galee genovesi le xe sta afondà, e milesetezento intrà conbatenti e marinai i ga perso la vita. I Genovesi i ga risposto fasendo nove aleanze ne la region. Sul trono de Nicea regnava Michele VIII Paleologo, che el volea riconquistarse co le arme le tere che le jera apartegnùe a l’Inpero Bizantin. Donca el so disegno espansionistico e quelo genovese i se catava a maraveja. La flotta e l’esercito niceni i ga 'sedia e conquistà Costantinopoli, fasendo cascar l’Inpero Latin d’Oriente che l'era nato gnanca sesant'ani prima par opera dei venexiani e dei crociati. La Republica de Genova la ga quindi sostituìo quela de Venexia inte el monopolio dei comerci coi teritori del Mar Negro.
Sto periodo de guere tra Genova e Venexia el sa sarà con la Batalia de Curzola inte el 1298 (venta da Genoa), durante la quale xe sta ciapà prigioniero, oltre al doxe venexiano Andrea Dandolo, anca Marco Polo. I prigionieri i xe sta incadenai ai remi come se fase a quei tenpi, ma el doxe par no vegner umilià rivando a Genoa messo cussita, el ga preferìo coparse batendo la testa pi olte sul remo. Un ano dopo le do Republiche le ga firmà la pase a Milan.
La guera de Ciosa
canbiaVerso la fin del XIV secolo, la granda ìzoła de Cipro, goernà da la signoria de Pietro II de Lusignano, la jera sta ciapà dai Genovesi, e Andronico Paleologo el gavea dato a Genova l'ìzołeta de Tenedo, inportante scalo longo la rotta del Bosforo e del Mar Negro, non rispetando la precedente concesion fata da so pare a favor de Venexia. Ste do robe le ga fato sì che tachese de novo le ostilità tra le do Republiche marinare.
El conflito el xe sta dito guera de Ciosa, parché i Venexiani, dopo na prima vitoria, i xe sta batui a Pola dai Genovesi, che i ga ocupà Ciosa e messo l'asedio a Venexia. I Venexiani, parò, i xe sta boni de metar in pié na nova flotta e de asediar a so volta i Genovesi a Ciosa, finché sti qua no ghe tocà aréndarsi (1380). La guera la sa concluso quindi a favor de Venexia con la pase de Torin de l’8 aprile 1381.
Genoa e Piza
canbiaSte do Republiche marinare le ga vu tanti scanbi, par via de la so posision inte el Tireno. A l'inizio, i 'ndasea dacordo e i xera aleà insieme par afrontar l'espansion araba, senpre pi minazosa. In seguito, parò, sà scadenà le rivalità par dominar ne la parte osidental del Mediteraneo.
Amalfi e Piza
canbiaAmalfi, zà da la metà dell'XI secolo, la gavea perso la conpleta autonomia, anca se la continuava i propri scanbi comerciali godendo de na anpia (almanco in sto periodo) autonomia 'ministrativa. Soto de la protesion del normanno Guglielmo, terzo Duca de Puglia, i aministratori de Amalfi i ga ragiunto un bon acordo comerciale, inte l'otobre 1126, con la vizina Pisa, con el scopo de laorar insieme ne la tutela dei comuni interessi inte el Tireno. Sto acordo l'era fruto de n'amicizia, con la Republica toscana, che la durava ormai da decenni. Amalfi, parò, non la gavea un esercito suo che el defendesse i intaressi dei comercianti amalfitani. Par sto motivo le navi de Amalfi no le xe inpegnà tanto de frecuente in asion militari contro altre Republiche marinare. A un zerto punto Pisa la ga roto l’accordo con Amalfi e la ga atacà la sità de la costiera el 4 agosto 1135, inte el contesto de la guera che vedea inpegnà el papa Innocenzo II e el novo inperador Lotario II (e con lori le Republiche de Genoa e de Pisa) contro el normanno Ruggero II d’Altavilla che el controlava el teritorio de Amalfi. Sta guera la xe finìa favorevolmente par Ruggero II, che el sa visto riconossiùi i so diriti sui teritori de l’Italia meridional. Amalfi la ga perdesto anca la so autonomia pułìtega.
Venesia, Ancona e Ragusa
canbiaLa competision comerciale tra Venexia, Ancona e Ragusa la jera ciossa, parché le se affaccia tute tri sul mar Adriatico. In pi de na ocasion le xe rivà a uno scontro aperto. A Venesia, che la savea de èsar pi forte econòmegamente e militarmente, no ghe piasea verghe la concorenza de altre sità marinare proprio ne l'Adriatico. Tanti porti adriàteghi i xera soto el dominio de la Serenissima, ma Ancona e Ragusa le mantegnea la so indipendenza. Ste due republiche, par no darghela vinta a la repùblega veneta, le ga streto ripetute e durevoli aleanze.
Notasion
canbia- ↑ G. Benvenuti - Le Repubbliche Marinare. Amalfi, Pisa, Genova, Venezia - Newton & Compton editori s.r.l., Roma 1989, pag. 255
Bibliografia
canbiaAltri projeti
canbia- Wikimedia Commons el detien imàjini o altri file so Republiche marinare
Linganbi foresti
canbia- repùbbliche marinareTreccani.it – Enciclopedie on line, Istituto de ła Ençiclopedia Italiana.
- repubbliche marinare, in Disionàrio de istòria, Istituto de ła Ençiclopedia Italiana, 2010.
Controło de autorità | GND (DE) 1109809182 |
---|